2 Samuwel 9 - NABUWWA KEE MALIKWA

DAWUD YONAATAN BAXA ARCIBISE

¹ Ayrok teena Dawud iyyeemih, «Malik Saawul buxah mari, tanim maay le? Yeneenik, ken catam faxa. Woh akah axcem, Yonaatan yok kataysak yen» iyye.

² Saawul buxah mari, Xiba deqsita taamâ-num luk yeneenih, Malik Dawud too numuh farmo ruube. Sarrak Xiba yemeete waqdi, Malik Dawud, «Atu Xiba innaa?» kaak iyye. Usukuuy, «Yeey, Xiba kinniyoh» kaak iyye.

³ Malik Dawud too waqdi kaak iyyemii, «Saawul buxah marak tu tenek, yoh warisey. Keenik tu tenek, Yalli yoo akah cate'nnah, anu kaadu ken catam faxak» iyye. Xiba annah kaak iyye, «Yonaatanay Saawul baxah yenek lab-baxi raaqeh; usuk iba-maliiy migaaqah Mafiboset deqsita» kaak iyye.

⁴ Malik Dawuduuy, «Usuk ankel yan hay?» kaak iyye. Xiba, «Qammiyél-Makir deqsita num lih, Lodabar deqsita mandaral yan» kaak iyye.

⁵ Too waqdi Malik Dawud Mafibosetih farmo ruube.

⁶ Mafiboset yemeete waqdi, Dawudut abeh yan assakaxxiyyah, foocal qansah baaxo xagam fan qununna 'ye. Dawud, «Mafiboset akak 'yaanam koo?» kaak iyye. Usukuuy, «Yeey, yi amoytaw» iyye.

⁷ Too waqdi Dawud kaak iyyem leh: «Yok mameysitin. Ku abba yok kaxxa kataysak sugeemih sabbatah, koo catam faxak. Ku kaxxa-abba Saawul luk suggu 'ye baaxo inkih koh gacseyyo. Atu kaadu a saakuuk xabba haanam yi buxal adoobittaama» kaak iyye.

⁸ Mafiboset qagteh qansah baaxo xagam fan qununna 'yeh, «Gadda gey, yi amoytaw» iyye. «A yooy rabe kuti bis le kassitteemih, gadda gey» iyye.

⁹ Tohuk lakal Malik Dawud Xibah nammeyhaak seeceeh, annah kaak iyye. «Mafibosetih malik Saawul buxah mari luk suggu 'yem inkih aceeh an» iyye.

^10-11 «Kooy ku xaylo kee koh taamita marak inkih kay baaxo abqurettoonuuh, kay daro afiiletton. Tonnal kay buxah mari maaqo geele. Mafibosetih tu gactek, usuk kulli way yi buxal adoobitele» kaak iyye. Xiba, «Meqeh yi amoytaw, atu yok intem abeyyo» iyye. Xiba lab-xaylok taban kee konooy luk yeneeh, kaah taamita marak labaatanna takkem luk yen.

^12-13 Tohuk lakal Mafiboset malik buxal hununuh too malik xaylo takme maaqo akamuk yen. Xiba kee kay buxah mara Mafibosetih taamiteenih, baaxo kaah yubquren. Mafiboset maaqoh malik buxal gaceemih sabbatah, Yarusalaamal elle yeede. Kaak namma ibi inkih diglo luk yen. Usuk Miika deqsita lab-baxa luk yen.