2 Aydaad 8 - NABUWWA KEE MALIKWA

SULEEMAN ABEEMI

¹ Suleeman YALLIH Qibaadah-Qari kee kay qari xisne labaatanni sanat kaak beyte.

² Kalah kaadu, Curam deqsita malik kaah yecee magaalooli nammeyhaak xiseeh, xisnek gaba kalla hee waqdi, Israayil mari elle gacaana'gidih tokke ken ruube.

³ Camat kee Xooba deqsita rasu qeebit yibbixe.

⁴ Tonnah kaadu, Tadmor deqsitta magaalay bacarih yan aracal tene nammeyhaak xiseh uqusbussa hee. Leek-maaqo kee saqi-qayso daanah elle hayu waa magaalooliy duma Camat deqsita rasul xisehiyya kaadu uqusbussa hee.

⁵ Tohuk kalah Suleeman Daga-raqta-Beet-Coron kee, Guba-raqta-Beet-Coron deqsitta namma magaala nammeyhaak bicseeh; maroh ten gasoosa kee, woo gasoosat magaala akak culan afoofay faxan way fakaanaah faxan way alfaanahiyya bicse.

⁶ Baqalat deqsitta magaala kee, leek-maaqoh enna 'tam elle abbaxuk yen magaalooli kee, isi gaariira kee faaris elle abbaxuk yen magaalooli kaadu nammeyhaak xise. Wohuk kalah kaadu, Yarusalaam takkuu, Lubnaan takkuu, hinnay kaadu, kay dardaarinni guffa haa baaxol, usuk faxxa haa xisne xise.

^7-8 Suleeman, a xisne edde absiisem, duma too baaxol suge maray Israayil mari bayse weehiyyak rade marak ten. Too mari migaaqah Ciita kee Amoora kee Fariida kee Ciiwi kee Yabuusa deqsitta kedoodah yaabuke marak ten. A saaku fanah, Israayil mari too marak rade mara naqoosah tamsiisa.

⁹ Suleeman Israayil mara naqoosinnat abbaxuk manannaay; oson kay qaskar kee qaskar abbobti kee gaariira amrisa mara kee faaris amok qeebi abta qaskarah yenen.

¹⁰ Suleemanah xisne abak yen marak amo wagitak ken tamsiisak yen mari namma bool kee kontom num akkuk yen. Too mari Israayilih yaabuke marak ten.

¹¹ Suleeman, Masri-malikih-baxáy ginnaaqot abbaxuk yenehiyya Yarusalaamal geytimta Dawud-Magaalal yaaxigen caafatay duma elle sugtehiyyak tet kaleeh, teetih xise qaril tet hee. Too qarit tet hee saaku iyyeemih, «YALLIH Qahdih-Sandug elle sugte arooca taahirik tanik, tonna leemiik yi barra Malik Dawud elle suge qaril dabaaqah gactam mameqe» iyye.

¹² Suleeman YALLAH sadgat elle aban mansafay Qibaadâ-Qarik foocal bicseh yenehiyyak bagul, cado-akak-carrisan-sadgoota YALLAH abak yen.

¹³ Yalli-Muusal-oobise-xinto elle inta'nnal, Suleeman kulli sabti qiidih ayro kee, kulli alsih biloh akah asan qiid kee, tonnah kaadu, sanatal inki adda akah asan Kamiir-Sinni-Gaqamboh-Qiid kee, Daro-edde-Orbisan-Ayroh Qiid kee, Iraawô-Dabih-Qiid yamaate saaku, cado akak cararisan sadgat abak yen.

¹⁴ Isi abbah raatat gexakaay usuk fiiriseh cabe gita kataatak, kulli saaku seekal tan taama kee, Leewih yooboke maray Yallih saare abta kee tonnah kaadu seeka elle catehiyyah, too taama elle kuran innal, keenih warse. Tonnah kaadu, duma kay abba Dawuduy Yallih numuh yenehiyya fiiriseh cabe gita kataatak, Yallih Qibaadah-Qarih afal dacayri abu waa mara heeh, too marah Yallih Qibaadah-Qarih afoofak kulli afal gacu waa maral, taamak tanim kee elle aboonu waan inna keenih yescesse.

¹⁵ Duma kay abba, seeka kee Leewih yooboke mara wagitta qaadak duyye elle haan golitte kee, wohuk kalah taniimiy usuk edde yaabeh cabe inkih Suleeman yugdubeh.

¹⁶ Tonnah abak Suleeman too taamak gaba kaleh. YALLIH Qibaadah-Qaril rakiibo hayyaay xissaay, gaba akak kalla haanam fan faxximma 'ta taama akah abak, xisne gaba akak kalla heeh.

¹⁷ Tohuk gaba kale waqdi Suleeman, Qexyon-Gabar kee Eelat deqsitta namma magaalay booruh tenehiyya fanah gexen. Too namma boor elle yenemii, Agba deqsitta caraatak teneeh; Agbâ-caraata elle tenem, Edom rasuk ten.

¹⁸ Curam deqsita malik, maraakib kee woo maraakib amrissa abbobti, maraakib badal nagay beytu taaxige labha lih hayya heeh ruube. Too maraakibit sarrak Suleeman mara lih Oofir deqsitta baaxo fan gexen. Tokkek, dahabak taban kee koona alfih kiilok fula takkem baahen.