1 Jɔ̀ɔ̌n 3 - Nyesoaa Kuo Win Jajle

A Ne Kmɔ̌ Wòje Nyesoaa Jlǔ

¹ Ba jě ke äa Gbeǐ Nyesoa nu ämoo mǒ noɛɛa, dɛǒ nɛ̀ nu ɛ Ɔ̌ dɛɛ ä Ɔɔ jlǔ. Dɛǒ nɛ̀ ä mono! Dɛ kɔn tè dɛ kukǔ nyoǒ neěe kmɔ̌ wlòmo uǔ kme ämoo jebo nɛ̀ moo uǔ kme Nyesoa jebo.

² Ně mǒ noɛɛ nyopò ane, klě tǐà wlòmo ä moo Nyesoaa jlǔ plě Ɔ sěɛ ɛ pepě mǒ pe keǒ ä mɔ̀ ke tae ä miǎa nema, kɛɛ ä ji ɛle ɛ̈ moo bɛ̌ nu bo Tentǎn Jǔ Bɔ̌ tbaeǎ je, ä miǎ Ɔ jěba wòje tǔnʼǒ Ɔ neěe wlòmo, tèǒ nì kɔn tè ä miǎ Ɔ je wǒba.

³ Nyu wùɛ ɔ̈ kɔn ɛmoo wlò je kuuan taeǒ bɔ snǎě ɔɔ chɛ̀ mɔ̀le keǒ Tentǎn Jǔ nuu.

⁴ Nyu wùɛà nii kpni kukwǐ ɔ wlǎ Nyesoaa teteǎ. Mɛ̌oǒ joo nɛ̀ moo kpni kukwǐ moo Nyesoaa teteǎ wlawlǎ.

⁵ A ji ɛle ɛ̈ moo Tentǎn Jǔ diě keǒ Bɔ poo äa kpni kukwǐi tè wlò le plě a ji ɛle ɛ̈ moo Ɔɔ̌ nu kpni kukwǐ.

⁶ Tèǒ nì kɔn tè nyuà kɔnʼɔ tè wlò popoɛ klě Ɔ mǒ ɔɔ̌ ni kpni kukwǐ ke. Nyu wùɛà nii kpni kukwǐ ɔ sěɛ Tentǎn Jǔ jě plě ɔ se Ɔ jii chɛ̀.

⁷ Ně jlǔ ale, aǎ sonwɛǒ nyu wùɛ mɔ̀ mǒ ɔɔ̌ gbee a mǒ. Nyu wùɛà nii jebo siǐn dɛ ɔ moo jebo siǐn nyu wòje Tentǎn Jǔ.

⁸ Kɛɛ nyu wùɛ bɔ̈ nu dɛ kukǔ, ɔ sɔnʼě mǒ kǔ mɔ̀ ɔ̈ dǔaa dɛ kukǔ nunuɛ mǒ sɔɔnʼě ɛɛ wlò tùla mǒ. Dɛ kɔn tè Nyesoaa Jǔà Ɔ diěe nɛ̀ moo keǒ Bɔ sùe kǔu nunu konkwaǒ gbè.

⁹ Nyu wùɛà Nyesoa nu Ɔɔ jǔ mǒ ɔɔ̌ nu kpni kukwǐ. Mɛ̌oǒ joo nɛ̀ moo Nyesoaa Sùsu Nɛ̀ neě nyuǒ ja. È ke ɛ toon jleě mǒ bo Nyesoa moo ɔɔ Gbeǐ, ɔ slě wɔ̀ ɔ mǐ kpni kukwǐ nu.

¹⁰ Dɛǒ nɛ̀ ä jii ɛ nyopò monoo Nyesoaa jlǔ klee nyopò monoo kǔu jlǔ. Nyu wùɛà ɔ̈ɔ̌ nuu mǒ slɛɛ̌ dɛ, ɔ se Nyesoaa jǔ, dɛɛ doǒ nɛ̀ ɛ mono keǒ nyu wùɛ mɔ̀ ɔ̈ see nyopò tùu mǒ noɛɛ ne.

A Nonoɛɛ Měne

¹¹ Sɔɔnʼě ɛɛ wlò tùla mǒ a wɔ̌na winʼi doǒ lo ɛ̈ moo bä nonoɛɛ měne.

¹² Aa ka ɛɛ̌ wɛ̌ je Keèn ɔ̈ sɔna lěe kǔ mɔ̀ mǒ ɔ̈ pooa ɔɔ chɛ̀ɛ mamǔ jbɛju mnùngma mǒ. I be kɛě a mǒ wlò tè kɔn tè ɔ pooa ɔɔ mnùngma le? Ɛ mooa dɛ kukǔǒ ɔmo Keèn niaa ɛɛ tè, è ɔɔ mamǔ nɔ̀ nia mǒ slɛɛ̌ dɛ.

¹³ Ně bǐì Tentǎn Jǔu wǎn ane, bɛ̌ nu nyopòǒ neěe kmɔ̌ wlòmo bǔ faen amo, biǐ kɛɛn a wlò le.

¹⁴ Ä noɛɛ nyopò tùu mǒ no, ii tè ä ji ɛle ɛ̈ moo ä sɔnʼě kmɔ̌ sie kokoɛ̌ bobo mǒ no ä neě kmɔ̌ sie fònfno slè. Nyu wùɛà see nyopò tùu mǒ noɛɛ ne, ɔ neě jè lě kmɔ̌ sie kokoɛ̌ bobo.

¹⁵ Nyu wùɛà mii nyopò tùu faenma ɔ moo mnùngma poɔ, plě a ji ɛle ɛ̈ moo nyuà moo mnùngma poɔ ɔ se kmɔ̌ sie fònfno kɔn.

¹⁶ Dɛ ä jii lii mǒ noɛnoɛ nɛ̀ moo Tentǎn Jǔ koǒǒ äa tà. Tèǒ nì kɔn tè bä wɛ̀ mɔ̀le keǒ bä koǒǒ Tentǎn Jǔu wǎn tùu pènmo ke.

¹⁷ Bɛ̌ nu bo nyu bɔ̌ pàn plě bɔ̌ jě nyu tɔ̀ɔ ɔ̈ see dɛ kɔn, kɛɛ pònpan nyuǒ bɔ̌ se nyuǒ see dɛ kɔn wɔle je jbo keǒ bɔ sɛ̀ɛ ɔ mǒ, è ke ɔ wɔ̀le je bɔ nuǔ kɛ Nyesoa mǒ noɛnoɛ?

¹⁸ Ně jlǔ ale, äǎ nu wun sosǒ äǎ noɛɛ nyopò měne klee äǎ nu boɔboɔ win, kɛɛ äa nunu kmɔ̌ bɛ tee kàan mǒ noɛnoɛ ke.

¹⁹ Bɛ̌ nu bä nu ɛmo dɛǒ, è ä ji ɛle ɛ̈ moo ä kɔnʼě Nyesoaa kàan dɛ mɔ̀, è ä wɔ̀le je bä kɔn wlò je kunkuɛn keǒ Ɔ jemǒ.

²⁰ Bɛ̌ nu äa wlò bɛ̌ jɛɛ ä tè, ɛ̀ sɛ̀n nynɛ̌ Nyesoa Nɔ̀ kun Ɔ̈ sìnʼǒ ä mǒ plě Ɔ̈ ji noǎ wùɛ.

²¹ Ně mǒ noɛɛ nyopò ane, ke ɛ toon jleě mǒ bo äa wlògbai iǐ jɛɛ ämoo tè, ä kɔn wlò je kunkuɛn keǒ Ɔ jemǒ.

²² È dɛ wùɛ ä mi Ɔɔ sòaba ä mi ɛ jěba. Mɛ̌oǒ joo nɛ̀ moo ä tùiǒ Ɔɔ win bo plě ä ni dɛ blee Ɔɔ plɔ.

²³ Nyesoaa win Ɔ tmɛɛ̌ ämoo nì moo bä po Ɔɔ Jǔǒ Ɔɔ nynɛ̌ɛ tè kàan tè Ɔ̈ moo Tentǎn Jǔ Jùsu plě bä nonoɛɛ měne wòje keǒ Jùsu nu ämoo tmɔɔ̌a.

²⁴ Nyu wùɛà tùiǒo Nyesoaa teteǎ ɔ neeě Nyesoa mǒ plě Nyesoa neeě ɔ mǒ. Ke ä nu ɛɛ jijiɛ ɛ̈ moo Nyesoa neɔ ä mǒ no nɛ̀ moo Ngmà Je Ne Sùsuǒ Ɔ nye ämoo Nɛ̀ nu ɛ ä ji ɛ.