Yacedkel 42 - NABUWWA KEE MALIKWA

QIBAADÂ-QARIL XAYI QARWA

¹ Sarrak amittiruk suge num afa le kabu raaqa daarat fanah yoo beeh; wokkeek Yallih Qibaadah Qarik kilbat le kabut raaqa qari fanah yoo bee. Too qari Qibaadâ-Qarik ayrô-culma le kabut raaqa qarit xeeruk mananna.

² Too qari xexxaarah kontom mitrik yeneeh, labaatanna kee koona mitri baguh akkuk yen.

³ Kabuk teenak tu elle xissiime wayta arac yen. Too arac Qibaadâ-Qari gexxa 'yam xexxaarah akkuk yen. Tabna mitri baguh akkuk yen. Kabuk teenak kaadu qalumuk xisen daaratat af cabak yen. Qari akak xissiimem sidiica rankok ten. Kulli rankoy daga raqtahiyya guba raqta rankok qunxuk raaqak ten.

⁴ A qarik kilbat le kabuk gitah gacan arac yen. Too arac koona mitri baguh akkuk yen. Kontom mitri xexxaarah akkuk yen. Akak culan afa kilbat le kabut raaqak ten.

⁵ Woo qarik fayya le caddot raqta aroocal xisen golitte, gubak fanti golitte kee rammat raqta golittek qunxuk ten. Toh akah kinnim, xissinte waqdi gitah elle gacan arac ken foocal yen.

⁶ Woo golittey sidiica rankok xissintehiyya elle xissintem barandak ten. Qamiddul rakuh mananna. Aki qarway daaratal tenehiyya gubak qamiddul xissinteh ten.

⁷ Qarik irô-kabu xexxaarah labaatanna kee koona mitri tikka 'ye gidaar yen. Too gidaar golittek fooca le kabut yen.

⁸ Macaay inteenik, Qibaadâ-Qarik fooca le kabut ten golitte xexxaarah kontom mitri tekke'mmay, afa le kabu raaqa daaratak fooca le kabut ten golitte xexxaarah labaatanna kee koona mitri akkuk ten.

⁹ Ayrô mawqa le kabut raaqa daaratak too golitte fan culaana'gidih, gitah gacan arac kee albaab yen.

¹⁰ Qibaadâ-Qarik gabbi-qaxat too qari ceela qari yen. Too qari kaadu ayrô-culma le kabuk Qibaadâ-Qari edde yaade aracal yen qarik xeeruk mananna.

¹¹ Golittek foocat hununuh kilbat le kabut raqta qarwah gurral yan aracay akak gacaanahiyya yen. Qarik golitte xexxar kee bagu kee elle xisen gurraay akak culan afoofi inkih, kilbat le kabut raqta golitte ceelak ten.

¹² Tonnal, ayrô-mawqa le kabuk gidaar akak qimbisa ikkek, gabbi-qaxat xissinte golittek gubat culma ten.

¹³ Too num yok iyyeemih, «Tama namma qari, taahirik yan namma qari» yok iyye. «Yallih Qibaadah Qari culta seeka kaxxam taahirik tan maaqo elle yakmeenim, tama araca. YALLIH garil taahirik tan maaqok daroy-sadgatah-baahaanahiyya kee, dambi-kalootuh baahan-sadgat kee, edde-asen-qellatih-cakkih-baahan-sadgat elle haanam tokke» iyye.

¹⁴ «Seeka tama qarik afah tawqe waqdi, Yallih taama edde abak sugen saray xagaral loonuhiyya eyyeqqa heenih, ta'kkel cabba heenik lakal, yawqen. Woh akah abaanam, a arac taahirik yan arac tekkek sah aban. Wohuk raqqa 'ye marih arooca gexan waqdi, isinni sarat gaceenih gexan» iyye.

QIBAADÂ-QARI ELLE XISEN ARACIH CADDO

¹⁵ Qibaadâ-Qarih daaratal ten qarwa xexxar kee baguh takkeh gide yoo yuybullek lakal, ayrô-mawqa le kabuk raqta afak yoo yeyyeeqe. Woo qarik iro tan aroocay qarwa elle deedaltahiyya nabnah takkeh gide yimittire.

¹⁶ Ayrô-mawqa le kabi namma bool kee kontom mitrih gide yakkem, caxxah ascassuk yoo yuybulle.

¹⁷ Kilbat le kabu raqta exxa kaadu tonnah, namma bool kee kontom mitri xexxaarah akkuk ten.

¹⁸ Gabbi-qaxat raqta exxa kaadu, namma bool kee kontom mitri xexxaarah akkuk ten.

¹⁹ Ayrô-culma le kabut raqta exxa kaadu tonnah, namma bool kee kontom mitri akkuk ten.

²⁰ Tonnal affara kaalibik yakkeh gide yoo yuybulle. Dariifat gaso akak ten. Too gasoosa baguh namma bool kee kontom mitri akkuk teneeh, xexxaarah kaadu namma bool kee kontom mitri akkuk ten. Too gasoosa, taahirih tan arooca kee ane sinni aroocak fanal ten.