Qedra 5 - NABUWWA KEE MALIKWA

YALLIH QIBAADAH QARIH TAAMAT QAGTEN

¹ Too dabaanal Caggay kee Qiddó-Zakariyya deqsita namma nabi suge. Too nabuwwa, Israayil doore Dageltay ken amol yenehiyyah migaaqal, Yuudâ-rasu kee Yarusalaam magaalal suggu 'ye Yahuud mara lih yaaben.

² Saltiyál-Darabbabel kee Yahuuxadák-Yaasuwa too namma nabi yab yoobben waqdi, Yallih Qibaadah-Qarih xisne wadir qimbisen. Too namma nabi xisol kaadu ken catteh.

³ Sarrak, Furaat Weeqaytuk Ayrô-culma le kabut Raaqa Rakaakayih abbah yen Tattanay deqsita num kee Satar-Bodnay deqsita num kee ken waday Yarusalaam fan temeeteeh, iyyeenimih, «A qari ‹Xisa› siinik inteeh, ‹A duyye edde haa› siinik intem iyyaay?

⁴ A qari xisa mari maa migaq le?» keenik iyyen.

⁵ Yalli Yahuud-marih idoolak amo isih dacrisak yeneemih sabbatah, Fursi-doolatih taamat yen mari, naharak malikih warse'kal hebeltô-maaqatta bee waanamal gaba kaleeniih; tonna leemiik Yahuud mari woo taama elle beyak raaqe.

⁶ Sarrak Furaat Weeqaytuk Ayrô-culma le kabut Raaqa Rakaakayih abbah yen Tattanay kee Satar-Bodnay kee ken waday malikih warkat yuktubeenih ruuben.

⁷ Too warkatal iyyeenimih, Malik Daryawesow, naharak ku xinto amaanah tanay.

⁸ Nabna le malikow, koh warisnaamah, «Nanu Yuudâ-rakaakay genxeh sugneeh, too waqdi kaxxa nabna le Yallah bicsen Qibaadâ-Qari naba xeetiy affara ruknik yanihiyya kee coox soolisah nuble. Xisne xayuk gaba kalta'gidih kaxxa taamah taamitaanaah, meqe'nnal akkuk ten.

⁹ «A marak saqoltih yan marak, ‹A qari «Xisa» siinik intem iyyaay? «A duyye edde haa» siinik intem iyyaay?› keenik inne.

¹⁰ Tonnah kaadu, ‹Qari xisa marih migaq neh warisa› keenik inne. Toh ken akah esserrem, a taamak foocat yan mara neexegek lakal koh warisna'gidi.

¹¹ «Too waqdi nek iyyeenimih, ‹Nanu qaran kee baaxoh abbah yan Dageltih naqoosa kinninooh, away xisnam dumaak xissiimeh suge Yallih Qibaadah-Qariiy; a duyye addal akak hayteeh kaa xissem, duma suge Israayil malikiy kaxxa massakaxxa luk sugehiyya.

¹² Ni kaxxa abbobti Yalli niqba taamat asseemih sabbatah, qaraanal yan Yalli, Kaldayah yooboke Nabkadnessaray Baabelon baaxok malikih yenehiyyak qeebil ken gacsiise. Too saaku Yallih Qibaadah-Qari yiggileeniih; tokkel suggu 'ye mara seewah Baabelon rasu fan been.

¹³ Sarra Malik Kooris inkih yan Baabelon rasuk malik edde yekke sanatal, Yallih Qibaadah-Qariy yiddigilleh sugehiyya nammeyhaak xisa 'yaanamih amri yecee.

¹⁴ Nabkadnessar duma Yarusalaamal-yen-Qibaadah-Qarik dahab kee lakqok bicsen mingilwa beeh sugeeh, Baabeloonul usuk isih Yalla axcuk aqbuduk yen duyyeeyah qibaadah-qarih addal heeh suge. Malik Kooris too mingilwa tokkek bahsissa heeh wadir gacseeh, Sesbaxxar deqsita numih gabal hee. Too num kaadu Yuudâ-rasih abba abe.

¹⁵ Sarrak too numuk, «Tama mingilwa beyay Yarusalaamal yan Yallih Qibaadah-Qarih gacis. Yallih Qibaadah-Qari duma elle suge aracal xis» 'yaanam iyye.

¹⁶ Too num Yarusalaam yemeeteeh, Yallih Qibaadah-Qarih rakiibo hee. Sarrak xiso akak too saaku qimbiseeniih, ta saaku fan too xisot nan. Xisok uxih gaba makalinna› 'yaanam nek iyyen.

¹⁷ «Tawayah tu gactek, atu oggoltek, away Yarusalaamal xisan Yallih Qibaadah-Qari nammeyhaak xisa intem Malik Kooris kinnim kee akke waytam elle naaxige'gidih, Baabelon-magaalal kok duma sugte malikwa abba haytem inkih elle yuktuben waraakit gorrisu waa mara rubtaama. Yab tama'nnaay; awayah tu gactek, a caagidik abeh meqem kee, neh tascassem tellek, nee iysixxigey» 'yaanam elle yuktuben warkat kaah ruuben.