Makaabon 13 - NABUWWA KEE MALIKWA

SAMSOON UBKA

¹ Israayil mari kaadu qagitak YALLIH garil dambi takkem baahen. Tohuk gexxaamah YALLI morootom sanatah Filistiin-mara abbootanah amol keenik hee.

² Too dabaanal Xorqa deqsita aracal yooboke Manowac migaq le num yen. Usuk akah yoobokem Daan deqsitta kedok ten. Barra kaak maxalaytok ten.

³ YALLIH malaykatti teetih yumbulleeh teetik iyyeemih, «Maxalaytoh sugteeh, ahayduma xalteh masuginnito'mmay, ahaysa xayih aadiqettoh lab-baxa xaletto.

⁴ Qinabak bicsen kamri yenekiiy, hinnay kaadu, wohuk kalah taniimih sahda iskirissa haytahiyyak tu maaqabin; caraamak tan maaqo kaadu makmin.

⁵ Baxi koh yaabuku waa saaku xagorta kaak margaqin. Macaay intek, ubukka 'ye ayrook xabba haanam, *Qahdi-culeyna yekke marih innah, dibuk Yallih taamat gaceleeh, Israayil mara Filistiin marih gabak yayyaaqem qimbisele» teetik iyye.

⁶ Tohuk lakal woo barra gexxeeh isi baqalak itteemihii, «Yallih num yol yemeeteeh ceelok Yallih malaykattu ceelak yeneeh; kaa uble waqdi, meysi yot culte. Anu usuk akak yemeete'kke kaa messeriyyo; usuk kaaduuy isi migaq yoh mawarsinna.

⁷ Takkay immay, ‹Aadiqettooh lab baxa xaletto immayii, qinabak bicsen kamri kee sahda iskirissa haytaamak tu maaqabin. Caraamak tan maaqo makmin› 'yaanam yok iyye. Qagissa heeh kaadu yok iyyeemihii, ‹Yaabuku waa awki addunyal yanim fanah, Qahdi-culeyna yekke marih innah, dibuk Yallih taamat gacele› yok iyye» inte.

⁸ Tohuk lakal Manowac YALLA kallaceeh dooqa abeeh, iyyeemihii, «Goytaw, ku maganak atu rubte ku numuu, awki yaabuke saaku abnu waynam neh warsa'gidih, nel kaa gacis. Yi Goytaw, nel kaa gacis» iyye.

⁹ Yalli Manowac abe dooqa kaah duuduseeh; woo barra buqreh addal daffeynal tan waqdi, Yallih malaykatti teetil yuduureh. Too waqdi tet baqli Manowac tet lih masuginna.

¹⁰ Tonna leemiik isi baqalal sissikuk arduk gexxa inteeh, «Woo saaku yol yemeete num qagteh yoh yumbulleeh» kaak inte.

¹¹ Too waqdi Manowac ugutta 'yeh tet kataye. Woo numul amma 'yeh, «Ama barra lih yaabak sugtem koo maay kinni?» kaak iyye. Woo numuuy, «Yeey, yoo kinnih» kaak iyye.

¹² «Meqeh hayik, atu intem nummak maacissa saaku, awki maca abam tayseeh; yanbe saaku kaadu maca abam tayse?» iyye.

¹³ Too waqdi YALLIH malaykatti kaak iyyeemih, «Naharak ku barrak anu aba excem inkih abtam teetil tan.

¹⁴ Qinab caxah xaylo akme waytaama; qinabak bicsen kamri kee sahda iskirissa haytaamak tu aaqube waytaama. Caraamak tan maaqo akme waytaama. Tet amrissa heem inkih abtam teetil tan» iyye.

^15-16 Manowac usuk YALLIH malaykattu kinnim maaxaginnay; tohih sabbatah iyyeemih, «Ku maganah magexinay sug; girgirru koh qidnu waynak» kaak iyye. Takkay immay malaykatti iyyeemih, «Anu aadeemih sin maaqo makma'mmay; lac qiddam faxxek, YALLIH sadgatah qidaay cado akak cararis» kaak iyye.

¹⁷ Too waqdi Manowac iyyemii, «Atu intem nummawta saaku, koo nassakaxxe'gidih, ku migaq neh waris» kaak iyye.

¹⁸ Malaykatti too waqdi, «Yi migaaqat maca wayta? Yi migaq edde radan migaq hinnak» kaak iyye.

¹⁹ Too waqdi Manowac girgirri-baxa kee daro gabat hayya heeh; YALLAY qajiibih tanim abahiyyah sadgat abaana'gidih, xixxaqak bagul cararise. Manowac kee kay barra elle wagitak yenen waqdi,

²⁰ woo malaykattu YALLAH qiden sadgat elle cararisan aracak habug inta girah addat qaran fan awaqih yublen. Too waqdi kaa kee kay barra baaxol afah radde.

²¹ Manowac kee kay barra nammeyhaak woo malaykattu abaluk maraaqinnon. Sarrak Manowac kaa'lih yaabak sugtem, YALLIH malaykattu kinnim yeexegeh.

²² Tohuk lakal isi barrak iyyeemih, «Yalla ubulla hayneh nagay maraqnaay rabennom digga le» teetik iyye.

²³ Kay barra annah kaak inte. «YALLI nee qidam faxaamal, abne sadgat nek oggolak manannaay, away nee yuybulleem kee away neh warsem neh warisak mananna» kaak inte.

²⁴ Sarrak a barra lab-baxa xalteeh, migaaqah Samsoon kaak inte. Yooboke awki dadle saaku, YALLI isi maqaane kaat hee.

²⁵ Usuk Daan-Mafdaga deqsita aracay Xorqa kee Estooluk fanal yanihiyyal yan saaku, YALLIH *Roocaaniyya maqar kaat hayte.