2 Aydaad 23 - NABUWWA KEE MALIKWA

QATALYAL TEKKE UGUUGUMO

¹ Laca sanat tokket kaa sugseenik lakal, sek-Yoyadaq, «Tahaysa kay qaadak tuk teena abnam tayse» 'yaanam iyye. Sarrak qaskar abbobtik laca num lih bica haysite. Tohumuu, Yaroocám-Qadarya kee Yahoocanán-Ismaaqil kee Yoobád-Qadarya kee Qadaayá-Maqseyaahu kee Dikrí-Alisafat deqsitta qaskar abbobtik ten.

² Ta mari, inkih tan Yuudah magaalooli gexxa 'yeh Leewih yooboke mara kee gulubwak abbobtih yan mara Yarusalaam fanah baahen.

³ Too mari inkih, Yallih Qibaadah-Qaril gaabooweeniih, malikik raaqe Yooqas lih Yalla-kee-xagana haysiten. Tokkel Yoyadaq keenik iyyemii, «Dumî-malikih baxi ah kaana. YALLI dumaak Dawuduh xagana culeh sugeeh, ‹Dawudow, ku reeda baxak baxal raaqele› 'yaanam kaak iyyeh suge. Ta saaku ta num too xaganal malik yakkeemi.

⁴ Taway abnu waynam macaay inteenik, seeka kee Leewih yooboke mari sabti ayro taama aba'gidih yamaate waqdi, sidooca afah ken heenno. Naharsi afa keenik Yallih Qibaadah-Qarih afal dacayrih gacele.

⁵ Nammayhaytoh afa keenik malik qarih dacayrit gacele. Raqqa intem Rakiibô-Culma deqsita aracal gacele. Ummat inkih Qibaadâ-Qarih daaratal mododele.

⁶ Too waqdi a taamah taahirik tan seeka kee Leewih yooboke marak kalih mari Qibaadâ-Qari macula. Keeniy ta taamat yanihiyyak kalih mari macula. A mari a taamah taahirroowe mara kinnuk, culam tu mali'mmay, keenik kalih mari macula. Aki mari, YALLI elle iyye innal, Qibaadâ-Qarih afal aadelon. YALLIH yab oggolaanam faxxinta.

⁷ Leewih yooboke mari siiben seef lih malik dariifa kee kay xaquk kate waanama. Usuk angayyinnaan ikke kaa'lih gexaanama. Qibaadâ-Qarih adda culam faxa num yenek, kaa qidaanama» keenik iyye.

⁸ Leewi kee Yuudâ mari, sek-Yoyadaqah yab yukkuqeenih keenik akah iyye innah abe. Sabti ayrol labhak sabti ayro taamah gexa mara kee gexe waa mara inkih kaal baahen. Taama gaba kale mara isi buxaaxi fan gexe kalen.

⁹ Yoyadaq, Malik Dawud macaxu kee goobuy Yallih Qibaadah-Qaril daanat sugtehiyya qaskar abbobtih yecee.

¹⁰ Sarra siiben seef gabat le labha malik dacrisaana'gidih, Yallih Qibaadah-Qarih dariifal ken hee.

¹¹ Sarrak sek-Yoyadaq, Yooqas afah yeyyeeqeeh malik-kalabta kaat heeh, malik rasu elle xiinisa xinto kutbeh elle tan warkat kaal yecee. Yooqas tonnal malik yekke. Sarrak sek Yoyadaq kee kay xaylo kaa tuskuteh. Tohuk wadir suggu 'ye mari anay fayya haak, «Ani hay malik! Ani haay!» iyyen.

¹² Qatalya, malik assakaxxiyyah, anay fayya haak yaaba mara toobbe waqdi, sissikuk YALLIH Qibaadah Qari fan gexxe. Tokkel gaaboowe mari teetih suge.

¹³ Woo baaxol qaadah akah abak sugen innah, Yallih Qibaadah-Qaril yan qamiddih garil, soola malik tuble. Bool-abbobtih ten qaskar kee *baanta yaagure maray maraasiyot kaa yabbixehiyya tuble. Kaadu farcatak yan maray waxxaq iyya kee baanta yaagurehiyya tuble. Qibaadâ-Qaril saare aba mari elle digran duyye luk a qaffaydak foocat yen. Toh tuble waqdi, Qatalya niya teetik baxaqteeh sara isik qanxisseeh, «Gano leelaay, gano leelaay! Ah gano!» inte.

¹⁴ Sek-Yoyadaq, Qatalya YALLIH Qibaadah-Qarih deraafil tet qidaanam mafaxinnaay, tonna leemik qaskar abbobti amriseh, «Ama qaskaray rooruh tanik gudeek hayya hay, tet beyaay, tet catam faxa mari yenek, ken qida» iyye.

¹⁵ Too waqdi tet yibbixeeniih, malik-qarih-daarat fan tet beeniih, Faras Culma deqsitta aracal tet qiden.

YOYADAQ ABTO YIYSISE

¹⁶ Sek-Yoyadaq, Malik Yooqas kee ummatta YALLIH mara yakkeeni'gidih, YALLA kee ken fanal bica abe. Sitta fanah xayyossa heeh, YALLIH mara akkeloonumuh Yalla-kee xagana ken culse.

¹⁷ Tohuk wadir tokkel suggu 'ye mari inkih, Baqal elle yaqbuden qari gexeeniih bututtukka heen. Tokkel sugte sadgat elle abak sugen arooca kee, xeet kee cooxuk bicsen duyyeeyay Yallih aftok yaqbudeenihiyya yiggiggileenih. Mattan deqsita numuy Baqal yaqbude mari seekih luk sugehiyya Baqalah sadgat elle abak sugen aroocak foocal qiden.

¹⁸ Sarrak Yoyadaq seeka kee Leewih yooboke mara YALLIH Qibaadah-Qaril aban taamah abbootanat hee. Ta mari Malik Dawud ken edde hee taama kee, Muusal obte xinto elle inta innal, YALLIH sadgatah baahan saqih cado cararisaanam taamah luk yenen. Tohuk kalah, Malik Dawud elle iyye'nnal, Yallih saare qiidih asan saakih qaffaydah abbootan keenih yecee.

¹⁹ Tohuk kalah kaadu, Qibaadâ-Qari taahir maliinoh yamaate mara waasu waa maray Qibaadâ-Qarik culmal dacayrih gacu waahiyya doore.

²⁰ Tohuk inkih gaba kalla hee waqdi, qaskar abbobti kee makaabonuuy doolatak saqoltih yan mara kee wokkel suggu 'ye ayyunti inkih, sek Yoyadaq lih gacca 'yeh, Qibaadâ-Qarik malik dabaaqah elle gaca qari fanah maraasiyot kaa baahen. Malik-qarik kaxxa afay akak culaanahiyyak culla 'yeeniih, malik elle gaca rikeek tan korsil kaa heen.

²¹ Ummatta inkih ruffa 'teeh; Qatalya qideenimih sabbatah, magaalal karbacca intam masuginna.