Yoosuwa 18 - NABUWWA KEE MALIKWA

ISRAAYILIK AKI KEDOODAH YECEEN BAAXO

¹ Baaxo qeebit yibbixeenik lakal, inkih tan Israayil ummat Siilo deqsitta magaalal gaaboowen. Tokkel Yallih Nabnah-Siraq soolisen.

² Israayil ummatak baaxo gee wayteemik uxih malcina kedo ten.

³ Yoosuwa Israayil marak iyyeemih, «YALLAY isin akak radden sin kaxxa abbobti doorehiyya siinih yecee baaxo bee'kkal annaak maay raqtan?

^4-6 Yuudah yooboke mari baaxok isi xexxar gabbi-qaxat raaqa rasul geeh yan. Yuusufuk rade mari kaadu isi xexxar kilbat le kabul raqta baaxol geeh yanik, isin baaxo uxih gee'kal tan malcina kedokuu, kulli kedo sidooca num doorru hayteh yi fanah siinik bahtay. Too mara ahak sarra yabbaxoonu waan baaxo fanah ruubeyyo. Elle gexoonu waan baaxol keenit bicta baaxo xexxar kee bagu kee elle tan innih, adda akak wagga heenih amaatelon. Malcina exxah kurra heenih yi fanah baahoonay. Tohuk lakal saami caxxa keenih elle qideyyooh; kulli numuh saami caxxal tewqe baaxo YALLI kaah faxe baaxo kinnim yaaxagay.

⁷ Leewih yooboke marah tu gactek, too mari sin lih baaxo mageyaay; oson baaxoh aftok taamah loonum, YALLIH seekah anuk YALLIH taamat gacaanama. Gaad kee Ruuben kee Manassek ayrô-mawqat raqta exxa isi xexxar baaxok geyteh. Too baaxo naharal elle Muusay YALLIH naqasuh yenehiyya keenih yeceeh suge baaxo kinni» 'yaanam iyye.

^8-9 Woo maray dooreenihiyya Yoosuwa fan yemeeteh. Too waqdi Yoosuwa keenik iyyeemihii, «Ama siinih niyaaten baaxoh addat gexam gexa. Baaxo elle tan inna uktubba haay yol baaha. Toh bahtan waqdi, baaxol saami caxxa siinih elle qida inna YALLA essereyyo» keenik iyye. Too mari gexeeh woo baaxo gexam gexak adda akak wagittaay malcina exxal kurra heenih yemeeten. Baaxok kulli exxat magaaloolik tanim uktubba heenih yemeeten. Tokkeek Siilo deqsitta magaalal yen ken ruube Yoosuwa fan yemeete.

¹⁰ Yoosuwa saami caxxal YALLI keenih loowe baaxo yable'gidih, saami caxxa qide. Tohuk lakal saami caxxal keenih tewqe baaxoo, baaxo geeh suge wayte kedoodah yecee.

BENYAM DEQSITTA KEDOH YECEEN BAAXO

¹¹ Yalli saami caxxal naharak yeyyeeqe baaxo akah tontocowwem, Benyam kedoh yooboke mara. Too mara gufte baaxo Yuuda kee Yuusufuk rade marih baaxok fanal ten.

¹² Kilbat le kabuk baaxok cuduud akak ugutam, Ordonuk teneeh; tokkeek kilbat le kabuk Yerikô-magaalak bacakkuh ayrô-culma le kabut tan baaxoy qaleela mangohiyyak gacca 'yah, Beet-Awen deqsitta magaalak xaquk tan bacarih tan baaxoh amma 'yaanam tikka 'ya rasi inkih kenim yekke.

¹³ Tokkeek cuduud keenik Luud deqsitta magaalay a saaku Beetal deqsittahiyyak gabbi-qaxal tan ullullu fan guffa haa. Tokkeek Qataarot-Addar deqsitta magaala fan gufa. Too magaala elle tanim, Guba-raqta-Beet-Coron deqsitta magaalak gabbi-qaxat raqta qaleh amo.

¹⁴ Tokkeek cuduud keenik gersi kaalib fanah yufkune. Tohumuu, ta qalek ayrô-culma le kabut raqta exxak gabbi-qaxa fan makka 'taah; tokkeek Kiryat-Baqal deqsitta magaalay a saaku Kiryat-Yaqaarim deqsittahiyya fan gexxa. Tohum Yuudâ-rasul geytimta magaala. Taham ayrô-culma le kabuk cuduud keenik edde yaadee ikkek ten.

¹⁵ Gabbi-qaxat raaqa cuduud keenik Kiryat-Yaqaarim deqsitta magaalak qimbisaah; tokkeek Neftowa deqsitta buyyitte fanah gufa.

¹⁶ Tokkeek cuduud keenik Refaayim Golo deqsitta golok kilbat le kabut raqta qaley Hinnom Golo akak amballayuk raqtahiyya fanah ooba. Tokkeek Hinnom Goloh addal gacca 'yeh Yarusalaam amot akak raqta qalel gabbi-qaxal tan ullulluk Qenrogel deqsita buyyi fanah yamaate.

¹⁷ Tokkeek cuduud keenik kilbat le kabul Qensemes deqsita arac fanah yamaate. Tokkeek Gallot deqsitta magaalay Adummim Daaba deqsita aracat foocah afkunuk raaqahiyya fanah yamaate. Tokkeek cuduud Bohan-Xaa deqsita xaa fan gufa. Bohan, Ruuben-baxaay; a xaa kay migaaqal muggaaqisen.

¹⁸ Tokkeek cuduud keenik Ordon weeqaytu akak ubulla haan koomaamik kilbat le kabuk gacca 'yah, Ordon daqaarih addal obba 'yah,

¹⁹ Beet-Cogla deqsita arac elle yan qalek kilbat le kabuk tabba 'yah, Rabe Bad deqsita badat Ordon weeqayti edde yaade ikke fanah gufa. Tohuu, gabbi-qaxak cuduud keenik gufah gide.

²⁰ Ordon keenik ayrô-mawqa le kabut raaqa. Benyam kedoh yeceenim too baaxooy; tohumuu, ken baaxoh cuduudut raqta.

²¹ Benyaamah yooboke marah magaalak yeceenim ah teeti: Yeriko kee Beet-Cogla kee Qemekkaxix kee

²² Beet-Qaraba kee Xamaraayim kee Beetal kee

²³ Qawwim kee Faara kee Qofra kee

²⁴ Kafar-Qammonay kee Qofni kee Gabaq deqsitta magaalooliy tittat taban kee nammay takkehiyya keenih yeceen. Too magaaloolih dariifal ten gaandoodi kaadu keenih yeceen.

²⁵ Tohuk kalah kaadu Gibqon kee Raama kee Beerot kee

²⁶ Mixfa kee Kafiira kee Mooxa kee

²⁷ Rekem kee Yirfeel kee Tarla kee

²⁸ Xelaq kee Eelef kee, Yaabus deqsitta magaalay sarra Yarusalaamal muggaaqiseenihiyya kee, Gibqa kee Kiryat-Yaqaarim akkuk ten. Too magaalooli tittat taban kee affara magaala akkuk ten. Tohuk kalah too magaaloolih dariifal tan gaandoodi kenim tekke. Benyaamah rade mari gee baaxo mangah too gide akkuk ten.