Yasaqya 4 - NABUWWA KEE MALIKWA

¹ Woh takku wayta ayro malcina barra inki numuk gaba xabba hayteh, «Maaqo kee sartanak ninni duudennooh, kot fanxam mannuk, baqala loonuh neh iyyaana'gidiiy qaybik cattinna'gidih nee abit» kaak axcelon.

QUSBA YARUSALAAMA

² YALLIH Luddi nabna kee qax-maqaane edde baahu waa wakti amaatele. Too wakti Israayil ummattay baaxô-bagul raqtehiyya, woo baaxol taabuku waytam yabloonu waan waqdi, ruffu axceloonuuh; nabna edde geelon.

³ Too wakti baatik saaboh raaqe maray Yarusalaamal yani, taahirik yan mara akkele. Too maray Yalli Yarusalaamal raaqaana'gidih doore, migooqa akak tunkuttube mara.

⁴ YALLI isi qandet ummattal mekleleeh; gira birta akah taahirroysa'nna ken taahirroysele. Yarusalaam-agbi le sakkik tan taamak keenik taahirroyseleeh; Yarusalaamal caxita qabalak tet kaqlisele.

⁵ Tohuk lakal YALLI, Siyon qale kee tet xaqul gaaboowe mari elle yani ikkel, laqo qamburre ruubeleeh, bar kaadu qer kee habug iyya ifu ruubele. Yallih nabna inkih tan magaala buuleleeh, umaanek tet waasele.

⁶ Kay nabna ayrok silaalo teetih akkele. Rob kee kaxxa caacayak reebu teetih akkele.