2 Aydaad 7 - NABUWWA KEE MALIKWA

QIBAADÂ-QARI TAAHIRROYSEN

¹ Suleeman dooqak gaba kalla hee waqdi, qaraanak temeete gira sadgatah yusguudeenih sugen saqih cado carrisse. YALLIH nabna yaybulle noori, inkih yan Qibaadah-Qarik adda ifissa hee.

² A ifi YALLIH Qibaadah-Qari inkih dudda heeh; tohuk gexxaamah seeka addah cultam maduudinna.

³ Israayil ummatay wokkel sugtehiyya qaraanak gira oobah tubleeh, YALLIH nabna yaybulle noori qari duudusem yublen waqdi, baaxok bagul Yallih qibaadah gommoh radeeniih, sarrak kaa fayliseeniih, «YALLI maqaane le Goytak, candu kaah gacisa, ummatey! YALLIH kacni mayambaxak, tohul candu kaah gacisa» axcuk kaa saarisen.

⁴ Tohuk lakal Malik Suleeman kee wokkel suggu 'ye mari inkih YALLAH sadgat aben.

⁵ Suleeman sadgatah laak labaatanna kee namma alfi yusguudeh. Illik bool kee labaatanni alfi yusguude. Israayil ummatta kee malik toh akah abeenim, a sadgat, Yallih Qibaadah-Qarih orba sadgat yakke'gidik ten.

⁶ Too waqdi seeka, keenih yeexegen aracal solteeh, Leewih yooboke mari kaadu foocah keenit afkanuk soole. Too waqdi Leewih yooboke mari saareh yaaguren duyyeeyay Dawud keenih bicsiise yoogoren. Dawud abeh cabe saare edde heen. Saareh iyyeenimii, «YALLIH kacani mayamurruqa, kay kacani waarah yan kacanu» axcuk YALLA saarisen. Too waqdi raqqa 'ye mari soolak yeneeh; seeka baanta aagaruk ten.

⁷ Suleeman Qibaadâ-Qarih daaratih addal, hununuh Qibaadâ-Qarih foocat raqta fanti exxa Yallih taamah taahirroyseh. Tokkel cado akak inkih cararisu waa saq yusguudeh, sadgatah daro baahe. Kaadu amaanah xiinaanamih astah aban sadgatak xayta cararise. Too sadgat woo aracal akah abem, sadgatah qidan saq elle yasguudeeni'gidih, nacaasak bicsen mansaf a axxul le sadgat bagul akak abaanah gide nabnah akkuk mananna.

⁸ Suleeman kee inkih tan ummatta Iraawô-Dabih-Qiid deqsita qiidih kaa aynabuk africuk malcina ayro qiidih asen. Too qiidih gaaboowe mari kaxxam manguk yeneeh; Camat deqsitta daabak xabba haanamaay Masri cuduudul yan daqaarah amma 'yaanam baaxok inkih, mango mari woo qiidih yemeete.

⁹ Tokkel yemeete mari naharsi malcina ayro Yallih qibaadah sadgat elle aban mansaf taahirroysak saqa qidak sugeeniih, ciggilta malcina ayro kaadu Iraawô-Dabih-Qiidih asen. Tohuk ellecaboh ayroy qiidik gaba kaleenihiyya qibaadah inki aracal gaaboowen.

¹⁰ Tohul ciggilta ayroy sanatak malcinhaytoh alsaay ayrok labaatanna kee sidochaytoh ayro kinnihiyyat Suleeman, yemeete mara, le baaxo fanah rubsuuse. Amma 'ye mari inkih, YALLI Israayil ummatay isi marah tanihiyya kee, Dawud kee Suleemanat hee barkat yubleenimih sabbatah, kaxxam ruffa iyyen.

YALLI NAMMAYHAAK SULEEMANAH YUMBULLE

¹¹ Suleeman YALLIH Qibaadah-Qari kee isi qari kee, tama-qarwah-xisney niyat luk sugehiyya dudda luk gabal kaak bicca intek wadir,

¹² YALLI barak teena kaah yumbulle. YALLI kaak iyyeemih, «Abte dooqa kok oobbeh. A qari yi sadgat elle aban qari yakke'gidih, yol abte kallaci kok oggole.

¹³ Rob keenik ayseede kee, tooboke daro selu waa qanaytu ruube kee, hinnay kaadu, numuk numut tabta dalka keenit ruubam yablen waqdi,

¹⁴ yi maray yi migaaqal yaaxigeenihiyya yoh rammitak yoo kallaceeniih, abak sugen umaane cabba heenih toobiten ken tekkek, tonnal aban dooqa, elle an qaraanak keenik aabbeyyooh, abeenimik qafu keenih abeyyo. Ken baaxol suggu 'ye niqmat wadir keenih gacseyyo.

^15-16 Yi migaq elle waara'gidih, innih dooriteeh taahir abe qari kinnuk, ta qari yi dacayrih xiineleeh; a qaril abba haan dooqah ayti aceeyyo. Yi inti kee yi afqado kulli waqdi kaa dacrisele.

¹⁷ Ku abba Dawud akah abak suge innah, agaagul sinnuk baguuk yoo tuqbude koo tekkeeh, anu kok aba axcem abteeh, yi amri duudusse koo tekkek,

¹⁸ ku abbak, ‹Ku reeda baxak baxal raaqeleeh; ku nasab Israayil ummattak abbobti akkele› 'yaanam exceh sugeeh; tohim kaak elle inxicca exce'nnal duuduseyyo.

¹⁹ Takkay immay sin takku, sin ramad takku, darre yot cabteenik, aba siinik exceh sin akah amrisem cabba hayteenih, yi aftok gersiimih qibaadat culteenikii,

²⁰ tonnal a baaxoy anu doore ummattah tan Israayilih ecee sugehiyyak sin ayyaaqeyyo. A Qibaadah Qariy yoo elle taqbudeeni'gidih taahirroysehiyya baaqid luk maraaqa. Kulli mari a qari yabloonu waan waqdi, anqaasah elle rabeloonuh, burtelon.

²¹ «Away tablen Qibaadah-Qari a xaqan le nabna leh yan qari'mmay, abur akkeleeh; wokkek gitah gaca mari a abur yabalu waa waqdi, qagabsiteloonuh, ‹YALLI a baaxo kee a Qibaadah-Qaril annah tanim akah baahem macak tan kaa?› axcuk waagiselon.

²² Too waqdi tokkel suge mari, ‹Ama marat ah akah tekkem, YALLAY ken kaxxa abbobti elle aamanuk sugteeh Masrik ken yeyyeeqehiyya cabba heenih gabak bicsen duyyeeyah qibaadat gaceenih. Tohih sabbatah YALLI tama-umaane keenil oobise› 'yaanam axcelon» kaak iyye.