Makaabon 14 - NABUWWA KEE MALIKWA

SAMSOON DIGIBI

¹ Ayrok teena Samsoon Timna deqsitta magaala gexeeh; inki Filistiinih tooboke baxuwwa yuble.

² Wokkeek buxah yuduure waqdi isi abba kee inak annah iyye. «Timnal kalbi yok beyte Filistiinih tooboke baxuwwa taniih; tet abitam faxak, gexay tet yoh essera» keenik iyye.

³ Kay ina kee abba kaak inteemih, «Rihimih woo *Filistiin-maray diini-maleelah yanihiyya fan maca koo beyta? Akkel isi gulubih addal, hinnay kaadu, ni marih addal baxuwwa waytee?» kaak iyyen. Samsoon isi abbak iyyeemih, «Anu yoh bahtam kok faxam, too awkáay; yikcineh» kaak iyye.

⁴ Kay xaleena aham kaa absissam, YALLA kinnim maaxaginnaay; YALLI Filistiin-maral umaane baaham faxak yen. Too dabaanal Filistiin-mari Israayil-marak reedah amol yenen.

⁵ Tonna leemiik Samsoon, abba kee ina lih, Timna deqsitta magaala safarah gexen. Qinab cooxih addak gaceeh gexak suge waqdi, cunxusa lubak garadah yoobbe.

⁶ Too waqdi garciik Yallih Roocaaniyya qande kaat hayteeh; gab-qassih anuk, mooti innah, too lubak namma ikkel kure. Takkay immay aham abem isi ina kee abbah mawarsinna.

⁷ Sarrak gexeh woo awká lih walaleeh; too waqdi tet yikcineh.

⁸ Waqlaak wadiril Samsoon tet abita'gidih yuduure waqdi, woo duma qideh cabe lubak wagta'gidih, gexak suge gita cabba heeh wokke fan daggaawe. Sarrak woo lubaakay rabehiyyah addat diidaale xalteh malab haytem yuble.

⁹ Too waqdi woo malabak gabah kumussa heeh elle gexaamal akamuk gexe. Ina kee abba gari guffu hee waqdi ken xaqmiseh. Takkay immay rabe lubaakih xagarih addak yeyyeeqe malab kinnim keenih mawarsinna.

¹⁰ Tohuk lakal kay abba woo baxuwwah buxa gexeeh; too waqdi Samsoon qarussoh wokkel xigla abe. Taham furrayna woo baaxol qaadah luk ten.

¹¹ Filistiin-mari kaa yuble waqdi, soddom furraynu wakalih kaah yeceen.

^12-13 Ayrok teena Samsoon annah keenik iyye. «Ixig-ixiga sin esseru waa. A ixig-ixigak maqna, digib gaba kale'kal malcina ayroh addat yoh warisseenik, soddom dallaabiyay *baftak bicseeni kee, kulli numuh kaadu guba kee dagak dudda sin haa sartan yol yan. Tonna hinna'mmay, ta ixig-ixiga afdige wayteenik, too gide siinil tan» keenik iyye. Osonuu, «Lito ixig-ixiga hay baahey, naabbu waynak» kaak iyyen.

¹⁴ «Takmeemih afak, yakmeenim tewqeeh; celem afak, salfa lem tewqe. Toh ixigay» keenik iyye. Sidiica ayroh gide a ixig-ixiga yafdige num keenit waytimeh.

¹⁵ Fereyhaytoh ayro taaxige mari Samsoon barrak iyyeemih, «Ku baqala ayrissa haay, a ixig-ixigah maqna kaak neh eyyeq. Woh abe waytek, ku abbah qarit gira ruubennooh koo woo qarih addat cararisenno. Macaa, koo kee ku baqala buxal xigla neh akah abteenim nee raddaana'gidi maay kinni?» teetik iyyen.

¹⁶ Too waqdi Samsoon barra weeqah sinkibitak kaa fan temeeteh, «Atu yoo makicintoy yoo niqibtom kok ableh an. Yi mara esserte ixig-ixigak maca yoh mawarsinnito?» axcuk sinkibo hayya hayte. Usuk too waqdi, «Anu maqna akak inni abba kee inah mawarsinniyok, koh macah warsaah?» teetik iyye.

¹⁷ A ixig-ixigak maqna teetih warse weemih, woo digibih bicsen xigla gaba kalla haytam fan, malcina ayro fan weeqak sugte. Ellecabol, «Yoh waris» 'yaanamak af tayseedeyu cinte waqdi, maqna teetih akak warseh. Is too waqdi tohim Filistiin-marah warisseh.

¹⁸ Sarrak woo magaalah mari malcinhaytoh ayro Samsoon elle xiina qarih adda culaamak dumal, kaal yemeeteeniih annah kaak iyyen. «Malabak tamuh tayseemih maca tan? Lubaakak qandeh tayseemih maca tan?» kaak iyyen. Toh yoobbe waqdi Samsoon keenik iyyeemih, «Yi dahalto lih abquruk suge waytaanamal, a ixig-ixiga awayiik afdiguk mananniton» keenik iyye.

¹⁹ Too waqdi YALLIH Roocaaniyya cayla kaat hayteeh; Askalon deqsita arac fan gexxa 'yeh, soddom num qiddaay sara keenik kalla heeh, oson luk sugen qax-meqe sara woo ixig-ixiga yifdige marah yeceeh. Takkay immay tekkeemih naqabu xagarat luk isi abbah buxah yuduure.

²⁰ Tohuk lakal kay barra, kay qarus-maqanxa yekke numuh yeceen.