Hosiqa 11 - NABUWWA KEE MALIKWA

YALLI ISI MARAH LE KACANU

¹ YALLI iyyeemih, «Israayil qunxuk yen saaku kaa kicinuk en. Tonna leemiik, inni baxih innal, Masrik addak kaah seece.

² Takkay immay anu keenih elle seecaamal, yok axxeeruk yexxeeren. Yi mari Baqal akak iyyaanamay yallah loonuh sadgat aban. Gabak bicsen duyyeh dooqah qaydarus qeerisan.

³ Takkay immay Israayil ummat ibi gexo barissem yook ten. Yi mara kinnoonumih sabbatah baaxok gabal ken soolise. Tohuh ken dacrissam yoo kinnim yoh maaxaginnon.

⁴ Keenih liyoh an kacanuh innil ken xayyoose. Gabah xabba ken heeh inni aliilit ken hee. Qununna exceh inni gabah ken adoobise.

⁵ Tohuh, yol aduure cineenih. Tohuk gexxaamah, Masri fan ken gacseyyo. Assuuriyah mari keenil ackumele.

⁶ Magaalooli keenik carbit bayele. Magaaloolih afoofi keenik carbit addigillele. Yi mari yoo cineh isit celtem abeeh; tohih sabbatah carbit ken bayseyyo.

⁷ Yok yaxxeereenim dooriteeni'mmay, fillal keenik hoonu waan quukih catô goranah sahdat xaaqimeloonuuh; yol kaadu weeqelon. Too saaku cato rikek mageyan» iyye.

⁸ Kaadu qagseh iyyeemih, «Israayil maraw, siinit darre cabam yoh mabicta. Siinit takkeemik tibba axcem yoh matakka. Adma deqsita aracak akah abe'nnah, sin maay baysoo? Xiboyimil baahem siinil maay baahoo? Toh baaham maduuday, kaxxam sin kiciyyo.

⁹ Siinih abah an naqabut sin mabaysa. Israayil ummatey, ahaysa sin mabaysa. Anu Yalla kinniyo ikkal, sahdaytu hinniyo. Taahirik yan Dagelta kinniyooh sin lih an. Ahaysa siinit mabagcarrita.

¹⁰ Anu lubak innah xongolu waa waqdi, yi mari axaxitak ayrô-culmaak yoo fanah amaatele.

¹¹ Masrik kimbir innah haadak, yoo fan amaatelon. Assuuriyah rasuk kukkurruh innah, sissikuk yol aduurelon. Ahak sarra ken baaxo ken gacseyyo. Tahat yabtam yoo YALLA» iyye.

ISRAAYIL KEE YUUDA YALLAT ABTE MAKO

¹² YALLI kaadu iyyeemih, «Israayil ummat dirab kee ayra yol tecee. Yuudâ mari yi yaabih cinat yanih; yooy digga leeh taahirik yan Dageltah yani cineenih.