Naacum 2 - NABUWWA KEE MALIKWA

NANAWÊ-BAATI

¹ Nanawê-maraw, sin bayissu wayta qande temeeteh, marot sin tabbixe. Tonna'mmay ahaysa dacayrih yan mari magaalâ gasoosak gacaay; magaala akak culan gita dacrisay. Qaskarah inkih seecaay qeebih gulguluh gaca.

² Macaay inteenik, YALLI, naqboytit ken buubtak duma, Yuuda kee Israayil mari luk sugen nabna keenih gacsam faxa.

³ Nanawê-magaalat qeebi abtu wayta qaskar qasa gob haysitteh, qasa sarat sartanah yanin. Oson amot akak yanin faaris-gaariira girah innah liliq inta. Qeebih macaxwa massoysan.

⁴ Faaris-gaariira gititteh addal tardeeh, magaalak booxa le aroocal wonnak annah yarden. Ifoyti'nnah uraanaah, cankaxi innah bixiq iyyan.

⁵ Qaskar-abba qaskarah seeco aba. Too seecol enketta 'yeenih, ardah andafoofoluk, magaala maroh edde tan gasoh yamaaten. Gaysê-baxak isinni edde waasan kaxxa mansaf bicsen. Sarrak, culmah afa edde yaggilen gurmudda baahen.

⁶ Weeqayti qaxak raqta afitte inkih fakkinteh, weeqi gaso cule. Malik qaril kaxxa cunxo radda.

⁷ Malik barra carbit tantixibbixe. Seewah tet beyan. Tet kadaadim arkiteh, kurrubaaheh innah boogisaanah, rookah alil isinnik yaaguren.

⁸ Yiddigille dorak caxitte leeh innah, ummat Nanawê-magaalak gexxa. «Ummatey, mardina» keenik iyyaanamah, moggolaanay bisoh kudan.

⁹ Magaalal mango gaddaliino tanik, «Lakqo buuba! Dahab buuba!»

¹⁰ Nanawe buubeenih! Is baateh, abuuruh raqte! Sinaamak afqado meysih dub inta. Guluuba keenik axaxxah, sinam qande cabteh. Fooci keenik gombod ceela.

^11-12 Lubak admoh gexa waqdi, alluwwa qidda haah, molta kee xaylo gablah addal adoobisa. Ken gabla lubak kitiffa hee cadok kibbinta. Nanawê-malik tonnah abak yen. Lubooka edde tan gabla ceelak ten Nanawe a saaku maca geytee? Cayla le lubooka elle adoobittam ceelak ten Nanawe a saaku maca geytee? Lubak kee molta xaylo luk mellekkiy axcuk addal akak gexxam ceelak sugte Nanawe, a saaku maca geytee?

¹³ YALLAY Nabaamak Nabahiyya iyyeemih, «Anu siinik naqboyta ekkeh. Isin edde tanin faras-gaariira carariseyyo. Sin qaskaray qunxa lubooka ceelak tanihiyya carbit rabele. Sahdak beyya hayteenim siinik beeyyo. Ahaysa meysiisak duyye beytaana'gidih, farmoytitte baadal tan doolatwa fan marubtan» iyye.