Zakariyya 4 - NABUWWA KEE MALIKWA

IFOYTA ELLE DAFFEYSAN CAXXA WACYIH UBLE

¹ Taaxige yo'lih yaabak suge malaykatti yol yemeeteeh, xiinit suge numih innal, ugussu yoo heeh,

² «Away tableemih tu maay lito?» yok iyye. «Dahabak bicsen caxxay faanus bagul akak haanahiyya ableh an» kaak exce. «Woo faanus elle haan caxxih amol malcina faanus yan. Kulli faanus malcina dubaalat edde haan arac le. Amol akak zeyti (saliid) edde yan sacni yan.

³ Faanus elle haan caxxak namma tattabat *daytuun xala cooxih nammay yan» exce.

⁴ Tohuk lakal malaykattuk, «Yi amoytaw, ahimik maqna macaay?» exce.

⁵ Malaykatti «Mataaxiga'nnaa?» yok iyye. Anu, «Yi amoytaw, maaxiga» kaak exce.

⁶ Too waqdi woo malaykatti Darabbabelih warsa'gidih, YALLI ruube farmo yol ruube. «Darabbabelow, abba hannaanim gabal kok bicele. Takkay immay toh, qeebit geytu waytam hinnaay, isi qandet geytu waytam hinna; anu koh acayu waa yi roocaaniyyak geytu waytaama. Toh intam yoo YALLAY Nabaamak Nabahiyya.

⁷ Qaleh innah kaxxaamay gibdaabina lehiyya kol xabbacooseyyo. Yi Qibaadah Qari atu xisetto. Qari xisnek gaba kaltuh ellecabô-xaa haytu wayta saaku, ummat anay fayya haak farcatah, ‹YALLIH maqaane a qaril tanay!› axcelon, 'yaanam kaak inxic» yok iyye.

⁸ Kaadu wohuk kalah YALLAK gersi farmo yol obte.

⁹ YALLI yok iyyeemih, «Darabbabel yi qarih xisneh rakiibo bicseeh; ahaysa gaba akak kalele. YALLAY Nabaamak Nabahiyya sin fanah yoo ruubem too saaku aaxigetton.

¹⁰ Taway fan aben qarih xisne qunxa intit maballina. Darabbabel xisne makot tanim kee ane waytam elle yaaxigen akat gabat luk yabloonu waan waqdi, ruffa axcelon» 'yaanam yok iyye. «A malcina faanus, Yallih malcina intiy a addunyal tikka tam edde yablehiyya» yok iyye.

¹¹ «Hay, woo *daytuun xalta namma caxay faanus elle haan caxxak namma tattabat tani macâ-caxaay?» exce.

¹² Qagseh exceemih, «Dahabak bicsen namma bombay caxâ xaylok bicsen *zeyti (saliid) elle caxitahiyyak tattabat tan xaylo xalta caxah namma luddi, maca namma luddaay?» kaak exce.

¹³ «Mataaxiga'nnaa?» yok iyye. «Aleeyyah maaxiga» kaak exce.

¹⁴ «Tamah, Yallay inkih yan baadak amoytah yanihiyya uskuttu heeh doore namma numuy kaa takdumu waytahiyya» iyye.