2 Aydaad 35 - NABUWWA KEE MALIKWA

ELLE-TATRIYYI-QIIDIT ASEN

¹ Malik Yoosiyaahu Yarusalaam addal Elle-Tatriyyi-Qiid YALLIH cormatah yessekexxeeh too ayro qiidih ase. Sanatak naharsi alsak taban kee fereyhaytoh ayro too qiidih saqa qiden.

² Seeka YALLIH Qibaadah-Qarih addal qiddi taama abta'gidih abbootan keenih yecee. Niya keenit gacta'gidih, aytikuma keenih abe.

³ Tonnah kaadu, Leewih yooboke maray YALLIH garil taahirik yan mara kinniih Israayil ummat Yallih diini barisak yenehiyyah a taama elle aban inna warse. Keenik iyyeemih, «Yallih Qahdih Sandug, Suleeman xise Yallih Qibaadah-Qarih addal haa. Tahak wadir a sandug aracaak arac quukah mabena. Takkay immay, YALLAY sin Dageltah yani kee Israayil ummatay kay marah kinnihiyya ukduma.

⁴ Dawud kee kay baxa Suleeman duma sin elle kurte innal, gulub gulubuh gacca xicay, Yallih Qibaadah-Qarih taamah, mariiy isi arac siinik yabbaxay.

⁵ Israayil ummatak kulli buxah cato takkeeni'gidih a taamah bical gaca.

⁶ Elle-Tatriyyi-Qiidih maraaqe sadgatah qiddaanama. Tahaysa taahirik gacca xicay sadgatah qidan saqa missoysa. Toh abtan waqdi, Israayil mari YALLI Muusal oobise xinto intam abelon» keenik iyye.

⁷ Tokkel sugte ummatta Elle-Tatriyyi-Qiidih sadgatah qidda'gidih, Yoosiyaahu isi midirik soddom alfi maraaqe kee girgirwak yeceeh; awurwak kaadu sidiica alfi yecee.

⁸ Kay gubal ten doolat abbobti kaadu isinni le kabuk ummat kee seeka kee Leewih yooboke marah sadgat migaaqal laa yeceeniih; tonnal Cilkiyya kee Zakariyya kee Yaciyeliy Qibaadâ-Qarih abbootan luk yenehiyya tittat illi kee wadarak namma alfi kee lica bool sadgatah seekal yeceen. Kaadu sidiica boolih awur gaabossa heenih sadgatah seekal yeceen.

⁹ Toh lih kaadu, Leewih yooboke marak Konanyaahu kee kay toobokoy Samaqya kee Netanel deqsittahiyya kee, Casabya kee Yaqiiyal kee Yoodabad deqsita maray abbobtih yenehiyya, is le kabuk illi kee wadarak koona alfi baahen. Kaadu awurwak koona bool baahen. Sarra sadgatah Leewih yooboke marih gabal heen.

¹⁰ Tonnal Elle-Tatriyyi-Qiidih yacoonu waan sadgatih bicak gaba kaleenik wadir, seeka kee Leewih yooboke mari, malik keenik elle iyye innal, kulli numuuy isi arac keenik yibbixe.

¹¹ Yesketten illi kee wadar yusguudeenik lakal, arab mayyuq Leewih mari abe. Seeka yusguuden saqih qabal, sadgat elle aban aracal rifte.

¹² Sarra cado akak carrisan sadgatih mattacoh qaada ummattâ-gabal heenih; too mari gulub-gulubuh baxsimma 'yeh, too sadgat YALLI Muusal oobise xinto elle inta innal, YALLAH xayyoosen. Tonnah kaadu yesketten awurwa sadgatah xayyoosen.

¹³ Leewih mari Elle-Tatriyyi-Qiidih sadgat, madqa elle inta innal, solal alaysen; taahirik yan sadgat buuti kee distil alassa heenih ummatah sissikuk keefen.

¹⁴ Tohuk gaba kalen waqdi, Leewih mari isinni kee Haaruunuk rade maray seekâ-nasab lehiyyah cado bicsen. Toh akah abeenim, seeka bari tikka 'yam fanah carrisan sadgat xayyoosak, xayta cararisak sugen.

¹⁵ Leewih marak Asaf gulubut raaqa maray Yallih fayla abahiyya dumaak Dawud kee Asaf kee Heeman kee Yedutun keenih heeh suge aracal gacen. Yedutun Malik Dawuduh Yallak temeete farmo baahak yen nabik ten. Qibaadâ-Qarih afal dacayrih mari isi arac macabinnay dacayrit elle yeedeeh; Elle-Tatriyyi-Qiidih taama Leewih mari ken aftok keenih abe.

¹⁶ Tonnah abak too ayro, Malik Yoosiyaahu ken elle amrissa hee innal, too qiid missal aben. Elle-Tatriyyi-Qiidih assakaxxiyya kee cado akak carrisan sadgat tonnal missal aben. Too ayro abba heenim inkih, YALLIH qibaadah aben.

¹⁷ Tokkel too saaku gaabowwa 'ye mari Elle-Tatriyyi-Qiid kee Kamiir-Sinni-Gaqamboh Qiid malcina ayroh tokkel abak sugen.

¹⁸ Nabi Samuwel ayrok wadir, a xaqan le Elle-Tatriyyi-Qiidih asen ayro masuginna. Malik Yoosiyaahuu, too saaku seeka kee Leewih yooboke maraay Yuuda kee Israayil-rasuk yemeete mara kee Yarusalaam magaalah mara luk, qiid elle abe innal, kaak duma sugte malikwa inkinnah abteh masuginna.

¹⁹ Taham edde tekkem, Yoosiyaahu edde reede taban kee bacarhaytô sanatak ten.

YOOSIYAAHU RABA

²⁰ Malik Yoosiyaahu tahak gaba kalla hee saaku, Masri malikiy migaaqah Nako deqsitahiyya gaaduh Karkamis deqsitta magaalay Furaat weeqaytih xaqul tenehiyya fanah yemeete. Yoosiyaahu toh yoobbe waqdi, a qeebik kaa raaqisam faxe.

²¹ Takkay immay Nako woo qangaral farmo kaah ruube. «A gaaduy abam faxahiyya edde abam faxam koo hinna. Ku qeebih mamattiyyo'mmay, inni naqboytiitit qeebi abam faxa. Ta qeebit Yalli yok isissika iyye. Yalli yi xaqul yan. Tonna-leemiik a tiyal saduh yol magacin. Toh cintek, Yalli koo baysele» 'yaanam kaah ruube.

²² Takkay immay Yoosiyaahu qeebi kaat abaamal malseeh; tonna-leemiik Yallih yaabay Nako kaah warsahiyya cinna heeh qeebi gexoh ugte. Sarrak Magiddo deqsitta booxa fanah, kaa yaaxigeenimik aki num cella heeh, carbih gexe.

²³ Qeebi rade waqdi, Masri mari qideh yan gaysê-baxat uma innah mudduume. Isi qaskarak, «Gaysê-baxi kaxxam yoo biyaakek, buxa fanah xayuk yoo beya» iyye.

²⁴ Edde suge gaarik kalla kaa heeniih, nammeyhaytô-gaarit korissa kaa heenih Yarusalaam fanah kaa been. Wokkel rabeh; malik kee malik buxah mara edde yaaguqen kabri aracat kaa yoogoqen. Yuuda kee Yarusalaam ummat yakkeenimik rookat kaah sugen.

²⁵ Nabi Ermiyaas nadaamah yan qadar kaah abe. Tohuk wadir Israayil rasul kaah rookitan saaku, agabu kee labha a qadar edde haytam qaadah haysitteh raqte. Woo qadar, rookâ-qadar elle gaaboysan kitaabal geytima.

^26-27 Yoosiyaahu abba heemik YALLAH abe qibaada kee Yallih amri elle oggolak suge inna kee, tonnah kaadu, qimbooy ellecaboh usuk abba heem inkih, «Israayil kee Yuudâ-Malikwah Aydaada» deqsita kitaabih addal tan.