Yacedkel 48 - NABUWWA KEE MALIKWA

KEDOODAH HEEN CUDUUDU

¹ Baaxok afto geytuh migaq akak yunkuttube kedo ah teeti. Daan deqsitta kedoh yooboke mari, baaxok kilbat le qaxat raqta exxat isinni afto geelon. Too baaxoy keenih tantacawwu waytahiyya ah teeti. Cetlon deqsita magaalak xabba haanamaay Camat deqsita daabay gitah gacaanahiyyaay, tokkeek kaadu, Hadar-Qeenon deqsita aracay Damasko kee Hamat doolatih cuduudul geytimahiyyah amma 'yaanam tan baaxok, Daan deqsitta kedoh cuduuduh raaqele. Oson geyan exxa, baaxok ayrô-mawqak xabba haanamaay ayrô-culmah amma 'yaanam tan exxak tan.

² Aaser kaadu ayrô-mawqak xabba haanamaay ayrô-culmah amma 'yaanam Daan luk cuduuduk elle yangalen baaxo aallelon.

³ Naftaali kaadu ayrô-mawqak xabba haanamaay ayrô-culmah amma 'yaanam Aaser baaxo lih cuduuduh elle yan rasu haysitelon.

⁴ Manasse tonnah, ayrô-mawqak xabba haanamaay ayrô-culmah amma 'yaanam, Naftaali lih cuduuduh elle yangale baaxo aallele.

⁵ Efrayim tonnah, ayrô-mawqak xabba haanamaay ayrô-culmah amma 'yaanam, Manasse lih cuduuduh elle yangale baaxo haysitele.

⁶ Ruuben deqsitta kedo kaadu, ayrô-mawqak xabba haanamaay ayrô-culma fanah gufta baaxoy Efrayim cuduuduh elle yangaleenihiyya aallele.

⁷ Yuuda kaadu ayrô-mawqak xabba haanamaay ayrô-culmah amma 'yaanam takke baaxoy Ruuben cuduuduh elle yangaleenihiyya haysitele.

BAAXOK CUNDUBUL DESSOT YAN ARACAL

⁸ Rikeek heen baaxo kaadu ayrô-mawqak xabba haanamaay ayrô-culmah amma 'yaanam takke baaxoy Yuudâ cuduuduh elle yangaleenihiyya haysitelon. Tonnal xexxaarah kedoodah yeceen baaxoh gide akkele. Too baaxo kilbat le kabuk xabba haanamaay gabbi-qaxah amma 'yaanam, taban kee namma kiilomitri kee garab baguh akkele. Yallih Qibaadah Qari too rikeek heen baaxok gudel anele.

⁹ Ta baaxoy baxseenih yimittireenik fanal, xexxaarah taban kee namma kiilomitri kee garab takkeeh, baguh tabna kiilomitri takke baaxoy Yallih taamah deeseenihiyya anele.

¹⁰ Too taahirik yan aracay dessot gacu waahiyyak garab seekah antacawwele. Seekah yacoonu waanam, ayrô-mawqak xabba haanamaay ayrô-culmah amma 'yaanam takke baaxok taban kee namma kiilomitri kee garab takkeeh; kilbat le kabuk xabba haanamaay gabbi-qaxa le kabuk koona kiilomitri takke baaxo keenih aaxigelon. Ta aracak gudel Yallih Qibaadah-Qari xissiimele.

¹¹ Ta aracay taahirik yanihiyya akah yacoonu waanam, sek-Saadukuk radde seeka. Ta mari, gersi Leewih yooboke mari akah abe'nnah, Israayil mara lih gacca 'yeenih uma-taamat maasinnoonuy; yol imaan heeniih too imaanal digga axcuk yi taamat gacen.

¹² Tohih sabbatah, ta marah tantacawwu waytam, inkih yayse aracay kulli aracak taahiriinoh fula luk raaqahiyya. Too arac ken kee Leewih fanal cuduuduh yen aracak ten.

¹³ Gersi Leewih yooboke marah, seekak gabbi-qaxa raaqa aracak garil deesen baaxo keenih aaxigelon. Too arac ayrô-mawqak xabba haanamaay ayrô-culma fan taban kee namma kiilomitri kee garab yakkeeh; kilbat le qaxak xabba haanamaay gabbi-qaxa raqta baaxoh amma 'yaanam koona kiilomitri takke baaxo kinni.

¹⁴ Yallah deesen arac, kulli aracak inkih fula le arac yakkem faxxinta. Too aracak exxa kurra heenih aylamme kee, hinnay kaadu, gersi aracat milaaguh ecee (libaakise) yakkeenim inkinnah umaama. Faxe num nagrah loowite kee xayloh nagre yakke arac hinna. Ta arac dibuk Yallah rikeek baxsah deesen arac kinnuk, num tu edde mali.

¹⁵ A rikeek yan aracay deeseenihiyyak raqte baaxoh exxa, baguh taban kee namma kiilomitri kee garab xexxaarah yakkeeh, namma kiilomitri kee garab baguh yakke. Ta arac taahirik yan arac hinnay, ummatah caben araca. Ummat too aracal dabqih gactam duddaah; hinnay kaadu, saqi elle yaloole arooca akkele. Magaala ta arac gudel gactam faxxinta.

¹⁶ Ta magaala xissintu wayta waqdi affara gaco aalleleeh, kulli derfa xexxaarah namma alfi kee namma bool kee kontom mitri akkele.

¹⁷ Magaalak dariifal kulli gambik, bool kee labaatanna kee koona mitri baguh takke baaxoy foyyah cabeeni anele.

¹⁸ Ummatah caben aracak raqta exxa magaalah addal yan marah buqreh antacawwele. Too exxa magaala elle xissimta exxak ayrô-mawqa le kabuk koona kiilomitri xexxaarah takkeeh, namma kiilomitri kee garab baguh takkeeh; ayrô-culma le kabuk, tonnah kaadu, koona kiilomitri xexxaarah takkeeh, namma kiilomitri kee garab baguh takke.

¹⁹ Faxe kedohuuy yaabakay, a magaalah addal enna 'ya num, woo booxal buqre abbaasitu duudah.

²⁰ Tonnal, a aroocay deeseenihiyyak affara gaco aalleleeh, kulli dariifa xexxaarah taban kee namma kiilomitri kee garab akkele. Tohim taahirik tan exxa kee too magaala elle xissinte araca.

^21-22 Yallih Qibaadah Qari kee seekah yontocowwe arac kee Leewih yooboke marah yeceen baaxo kee, tonnah kaadu, magaala elle tan aracak, ayrô-mawqa kee ayrô-culma le kabut raqta exxa baaxoh-abbah im akkele. Kay baaxo deesen aroocak ayrô-mawqat raqta baaxoh cuduud fan gufeleeh; ayrô-culma le kabuk kaadu Maditraaniyah badah amma 'yaanam akkele. Tonnah kaadu, kilbat le kabuk Yuuda deqsitta kedoh yeexegen baaxot cuduuduh raaqeleeh, gabbi-qaxak kaadu Benyam deqsitta kedoh yeexegen baaxot cuduuduh raaqele.

RAQTE KEDOODAH HEEN CUDUUDU

²³ Tohuk kalih marah baaxo elle kuroonu waanam anna. Benyam ayrô-mawqaak ayrô-culma gufta baaxo geele.

²⁴ Simqaan tonnah, ayrô-mawqaak ayrô-culma gufta baaxoy Benyam lih cuduud tangalehiyya aallele.

²⁵ Issakar ayrô-mawqak xabba haanamaay ayrô-culmah amma 'yaanam takke baaxoy Simqaan baaxot cuduuduh raqta aallele.

²⁶ Dablon ayrô-mawqak xabba haanamaay ayrô-culmah amma 'yaanam takke baaxoy Issakar baaxot cuduuduh raqta aallele.

²⁷ Gaad kaadu ayrô-mawqak xabba haanamaay ayrô-culmah amma 'yaanam takke baaxoy Dablon baaxot cuduuduh raqta aallele.

²⁸ Gaadah yeceen baaxoy gabbi qaxat raqtahiyyak cuduud Tamaarik xabba haanamaay Kaadis-Mariiba deqsita illaltah amma 'yaanam takkeeh, tokkek Masri cuduudul yan daqar gexxa 'yam kee Maditraaniyah badah amma 'yaanam takke.

²⁹ YALLAY Mulki lehiyya iyyeemih, «Israayil marah ikoytah tantacawwu wayta baaxo elle kurruntu waytam tama'nna» iyye.

YARUSALAAM GASOH AFOOFI

^30-34 «Yarusalaam magaala akak culan afoofa taban kee nammay akkele. Affara *rukni akak xisen gasok kulli derfa xexxaarah namma alfi kee namma bool kee kontom mitri akkeleeh, kulli derfakaay sidooca culma aallele. Kulli culma, kedooy takkek tiya tiyal muggaaqiselon. Kilbat le kabut raqta afoofi Ruuben kee Yuuda kee Leewi muggaaqiselon. Ayrô-mawqa le kabut raqta afoofi Yuusuf kee Benyam kee Daan kedoodal muggaaqiselon. Gabbi-qaxat raqta afoofi kaadu Simqaan kee Issakar kee Dablon kedoodal muggaaqiselon. Ayrô-culma le kabut raqta afoofi Gaad kee Aaser kee Naftaali muggaaqiselon.

³⁵ Inkih tan magaalah gaso affara tattabak xexxaarah sagla alfih mitri akkele. Ta magaalah migaq tahak wadir ‹YALLI-akkel-yani› deqsitele» 'yaanam iyye Yalli.