Yacedkel 41 - NABUWWA KEE MALIKWA

¹ Wohuk gaba kale waqdi, gudel raaqa goli fanah yoo bee. Tohuu, Taahirik Yan Aracak ten. Too arac fan beya gita yimittire. Too arac xexxaarah sidooca mitri yekkeeh,

² baguh koona mitri yekke. Gura kee migdat kaak tan gidaarwak kulli gidaar, masuh sidooca mitri kee garab akkuk yen. Woo golik xexxar labaatanni mitri akkuk yeneeh, baguh tabna mitri akkuk yen.

³ Tohuk lakal Qibaadâ-Qarik iqiyal yan goli cule. Wokke fanah gexan waqdi, gitah akah gacan arac yimittire. Too arac xexxaarah inki mitri yekkeeh, baguh sidooca mitri yekke. A kabu kee woo kabut kaak tan gidaarwak kulli gidaaraay, masuh sidooca mitri kee garab yekke.

⁴ Iqiyat yan goli yakkeh gide affara kaalib yimittire waqdi, tabna mitri yekke. Ta goli woo fanti golik aki-qaxat raaqak yen. Sarrak yok iyyeemih, «Aham Kulliimik-Taahiriinoh-Yayse-Goli» iyye.

QIBAADÂ-QARIH DERAAFIL XISEN GOLITTE

⁵ Sarrak kaadu Yallih Qibaadah Qarik adda le kabu raaqa gidaar masuh yakkeh gide yimittire waqdi sidooca mitri yekke. Too gidaarak bagut Qibaadâ-Qari gexxa 'yam qunxa qarwâ-xaylo teneeh; too qarwa baguh namma mitri akkuk ten.

⁶ Ta qarwa, sidooca qari fanah tittak amol xisen qarwak ten. Daga raqta qarwa mangah soddom tekke. Fanti qarwa kaadu soddom qari tekke. Kulliimik guba raqta qarwa, tonnah kaadu, soddom qari tekke. Qibaadâ-Qarih gidaar boohaysaanam faxxiime waak teneemih sabbatah, ta qarwa soolisaana'gidih raku akah heen.

⁷ Qibaadâ-Qarih gidaarwa afak yablen waqdi, guba raaqa qarik xabba haanamaay amol raaqa qarih amma 'yaanam, masuh inki gide takkem ceelak ten. Mawqeenal woo guba raaqa qariik amo raaqa qari fanah awqe kee, hinnay kaadu, gudet raaqa qari fanah awqe yakkeenim sahalih ten.

^8-11 A qarwak irô-kabut raqta gidaarwa, masuh namma mitri kee garab akkuk ten. A qarwa culaana'gidih, kilbat le kabul inki afa teneeh; afak teena kaadu gabbi-qaxal ten. Qibaadâ-Qarik afal, baguh namma mitri kee garab takke baranda ten. Woo baranda ardik sidooca mitri fayya axcuk teneeh; woo Qibaadah-Qarik xaqut tan qarwa fayyah misoowak ten. Seeka elle bicsitta'gidih heen qarwa kee a barandak fanal, Qibaadâ-Qari gexxa 'yam yakke arac yen. Too arac a exxak woo exxa fanah, xexxaarah tabna mitri akkuk yen.

AYRÔ-CULMAL YAN QARI

¹² Qibaadâ-Qarik ayrô-culma le kabut tu elle xise ween aracak ten. Too arac edde yaade ikkel qari yen. Too qari morootom kee koona mitri xexxaarah akkuk yeneeh, bagbaggi akak soddom kee koona mitri akkuk ten. Gidaarwa kaak namma mitri kee garab masuh akkuk ten.

QIBAADÂ-QARIH MAFKAN ELLE YAN INNA

¹³ Qibaadâ-Qari yimittire waqdi, kontom mitri tekke. Qibaadâ-Qarik darre le kabut raqta xisnek xabba haanamaay tu elle xise ween aracay foyyah yanii kee ellecabot raaqa qari xexxaarah sittat, kontom mitri akkuk yen.

¹⁴ Qibaadâ-Qarik foocat raaqa arac kee, Qibaadâ-Qarik namma tattabat yan foyyah yan arac kaadu xexxaarah sittat kontom mitrik yen.

¹⁵ Ayrô-culma le kabul yan qari-xexxaarah yakkeh gide kee, akak namma tattabak ten baranda xexxaarah takkeh gide tittal bahha haan waqdi, kontom mitri akkuk ten. Qibaadâ-Qarih adda akak culan naharsi goliiy, Taahirik-yan-Arac kee Qibaadâ-Qarik iqiyal yan Kulliimik-Taahiriinoh-Yayse-Goli inkih,

QIBAADÂ-QARIH MAYBALAALAQA

¹⁶ qari-baaxak taagoota fan inkih, bagu akak cooxut exfeenih yenen. A taagoota reebut ten.

¹⁷ Too cooxuy too aroocak culmah afak amô-ginat raaqa aracah amma 'yaanamat exfeenih yanihiyya inkih, oren cooxuk bicsen taswir bilqiseenih yenen.

¹⁸ Tohum nakli-tasaawir kee galwa-leemih tasaawirik ten. Too ceeloy galwa lehiyya kee nakli-tasaawir tiiy tii lakal haak, inkih yan qarik adda duuduseenih yenen. Galwa le ceelok kulli tii namma fooca luk yen.

¹⁹ Too foocak tiyak teenay sahdayti fooca ceelahiyya nakliitâ-taswiir fanah afkunuk yen. Aki foocay lubak fooca ceelahiyya kaadu gersi kabuk tan nakliita fanah afkunuk yen.

²⁰ Qari-baaxak xabba haanamaay qari afak amoh amma 'yaanam inkih tonnal ten.

²¹ Qibaadâ-Qarih akak culan afa fayya kee baguh inki gidel bicseenih yeneeniih; woo affara *rukni inkih inki gide akkuk yen. Kulliimik-Taahiriinoh-Yayse-Goli akak culan afak, sadgat elle aban aracih gurral bicseenih inna lem ten.

COOXUK BICSEN SADGAT ARACA

²² Tohum xexxaarah, mitri kee garab akkuk teneeh, mitri baguh akkuk ten. Woo *rukni qekuh elle yan gambi kee rakiibo inkih akak bicseenim cooxuk ten. Too num sarrak, «Aham YALLIH foocal yan miizi» yok iyye.

AFOOFI

²³ Taahirik yan Arac kee Kulliimik-Taahiriinoh-Yayse-Goli inkih, namma alfeena le albaab luk yen.

²⁴ Too albaabwa fakan waqdi, xambaqinta fakeyna luk yen.

²⁵ Woo gidaarwak bagul akah tan gurrah, Qibaadâ-Qarih afoofil kaadu nakli kee galwa leemih ceelo tasaawirih ten. Akak culan naharsi golih afak iro raqta afak daga le kabut, qunxa aracay qari afal silal qidahiyya yeneeh; too arac akak bicseenim cooxuk ten.

²⁶ A qarik tattabat taagoota ten. Gidaar akak nakli-tasaawirit bilqiseenih yenen. Qibaadâ-Qarih golitte tonnah too tasaawirit bilqiseenih yenen.