Yoosuwa 12 - NABUWWA KEE MALIKWA

MUUSA YEN SAAKU QEEBIT YIBBIXEN BAAXO

¹ Muusa yen saaku, Israayil mari Ordon weeqaytuk ayrô-mawqa le kabuk Arnon Golo deqsita arac kee Cermon deqsitta qale fanat tan baaxo qeebit yibbixen. Tonnal Ordon weeqaytuk ayrô-mawqa le kabut raqta baaxo ken baaxo tekke. Too baaxol suge namma malik yibbixen.

² A namma malikik, malikik teeni migaaqah Sicon deqsitak yeneeh; malikih elle yenem, Amoorâ-marih baaxok ten. Too malik dabaaqah elle yenem, Cesbon deqsitta magaalak ten. Gilqad rasuk garab kay xintoh yen. Tohumuu, Arnon Golo deqsita aracak arut tan Qarooqer deqsitta magaala kee woo goloh gudel tan gersi magaalak xabba haanamaay Yabbok weeqaytuy Qammon marih cuduuduh yanihiyya edde anuk tan baaxo gufak ten.

³ Cuduud kaak Ordon weeqaytuk Galiil badak xabba haanamaay gabbi-qaxak Rabe Bad deqsita bad fanah gufak yen. Tohuk kalah Rabe Bad deqsita badak ayrô-mawqa le kabut raqta baaxok Beet-Yasimot deqsitta magaala kee Fisgâ qale deqsitta qaleh fanal enna 'ta baaxo inkih kay baaxot raaqak ten.

⁴ Tonnah kaadu malik Qoog deqsita malikiy Qastarot kee Adraqi deqsitta namma magaalal dabaaqah yenehiyyak yeyseenih. Kay baaxo Basan deqsitak ten. A malikii, Rafaayim akak axcuk yenen marak saaboh raaqe numuk yen.

⁵ Too num malikih elle yenemii, inkih yan Basan rasuy Gasur kee Maqka deqsitta baaxooxah cuduuduh amma 'yaanam takke baaxo kee Cermon qale kee Salka deqsitta baaxok ten. Tohuk kalah Gilqad rasuk garab kayimik ten. Tohumuu Sicon deqsita malikiy Cesbon magaalal yenehiyyah baaxoh cuduuduh amma 'yaanam tan baaxo.

⁶ Ta namma malikik qeebil iissa 'teh baaxo keenik raaqissem, Muusa kee Israayil ummatak ten. YALLIH naqasuh yen Muusa a baaxo Ruuben kee Gaad deqsitta namma kedo kee, Manasse deqsitta kedok kaadu garab yakke marah keefeeh, ikoytah keenih yecee.

YOOSUWA YIBBIXE MALIKWA

⁷ Yoosuwa kee Israayil ummat kaadu Ordonuk ayrô-culma le kabut raqta baaxo yibbixen. Tohumuu, Baqal-Gaad magaalay Lubnaan Golol tanihiyyak xabba haanamaay Calak qaley Edom marih cuduudut xayuk raqtahiyyah amma 'yaanam tan baaxol, malikwah suggu 'ye mara inkih selli heen. Yoosuwa too baaxo Israayil marah kedo kedol kurra heeh, kulli way ikoytah takke'gidih keenih yecee.

⁸ Yoosuwa ta marah kure baaxotuu, qaleela le baaxo kee ayrô-culma le kabut raqta baaxoy koomaami mangohiyya kee, Ordon weeqaytu kee kay dariifal tan baaxoy koomaami mangohiyya kee, bacarih tan baaxoy ayrô-mawqa le kabut raqtahiyya kee, bakarroyti baaxoy gabbi qaxat raqtahiyya edde ten. Ta baaxol dabaaqah sugtem, Ciita kee Amooraay Kanqaan kee Feriidaay Ciiwi kee Yabuusah yooboke marak ten.

⁹ Israayil mari qeebit baaxo akak raaqisem: Yeriko deqsitta magaalal yen malik kee, Qaay deqsitta magaalay Beetal deqsitta magaalah xaqul yenehiyyal yen malikiiy,

¹⁰ Yarusalaam deqsitta magaalal yen malikiiy Cebron deqsitta magaalal yen malikiiy

¹¹ Yarmut deqsitta magaalal yen malikiiy Laakis deqsitta magaalal yen malikiiy

¹² Qeglon deqsitta magaalal yen malikiiy Geser deqsitta magaalal yen malikiiy

¹³ Dabiir deqsitta magaalal yen malikiiy Geder deqsitta magaalal yen malikiiy

¹⁴ Corma deqsitta magaalal yen malikiiy Qarad deqsitta magaalal yen malikiiy

¹⁵ Libna deqsitta magaalal yen malikiiy Qadullam deqsitta magaalal yen malikiiy

¹⁶ Makkeda deqsitta magaalal yen malikiiy Beetal deqsitta magaalal yen malikiiy

¹⁷ Taffuwac deqsitta magaalal yen malikiiy Ceefar deqsitta magaalal yen malikiiy

¹⁸ Afeek deqsitta magaalal yen malikiiy Lassaron deqsitta magaalal yen malikiiy

¹⁹ Madon deqsitta magaalal yen malikiiy Caxor deqsitta magaalal yen malikiiy

²⁰ Simron-Maron deqsitta magaalal yen malikiiy Aksaf deqsitta magaalal yen malikiiy

²¹ Taqnak deqsitta magaalal yen malikiiy Magiddo deqsitta magaalal yen malikiiy

²² Kedes deqsitta magaalal yen malikiiy, Karmel deqsita aracih xaqul tan magaalay migaaqah Yoknaqam deqsittahiyyal yen malikiiy,

²³ Door deqsitta magaalay baddi-afal tanil yen malikiiy, Galiil baaxol tan magaalay Goyim deqsittahiyyal yen malik kee,

²⁴ Tirxa deqsitta magaalal yen malik akkuk yenen. Tittat soddom kee inki malik akkuk yenen.