Qedra 6 - NABUWWA KEE MALIKWA

MALIK KOORIS AMRISEH CABE YAB GEYTIMEH

¹ Tohuk lakal inkih tan baaxok malikih yen Daryawes, «Baabelon rasul malik kutbeh buxal duma tekkem elle yuktuben kitooba tanik wagita» 'yaanam iyyeh amri yecee.

² Too goran yekkeeh; sarrak Meediya deqsita rakaakayal geytinta Acmata deqsitta inaytâ-magaalal, yuktuben arabay xambaqut yani geen. Too arabih bagul kutbeh tenemiiy ahak ten:

³ «Malik Kooris malik edde yekke sanatat amri yeceeh iyyeemih: Yarusalaamal yan Yallih Qibaadah-Qariy yiddigillehiyya sadgatah saq elle qidaana'gidih, nammeyhaak xisaanama. Too qarih rakiibo haanama. Yallih Qibaadah-Qari xisan waqdi fayyah lactam cusul kaa abaanama. Baguh kaadu lactam cusulih gide kaa abaanama.

⁴ Gidaar akah xisaana'gidih naba xeetiy affara ruknik yanihiyyak sidooca xisne xisaanama. Sarra fanat inki xisneh gide cooxuk xisaanama. Tohuk lakal kaadu sidooca xisneh gide xeetik xisak, sarrak kaadu, gudet inki adda cooxuk xisak, gaba kalla haanam fanah too gurral xisaanama. Ta xisneh faxximma 'tam malik-makdanak yacoonay.

⁵ Duma Malik Nabkadnessar Yallih Qibaadah-Qarik Baabelon fan beeh suge dahab kee lakqok bicsen mingilwa Yarusalaamal yan Yallih Qibaadah-Qarih duma elle sugte'kkel gacsaanama» 'yaanam kutbeh elle sugte.

MALIK DARYAWES «XISNE GUTUQA» IYYE

⁶ Malik Daryawes tah yoobbe waqdi, yuktube warkat ruube. Too warkatal iyyeemih, «Furaat Weeqaytuk Ayrô-culma le kabut Raaqa Rakaakayih abbah yan Tattanay kee Satar-Bodnay kee, Furaat weeqaytuk Ayrô-culma le kabut Raaqa Rakaakayal doolat taamat sin lih yan marak inkih, siinih ruuba farmol siinik axceemih, ‹Yallih Qibaadah-Qaril maxayyoowina.

⁷ Yallih Qibaadah-Qarih caagidit feera mahana. Yahuud-xintoh abba kee Yahuud-marih-idoola Yallih Qibaadah-Qari duma elle suge aracal xisoonay.

⁸ Oson too qari xisan waqdi, ken elle cattaanam siinil tan. Taama keenik gaba kalla haytam fanah, fanat akah aade wayta innah, taamita marah Furaat Weeqaytuk Ayrô-culma le kabut Raaqa Rakaakayak doolat gabbarah beyta lakqo dudda luk, waqlal elle ucuya.

⁹ Kulli ayro Yarusalaamal tan seekah faxxa hannaanim keenih ucuya. Qaraanal yan Yallih migaaqal sadgatay cado akak carrisaanahiyyah dahaltu akkiiy, marwa akkiiy, anaaqe akki taceenim siinil tan. Toh lih kaadu kamadi akkiiy, qasbo akkiiy, tonnah kaadu, qinabak bicsen kamri kee caxâ xaylok bicsan zeyti (saliid) too sadgatah taceenim siinil tan.

¹⁰ Toh siinik akah axcem, ta sadgat aban waqdi qaraanal yan Yalli ruffa axcuk a sadgat oggola'gidiiy, yoo kee yi xaylot barkat haa'gidih, seeka dooqa abta'gidih axce.

¹¹ « ‹Tah cina num yenek, qari kaak iggillaay, caxxay kay qarik yiggileenihiyya mudeeni gurral af bahsissa heenih, kaa edde mudaanama. Qari kaak guddaafa elle haan arac abaanama.

¹² A amri cinaah Yallih Qibaadah-Qari yaggilem faxa malik yenek, doolat tenek, too malik kee too doolat Yallay Yarusalaam isi elle yaqbuden aracah doorehiyya ken bayisay. Ta amri teceem, yoo Daryawesi. Tama warkat inxicca 'tam inkih xayih duudussaanama›» 'yaanam elle tan warkat yuktubeh keenih ruube.

YALLIH QARIH ADDAL QIBAADA QIMBISEN

¹³ Too warkat ken gufe saaku, baaxoh abbah yen Tattanay kee Satar-Bodnay kee ken waday hununuh malik keenik aba elle iyye'nnal aben.

¹⁴ Nabi Caggay kee Qiddó-Zakariyya ken aydikumusak, Yahuud marih idoola kaadu is le kabuk, Yallih Qibaadah-Qarih xisnet tisissikeeh, meqe'nnal taamitak xisen. Israayil doore Dagelti elle amrissa hee innal, tonnah kaadu, Fursi deqsita rasuk malikwah ten Kooris kee Daryawes kee Artacsasta deqsitta malikwa keenik elle inxicca 'yen innal, Israayil doore Dageltah-qari xiseenih, gaba kalen.

¹⁵ Yallih Qibaadah-Qarih xisnek, Daryawes deqsita malik edde dardaare laceyhaytô sanatak Adar deqsita alsak sidochaytoh ayrot gaba kalen.

¹⁶ Tohuk lakal seeka kee Leewih yooboke mara kee, wohuk kalah tan Israayil-ummattay marin baaxoy elle sugtehiyyak tuduurehiyya kaxxam ruffu 'yeenih; too ayro Qibaadah-Qari Yallih taamah taahirroyseenimih farcatah asen.

¹⁷ Too ayro awurwak bool takkem qideeniih, illik namma boolih maruw kee, anaaqek kaadu affara bool sadgatah yusguuden. Tonnah kaadu wadarak taban kee namma dabeela dambi kalootuh yusguuden. Too taban kee namma dabeela taban kee nammay takke Israayil kedoh migaaqal dambi kalootuh sadgatah yusguuden.

¹⁸ Muusal oobe kitab elle inxicca iyya'nnal, seeka kee Leewih yooboke mara, butta-buttah hayya heenih Yarusalaamal Yallih Qibaadah-Qarit aboonu waan taama keenih warsen.

ELLE-TATRIYYI-QIIDIT ASEN

¹⁹ Elle sugen marin baaxok yemeete mari, ciggiila sanatak inikhaytoh alsak taban kee fereyhaytoh ayro Elle-Tatriyyi-Qiidih asen.

²⁰ Too ayro seeka kee Leewih yooboke mari inkih taahirik gacca 'yeh ase. Leewih yooboke mari Elle-Tatriyyi-Qiidih, marin baaxok amma 'ye mara kee toobokoh keenik tan seeka kee isinni migaaqal, maraaqe sadgatah yusguuden.

²¹ Israayil maray marin baaxok yuduure kee, baaxol elle suge maray cuggaaneh keenik yan mari abah yan taahirik ane sinni taamak yexxeereh sugehiyya inkih woo maaqo yokme. Too mari, YALLAY Israayil doore Dagelta kinnihiyya yaqbude'gidih, cuggaaneh keenik yan mari aba taamak yexxeereenih sugen.

²² Malcina ayroh Kamiir-Sinni-Gaqamboh Qiidih farcatah sugen. Assuuriyah malik oson faxaanam aba num YALLI kaa abeeh, Yallay Israayil doore Dagelta kinnih Qariy yiddigilleh sugehiyya nammeyhaak xisaana'gidih cato keenih yekkeemih sabbatah, kaxxam ruffu iyyen.