Nacmiya 13 - NABUWWA KEE MALIKWA

MARIN BAAXOH MARAK KEN BAXSE

¹ Too saaku Yalli Muusal ruube xinto fayya haak yikriyen waqdi, kitab addak «Qammon kee Mooyab deqsitta kedoh yooboke mari, Yallih mari diini qaadah elle gaaboowe arac amaate waama» 'yaanam inta exxa keenih yikriyen.

² Kitaabal toh akah tunkuttubem, Israayil mari Masri baaxok yewqe saaku Qammon kee Mooyab deqsitta kedoh yooboke mari gital lee kee maaqo keenil cineemik ten. Lee kee maaqo keenil cinaanamat macabinnoonuy, Balqam deqsita numuh, Israayil mara abaara'gidih, lakqo yeceen. Tohih sabbatak tunkuttubeh ten. Takkay immay ni Dagelti woo abaaro dooqa neh abe.

³ Israayil mari tohim keenih yikriyen waqdi, marin baaxoh maray ken addal suggu 'yehiyya inkih isinni addak ken yeyyeeqeenih.

NACMIYA TAYSEEMIT SAHDA ASISE

^4-5 Sek Elyaasib deqsita sek Toobiya deqsita num lih qalla luk yen. Eliyaasib Yallih Qibaadah-Qarik duyye edde daanisan golittek abbah yeneeh; tonna leemiik Toobiyah kaxxa goli yecee. Kaah yecee goli, sadgatah baahan daro kee qaydarusuuy, Yallih Qibaadah-Qarih duyyeey, seekah mattacoh yeceen duyyeey, dakaatah baahen daro kee qinabak bicsen kamri kee, tonnah kaadu, zeyti (saliid) duma daanah elle haak sugen golik ten. Too dakaatah gaaboysen duyye, Yallih xinto elle inta'nnal, Leewih yooboke mara kee Yallih Qibaadah Qaril saare aba mara kee, tonnah kaadu, Yallih Qibaadah-Qarit dacayrih yan marah yeceen duyyek ten.

⁶ Toh tekke saaku anu Yarusalaamal masuginniyooy, Malik Artacsasta Baabelon malik edde yekke soddom kee nammayhaytoh ayrot kaa fan gexeh suge. Dago wakti sugek lakal, ruksat kaak geeh,

⁷ Yarusalaam fanah uduure. Uduure saaku, Elyaasib abe umaane oobbe. Toh macaay inteenik, Toobiyah Yallih Qibaadah-Qarih qarwak qarik teena yecee 'yaanamak ten.

⁸ Toh kaxxam inqibeeh; Toobiya woo qarih addal daanat luk suggu 'ye duyye inkih afal kaak qide.

⁹ Sarrak, «Woo duyye addal akak sugte qari taahirroysa» 'yaanam exce. Wohuk gaba kalen waqdi, «Yallih Qibaadah-Qarih duyyeey, sadgatah daaniseenih sugen daro kee qaydarus wadir elle suge qarih gacisa» 'yaanam exce. Gacseenih.

¹⁰ Tohuk kalah kaadu, Yallih Qibaadah-Qaril saare aba mara kee Leewih yooboke marah acayuk yenen afto keenik yirgiqeenim oobbe. Tonna leemiik too mari Yallih Qibaadah-Qarih taama cabeeh isinni buqreh baaxo fan gexe.

¹¹ Too waqdi doolat taamat yan mara essecekkeeh; «Yallih Qibaadah-Qarih taamah amo akah wagte wayteenim macaay?» keenik exce. Sarrak Leewih yooboke mara kee Yallih Qibaadah-Qaril saare abak yen mara gexeh baaheeh, edde sugen taamah ken gacse.

¹² Tohuk lakal Israayil mari, dumak akah abak suge innah, Yallih Qibaadah-Qarih dakaatah darooy qinabak bicsen kamri kee caxâ xaylok bicsen *zeyti keenih baahen.

¹³ Tohuk lakal too gaaboysen duyye elle tan qarwah taamak abbobtih, sek Selemya kee xinto elle tan innah adda aaxaguk yen Saaduk kee, Leewih yooboke Fadaaya deqsita num hee. Tohuk kalah Dakkúr-Canaan deqsita num ken cata'gidih hee. Canaan, Mattanya deqsita numuk baxi baxak ten. Ta mari aamanti le marak teneeh; ken toobokoh gaaboysen maaqo ken wadbise loonumuh ken eemeneh en.

¹⁴ «Yallaw, anu abam yoh ubulaay; koo elle yaqbuden qari kee tet addal koo yaqbudoonuh baguuk abah an taama foyya maabin» exce.

¹⁵ Too dabaanal Yuudâ-baaxol sabti ayro, maqab akak bicsaana'gidih, qinab xaylot yaaqite mara uble. Aki maray kaadu sabti saaku daro kee qinab xaylooy qinabak bicsen kamri kee salfa le caxâ-miru kee kalah tan duyye danoonal eerra heeh beyahiyya uble. A duyye inkih sabti qiidih ayro Yarusalaamal culusak yenen. Too waqdi «Sabti ayro hebeltohim maylammina» 'yaanam keenik exce.

¹⁶ Suur deqsitta magaalah marak tu yakke mari Yarusalaam magaalal dabaaqah sugeeh, kullum kee wohuk kalah tan duyyek mangom sabti qiidih ayro Yarusalaam baahakaay, ni maral xaamak sugen.

¹⁷ Toh uble waqdi Yuudak saqoltih yan mara essecekkeeh. Keenik exceemih, «Away abtan umaane isinnik maay tablen? Sabti ayroy taahirik tani nadaasa abten!

¹⁸ Yalli duma isi magaala akah bayseeh, nee kaxxam akah digaalem, hununuh sin abbobti isin taway abtan taamah innah tanim abeenimih sabbata. Uxih kaadu isin sabti ayro taahirik ane sinni taamah taamittaanaah, Yallih naqabu nel oobissaanam faxxaanam maay tablen?» keenik exce.

¹⁹ Sarrak, «Sabti orobba 'yaamaay eweqqa 'yam fan magaalak afa alifa» 'yaanamih amri ecee. Sabti ayro magaalah adda faxe duyyeey takkay, cultam kee cule waytam cubbusu waa inni mara magaalah afal wagittoh hee.

²⁰ Inki adda akkiiy namma adda akki, tellemmô-duyye baaha mari bar yemeeteeniih, inkih yan bar magaalak afal xiineeni'mmay,

²¹ too marak, «Maaci maacissa 'yam fan akkel akah xintaanam macaay? Ahak wadir temeeten sin tekkek, umam siinil baaheyyo» keenik exce. Too ayrok wadir sabtih duyye tellemmoh baahak maraaqinnon.

²² Tohuk lakal Leewih yooboke marak, «Taahirrowwa 'xicay, sabti ayro taahirik tan ayro kinnuk, sahda qiidih akah assa innah, magaalah afat dacayrih gaca» keenik exce. Tohuk gaba kale waqdi, «Yallaw, tahal yoo kassit. Ku kacni kaxxa kacanu. Tonna kinnuk, yoo wad» exce.

²³ Too dabaanal kaadu Yahuud-mari Asdood kee Qammon kee Mooyab agabu rihimih abiteenim eexegeh.

²⁴ Ken xaylok garab Asdood afat yaabak yeneeh, wohuk kalah kaadu aki afah yaabak yenen; ni af aaxaguk manannon.

²⁵ Too mara kaxxam essecekkeeh; abaaro keenit abeeh; keenik garab oogoreeh; moyyak xagor keenik muguse. Sarrak, «Tahak wadir sin kee isin xalten xaylo marin baaxoh marat rihim faxe waytoonuh Yallih migaaqal xiibita» exceeh ken xibsiiseh.

²⁶ Sarrak keenik exceemih, «Malik Suleeman dambit asissem, marin baaxoh agabu. Malik Suleeman kulli baaxoh malikwak inkih naba malikik ten. Yalli kaa yikcineeh, Israayil marak inkih malik kaa abe. Tohuh, ellecabol, tama taway isin abtan dambih gadda yekke.

²⁷ Hay, nanu sin abto katatneh marin agabul rihimak, ni Dageltih gitak awaquk, a kaxxa umaanet maay asnoo?» keenik exceeh ken sahiteh.

²⁸ Yoyaadaq kaxxa seekih yen Elyaasib baxak yen. Takkay immay kay baxi Sanballat deqsita numuy Beet-Coron deqsitta magaalal yoobokehiyyah baxál digibe. Tohuk gexxaamah Yoyaadaq Yarusalaam magaalah addak eyyeeqeh.

²⁹ Tohuk lakal, «Yallaw, seeka luk ten seekinna nadaasa isik abte. Leewih yooboke mara kee seeka ko'lih luk ten qahdi nadaasa isinnik abeenim ubuleey» 'yaanam exce.

³⁰ Tonnal ummat marin qaadak taahirroyseeh; Leewih yooboke mara kee seekak kulli num, isil tanim akah yaaxige innah, abeh meqem keenih warse.

³¹ Tonnal kaadu, sadgatah qiden saqih cado elle alaysan boco, yaaxigen waktil baahaanam bicsiteeh; ummat kaadu naharat luuqusen daro kee naharat alaye caxâ-miru sadgatah baahaanam bicsite. Sarrak «Yallaw, ta abba haam inkih yoh ubulaay, tahimih galto yoh ixig» exce.