Hosiqa 12 - NABUWWA KEE MALIKWA

¹ Israayil mari, maaci maacissiy bari tikka 'yam fanah, baatik sah keenih xiqtam alle waytaamat asan. Titta ganaanam kee umaane tittal baahaanam qaada keenik tekke. Masri kee Assuuriyah mara lih bica haysiten» iyye.

² YALLI Yuudâ-marat tu haysitah; Israayil mari aba taamah YALLI ken digaalele. Abeenim keenik gacsele.

³ Oson akak raden ken kaxxa abba Yaqkuub bagut yan saaku, isi toobokoyta Qiisoy inâ bagut gangaytuh kaa'lih yanihiyya dibqi yibbixeh kaa'lih yoome. Yenbe saaku kaadu Yalla lih yingiicille.

⁴ Malaykattu lih abe giclol malaykattuk yeyseh. Tohuk lakal weeqeeh, barkat kaal essere. Beetalal deqsita aracal, YALLI ni kaxxa abba Yaqkuubul yemeeteeh, kaa'lih yaabe.

⁵ Tohum, YALLAY Nabaamak Naba Dagelta kinnihiyya. YALLI, kaa elle xaaqita migaaqa.

⁶ Tonna kinnuk Yallay sin Dagelta kinnihiyyal eemenaay kaal uduura. Yallak kalihim maqbudina; maqaane kee qadaalat le mara tika. Yallih cato tamaatem fanah, wonnah maxcinaay annah maxcinay kaa qambaala.

⁷ Yalli iyyeemih, «Israayil mari aamanti cabeeh, makot yan miizaanal duyye sinaamah keexan.

⁸ Too waqdi afak, ‹Nanu gaddaleela nekkeeh; abne taamal geyneh, makot abnem mannuy dambit maasinnino› iyyan.

⁹ Takkay immay yoo, YALLAY Masrik sin yeyyeeqehiyya, uxih sin Dagelta kinniyo. Ahak sarra bacarih tan baaxol sugten saaku edde sugten siraaqah sin gacseyyo.

¹⁰ «Nabuwwal wacyi oobiseeh, ‹Yi ummata lih yaabaay, maabina isinni Dageltal uduura keenik inxica› exce.

¹¹ Gilqad deqsita aracal kaxxa umaanet asa mari ambaxele. Gilgal rasul awurwa sadgatah qidaanah immay sadgat elle aban arac gubbik bagul gaaboysen qalum akkele» iyye.

¹² Nanu akak radne ni kaxxa abba Yaqkuub isi baaxok kudeeh; Mesbotaamiya fan rihim goranah gexe. Tokkel barra geya'gidih taamitak, illi-duwat suge.

¹³ YALLI, Israayil mara Masril edde sugen naqoosannuk yayyaaqe'gidiiy ken amo dacrisa'gidih nabi keenih ruube.

¹⁴ Israayil mari YALLAT kaxxa naqabu culseeh; tohih sabbatah kaxxa digaalah ken digaalele. YALLI, isit aben burah, ken digaalele.