2 Aydaad 3 - NABUWWA KEE MALIKWA

SULEEMAN QIBAADÂ-QARI XISE

¹ Suleemanak abba Malik Dawud, Yallih Qibaadah-Qari elle xisoonu waan arac dumal elle bicseh suge. Too arac, Yarusalaam magaalal tan Mooriya deqsitta qalek ten. Too arac, tohuk dumal Ornan deqsita numuy Yabuusa deqsitta kedoh aabakuk yenehiyya, daro kee caffa tittak elle baxisak yen araca. Suleeman qari-xisne qimbise.

² Taama edde qimbisem, waktik malik edde yekke fereyhaytô sanatak nammeyhaytoh alsak ten.

³ Yallih Qibaadah-Qariy Malik Suleeman xisehiyya xexxaarah too saaku aaxaguk yenen cusuluk lactam akkuk yeneeh, labaatanni cusul baguh akkuk yen.

⁴ Qibaadâ-Qari akak culan naharsi goli baguh Qibaadâ-Qari'nnal, labaatanni cusul akkuk yen. Fayyah kaadu bool kee labaatanni cusul akkuk yen. Qarik adda agle sinni dahabay saafih yanit exfeenih yenen.

⁵ Qibaadâ-Qarik kaxxa qarih bagu saagan-cooxut exfeenih yenen. Too saaganak bagu nabam qax-meqe dahabat exfeenih yenen. Too dahabak bagul mango nakliita kee silsilatwa tasaawir heenih yenen.

⁶ Tohuk kalah, inkih yan qarik baguu, kaxxam qax meqe xeet kee Farwayim deqsitta baaxok baahen dahabat bileh yen.

⁷ Adda le kabuk gidaar akak dahabat exfeenih yenen. Toh lih kaadu, amô-tabsih coox kee qari culmah ranko kee albaabitte inkih, dahabak exfeenih yenen. Gidaarak bagul galwa leemih tasaawir bileenih yenen.

⁸ Adda le kabu raaqa goli, Kulliimik-Taahiriinoh-Yayse-Goli deqsitak yen. Too goli labaatanni cusul xexxaarah akkuk yeneeh, baguh labaatanni cusul akkuk yen. Tonnal inkih yan qari baguh yakkeh gide akkuk yen. Labaatanni alfi kiilok fula yakke dahabay agle sinnik woo Kulliimik-Taahiriinoh-Yayse-Goli edde exfeenih yenen.

⁹ Kiilô-garabak fayya 'ya dahabak bisaamir bicsen. Qarik amoh golittek adda le kabu kaadu dahabat exfeenih yenen.

¹⁰ Malik tohuk kalah, taamâ-marak iyyeemih, «Galwa leemih ceelok nammay bicissa haay bagul dahab akak exefaay, sarrak Kulliimik-Taahiriinoh-Yayse-Golil haa» iyye.

^11-13 Too tasaawir too aracak tittak xaqut soolissa heenih, fooca akak woo arac akak culan culma fan afkunuk caben. A tasaawirik kulli tii namma gali luk yeneeh, kulli gali xexxaarah koona cusul akkuk yen. Tittak xaqut elle soolan ikkel, namma galiy fakimit yanihiyya woo kabu kee a kabuk titta keenik aleelak yen. A kabu kee woo kabuk kaadu, Kulliimik-Taahiriinoh-Yayse-Golih gidaar gufak yen. Tittat labaatanni cusuluh gide baguh yakke arac gufak yen.

¹⁴ Too golih afat wanxeexit sugte reebi-saro akak bicseenim, *baftak bicsen meqe saro kee kuclinan kee qasdiiminan kee qisi le tafulwak ten. Woo tafulwa kee saro titta lih meqe'nnal bicseenih; too sarok bagul galwa leemih tasaawir heenih yenen.

NACAASAK BICSEN QAMIDWA

¹⁵ Kalah kaadu namma qamiddu bicsiiseeh; kulli qamiddi soddom kee koona cusul xexxaarah akkuk yen. Too namma qamiddu bahha heeh, Yallih Qibaadah-Qarik foocal soolise. Too qamidwak amot tan duyye fayyah koona cusul akkuk ten.

¹⁶ A qamidwak amo, silsilat kee bool takke rummaanat-ceeloy woo silsilatih bagul tenehiyyak bilqiseenih yenen.

¹⁷ A namma qamiddu elle sooliseenim, Qibaadâ-Qarih culmak a gambi kee woo gambik ten. Qari akak culan afak migdi kabuk soolisen qamiddi migaaqah Yaakin deqsitak yen. Guri kabut soolak yen qamiddi migaaqah Booqas deqsitak yen.