Yacedkel 3 - NABUWWA KEE MALIKWA

¹ Yalli, «Bani-adantow, a arab unxuqaay gexay Israayil ummatah waris» yok iyye.

² Af fake waqdi, xambabbaqut yan arab afat yok qideeh;

³ too waqdi, «Tama arabay koh acee unxuqaay, bagu isik edde kib» yok iyye. Too arabay xambabbaqut yani okmeeh; okme waqdi, malab xaqamu yot yelle.

⁴ Sarrak yok iyyeemih, «Bani-adantow, taway gexay; anu kok inxicci axcem Israayil marah waris.

⁵ Koo akah ruubam, marin maray af akak aaxige wayta hinnay, ku marih adda.

⁶ Marin maray af akak aaxige waytahiyyah adda koo ruubaamal, kok oggolak yenen.

⁷ Takkay immay Israayil mari koo hinna'mmay, yi yab yaabbe mara hinnon. Moyyat yab keenik maradaay, afqado gibdi mara kinnoonu'mmay,

⁸ keenik kaxxih yab aabbe waah, afqado gibdi num koo abeyyo.

⁹ Gibdah xixxaq innah koo heeyyooh, qandeh qadoo-xaahi innah koo heeyyo'mmay, ama yabti-cina-leelak mameysitin» yok iyye.

¹⁰ Yalli qagseh yok iyyeemih, «Bani-adantow, ko'lih yaaba yab nagay cubbusay raq.

¹¹ Ku baaxoh maray seewah beenihiyya fan gexay; kok aabbe kee wee yakkeeni'mmay, yoo YALLAY Mulki le keenik axceh anim keenih waris» yok iyye.

¹² Tohuk gaba kale waqdi, Yallih Roocaaniyya ukkuqqa yoo hayteh yoo beyteeh; too waqdi darre le kabuk, «Yalli elle yan qaraanal, nabna kaak kulsa le; kaa faylisa» inta xongolo oobbe.

¹³ Tonnah kaadu taaxige rooci-leemih galwa qaran bagul tittat abtah tan booduk radda xongoloh anay kee, taaxige koramkorak gexxa ibittek raddah tan xongoloy baaxoh angoyyi anay lehiyya oobbe.

¹⁴ YALLIH qande maqar luk xagarat yok culte. Yallih Roocaaniyya yoo tukkuqe waqdi, tu'naqabu kee bagcarra xagarat yok culte.

¹⁵ Too waqdi Tel-Abib deqsitta qunxa magaala-baxay Kabar deqsita weeqaytuk garit tanihiyya fan emeete. Israayil maray seewah beenihiyya elle yanim, tokkek ten. Tokke emeete waqdi, inni intih ublem kee aytih oobbeemih sabbatah, cisabboowak malcina ayro elle daffee.

YALLI YACEDKELIH YECEE TAAMA

¹⁶ Woo malcina ayrok lakal YALLIH qangara yol obteeh; yok iyyeemih:

¹⁷ «Bani-adantow, kok axceemih, Israayil marat dacayri hayu waam koo. Anu kok excem keenih warisaay, garci keenih kal.

¹⁸ Tonna'mmay umeenah yan num abeh yan uma taamak gexxaamah, edde rabu waa wakti kaat xayim koh warissa heeh; woo num rabak cattiima'gidih, ‹A edde tan uma taama cab› 'yaanam kaak axce wayya hayteh; too num too abak suggu 'ye dambih rabeeh, woo dambi xagarat luk rabelek, tonnal kay raba kok weeyyo.

¹⁹ Tonna hinna'mmay a numuk, ‹Dambik toobita› 'yaanam naharal kaah warissek, sarra woo dambik aduure wayya heeh woo dambih rabek, isi dambih rabem deqsiteleeh; kok waak raaqu waam mayyu.

²⁰ «Yalli kicna taamah abittot suge num, fanaak uma-taama abam baahe kaa tekkeeh, anu kaadu umam kaal bahha heeh, a numuk, ‹Maabinay uduur› 'yaanam axce waytek, isi qamalah rabeleeh; duma abba hee maqaane kaah maloowinta. Tonna-leemiik too numih raba kok weeyyo.

²¹ Yalli kicna taama abak suge meqe-qamal-le-num dambit asaamak fayu kaah teceeh, atu kaah tecee fayu oggolla heeh dambik yexxeerek, too num rabak cattiimah. Kooy kaadu woo numih raba akak wee raarehiyyak mawaa» yok iyye.

YACEDKEL DUUDA YEKKE

²² Tohuk lakal YALLIH qande yol gacah uble. Lakal, «Ugutay golo fanah gex. Wokkel kaadu ko'lih yaabam faxam liyok» yok iyye.

²³ Too waqdi golo fan oobe. Tokkel duma Kabar deqsita weeqaytih garil an waqdi elle uble'nnal, YALLIH nabna yoh tumbulle. Too waqdi baaxol gomboh rade.

²⁴ Takkay immay Yallih *Roocaaniyya xagarat yok gacteeh; edde soola qande yot hayte. YALLI yok iyyeemih, «Buxah gexay qari isit alif.

²⁵ Tokkel bani-adantow, akattat anxaawimettooh, afah tawaqu madudda.

²⁶ A yabti-cina le marak, ‹Maabinay uduura› axcuk fayu keenih akah ecee wayta'nnah, yab koo waysiiseyyo.

²⁷ Sarrak akah sugte'nnah af geytu wayta waqdi, yoo YALLAY Mulki lehiyya ko'lih yaabeyyooh, anu kok inxicca axcem keenik axcetto. Marak garab yab kok aabbeleeh; marak garab yab yaabbe mara hinnaay, ken lih yabta yab kanah kok mahaysitan» yok iyye.