Hosiqa 10 - NABUWWA KEE MALIKWA

¹ «Israayil mari qinab caxay mango xaylo xaltah innal yeneeni'mmay, gaddaliino osak keenih elle ossaamal, yalla akke sinni duyyeh qibaada elle aban arooca xisen. Baaxo keenih allaggoowak allaggowteeh mango daro kee caxâ-miri aabakuk keenih elle yoobokeemil, xeetik bicsen qamidway yaqbudeenihiyyat aban bilqa lafitak laften.

² Afqado keenik makot taniih; too makoh sabbatah, celta digaala keenit akkele. YALLI oson bicsen qibaadah arooca kee xeetik bicsen qamidway yaqbudeenihiyya bututtukku keenik heele.

³ Oson too waqdi iyyoonu waanamah, ‹Nanu YALLAK meysitak suge wayneemih sabbatah, malik mannu. Malik luk sugna way, mannal nee catu duudak yen?› axcelon.

⁴ Tu xiqe sinni yaabat yaabaanaah; abe wayoonu waanam abenno iyyan. Agdube waan bica sahda lih haan. Qadaalat sinna, robti lakal taabuke xaacalle elle baxacta'nnal, baxacte.

⁵ Samaariyal yan mari dahabak bicsen dahaltuy yaqbudeenihiyyay Beet-Awenil yanit takku waytaamak meysitak yanin. Keenik baysoonu waan saaku, rookitelon. Woo daheltih ceeloh baahan sadgat gabal akak acayuk sugen seeka, woo ceelo le nabna kasitak kaat tekke baatih boogisele.

⁶ Too ceeloy aqbuduk sugeenihiyya Assuuriya fan beeloonuuh, tokkel too malikih gabbarah aceelon. Israayil mari qaybit radeleeh gaca mara akkelon. Toh keenit akah takku waytam macaay inteenik, oson kattaatan fayuk gexxaama.

⁷ «Malik keenik, cataatuffay leeh addat ruubaanah innah gexele.

⁸ Beet-Awenil fayya le ikkel tan aroocay uma-taama elle abak sugeenihiyya bayele. Oson bicsen qibaadah aroocal waaqex kee keenan aabukele. Ummat qaleelak, ‹Nee uqura› axcele. Koomaamik, ‹Nel radaay› axcelon» iyye.

⁹ YALLI iyyeemih, «Israayil mari, Gibqa deqsita aracal dambit ase ayrok wadir, dambi abittok way maadayinnon. Tonna leemiik Gibqal qeebi ken abbixele.

¹⁰ Anu a dambileelal gaba qidam faxaah, ahaysa ken digaaleyyo. Doolatwa titta keenil geyya hayteh, abba heen mango umaaneh, seewah ken beelon.

¹¹ Santiitat gexa rakub num elle kataya'nnal, Israayil mari duma yoo kataatak sugeh, anu aba excem abak sugen. A saakuh tu gactek, qilsa quuka ken fillal heeyyooh, kaxxa taamah abittot ken qaneyyo. Ken kee Yuudâ marat inkih baaxo abqursiiseyyo. Israayil marat daro elle qidoonu waan baaxo fiiriseyyo.

¹² Qusba baaxo ubquruta keenik exce. Cakki ubquray, maqaane orbisita. Yoo sin YALLA fanah edde aduureh meqe wakti a saaku'mmay yol uduura. Yol tuduureenik, barkat siinit heeyyo» 'yaanam siinik iyye.

¹³ «Takkay immay isin yi yab cinna hayteenih umaane tubqureeniih; woo umaaney tubqureenihiyya orbisitten. Isinni diraabat geyten murtik adoobitten. Toh akah tekkem macaay inteenik, isinni qande kee isinni qaskaray kaxxam mangohiyyal kibalsitteenimih sabbata.

¹⁴ Sin marat qeebi akkeleeh; koositih bicissen arooca foyyaase siinik lon. Malik Salman Beet-Arbel magaala carbit bayse saaku tekkem akkele. Too saaku inaani kee xaylo umâ-yabulit raben.

¹⁵ Beetalal yan maraw, siinit kaadu takku waytam tohu. Toh siinit akah takku waytam, isin abten kaxxa umaane. Israayil malik carbik qimbot rabele» 'yaanam iyye.