Yacedkel 46 - NABUWWA KEE MALIKWA

ISRAAYIL MALIK KEE QIDDI MASSAKAXXA

¹ YALLAY Mulki lehiyya iyyeemih, «Adda le kabut raaqa daarat fanah akak culan afay ayrô-mawqa le kabut raqtahiyya, lica ayroy taama edde abaanahiyyat alifut sugtaama. Takkay immay Sabti-ayro kee alsi edde bila ayroy qiidih edde asaanahiyya fakkintay.

² Baaxoh abba afa le kabut raaqa daaratak gacca 'yeh, adda le kabut raaqa daaratih culma akak culan naharsi golik culla iyyeh, sarra culmal tan qamidwa le kabuuk solla iyyay. Too waqdi cado akak cararisan sadgat kee amaanah xiinaanamih astah baahe sadgat, sek kay aftok cararisaama. Sarrak too culmah garil dooqa abba heeh yawqeemi. Ayrô-mawqa le kabut raqta culma bari tikka 'yam fanah alfe woonay.

³ Kulli sabtii kee alsi elle bilinnaanimil, ummat inkih too culmak afal gommoh radak, YALLA yaqbudeenimi.

⁴ Sabti ayro Yallih sadgatah baaxoh abba hebeltoh ayma sinni saqak anaaqê-leceey kee maruw baahaama. Ta saqak cado inkih carrisaanama.

⁵ Maruw lih sadgatah darok sagla kiilo baahaama. Anaaqe lih isih faxxa heeh gide baahay. Tonnah yan sadgatay daro akah baahaanahiyya aba saaku, daroy sadgatah baahahiyyak kulli sagla kiilol, caxâ xaylok bicsen *zeytik (saliidik) sidiica litri takkem lih baahaama.

⁶ Alsi bila saakih qiidih, dahaltu kee anaaqê-laceey kee maruw baahaama. Ta saqi hebeltoh ayma alle waama.

⁷ Dahaltu kee maruw lih darok sagla kiilo baahaama. Kulli anaqtu lih darok isih faxinnaanih gide baahaama. Darok sagla kiilo yaceen waqdi, caxâ xaylok bicsen *zeytik daro lih sidiica litri yacoonay.

⁸ Baaxoh abba tahak inkih gaba kalla haa waqdi, akak cule afaak gacca 'yeh yawqay.

⁹ «Ummat Yallih qibaadah qiddi saaku Qibaadâ-Qari tamaate waqdi, too dooqak gaba kalla haan waqdi, kilbat le kabuk cule mari gabbi-qaxat af cabta afak yawqay. Gabbi qaxak cule mari kilbat le kabut af cabta afak yawqay. Akak culen afak awqe woonay, foocat tan afak yawqoonay.

¹⁰ Baaxoh abba ummat culta waqdi culay. Ummat tawqe waqdi yawqay.

¹¹ Sadgat aban saaku kee qiddi saaku, kulli dahaltu kee maruw lih darok sadgatah yacoonu waanam sagla kiilo. Tonnah kaadu, qibaadah yemeete num anaqtu lih darok isih faxinnaanih gide baahaama. Darok sagla kiilo lih caxâ xaylok bicsen *zeytik sidooca litri baahoonay.

¹² «Baaxoh abba isi fayxiik YALLAH sadgat abam faxeeh; too sadgatah cado akak carrisan saq akki kee, hinnay kaadu, amaanah xiinaanamih astah aban sadgat abe kaa tekkek, ayrô-mawqa le kabut raqta afa kaah fakoonay. Sadgat too Sabti ayro akah abba haa innah abaama. Usuk gexxa 'ya way too afa alfoonay» iyye.

KULLI AYRO XAYYOYSAN SADGATA

¹³ YALLI kaadu iyyeemih, «Kulli maaca, sanatat yan maruwuy hebeltoh ayma sinnihiyya Yallih sadgatah qidoonay. Too maruwuk cado carrisoonay. Ta sadgat kulli ayro yakkay.

¹⁴ Tonnah kaadu burrik namma kiilo takkem, caxâ xaylok bicsen *zeytik (saliidik) inki litrit esgelli heenih, sadgatah kulli ayro baahoonay. Taham sadgatah baahinnaan waqdi xintoh raaqele.

¹⁵ Kulli saaku maruwuy cado akak carrisaanahiyya kee burriiy caxâ xaylok bicsen *zeyti Yallih sadgatah baahaanamaay, ta sadgat way cabe waanama» iyye.

MALIK KEE USUK IKOYTIINUH LE BAAXO

¹⁶ YALLAY Mulki lehiyya kaadu iyyeemih, «Abbah yan num isi baaxok tu takkem kurra heeh isi baxah ikoytah yecee kaa tekkek, too baaxo too baxihim akkele.

¹⁷ Takkay immay isih taamitah yan marak numuk teenah isi baaxo kurra heeh yecee kaa tekkek, too baaxo too akah yecee num ‹Farcat sanatay xaamen baaxo edde gacsaanahiyya› deqsita sanatak wadir, baaxoh abbah gacsaama. Too sanatak sarra baaxoh-abbah-ikoyta akkeleeh; kay baaxo nagartu duddam, dibuk kay xaylo.

¹⁸ Baaxoh-abba ummat-baaxo ummatak bee waama. Ken baaxok ken xiiriye waama. Isi xayloh baaxo yeceem faxek, isi baaxok yeceemi. Yi marat xukkute waama» iyye.

SADGAT ELLE BICSAN GOLI

¹⁹ Tokkeek woo num kilbat le kabut raqta golitteh culma fanah yoo baahe. Tohum, adda le kabut raaqa daaratak gabbi-qaxat tan culmah garit raqta golitte. Taham seekâ-golittey taahirik tanihiyyak ten. Too golittek ayrô-culma le kabut raaqa arac yoh yescesse.

²⁰ Too waqdi iyyeemih, «Seeka dambi-kalootuh-baahen-saqih-cado kee edde-asen-qellatih-cakkih-baahan-saqih-cado sadgatah elle alaysaanam, tama araca. Bululuy sadgatah baahaanahiyyah gaqamboyta elle alaysaanam, too araca. Yallih Qibaadah Qarik afa le kabut raaqa daaratay sinam elle tanihiyya mayayyaaqan. Toh akah kinnim, too sadgatay taahirik yani afah yeyyeeqen ken tekkek, ummat biyaakam takkeh 'yaanama» iyye.

^21-22 Tohuk lakal afa le kabut raaqa daarat fanah yoo beeh, too daaratak affara *ruknik kulli *ruknitiiy inki daaratay qunxahiyya yen. Too daarat-baxi xexxaarah labaatanna mitri akkuk yeneeh, baguh taban kee koona mitri akkuk yen.

²³ Kulli daaratat gaso maroh ten. Tonnah kaadu gira elle urusan arac woo gasot xakabuh yen.

²⁴ Woo num yok iyyeemih, «Amaham, Qibaadâ-Qarih addal Yallih taamat yan marah, ummat sadgatah bahta saqih cado elle alaysan araca» iyye.