2 Aydaad 18 - NABUWWA KEE MALIKWA

NABI MIIKAYHU ACAB SADE

¹ Malik Yacoosafat gaddaliino kee migaq-gexxo geeh. Sarrakaa, isi buxah mara kee Israayil malikih yen Acab fanal rihim qaada elle abbaasitan gita bicse.

² Dago sanootak wadir, Yacoosafat Malik Acabat boysita'gidih, Samaariyah magaala fanah safare. Yacoosafat yemeete waqdi, Malik Acab kay qibnaytiino kee assakaxxiyyah kaa kee kaa'lih yemeete marah mango laa kee illi qide. Sarrak Gilqad rasul tan Raamot magaalat abam faxa gaadut kaa yasgallem faxe.

³ Yacoosafatak iyyeemih, «Raamot-magaala gaadam faxak, qeebit yo'lih angale mantuu?» iyye. Yacoosafat kaal gacseemih, «Isin bical gacinnaan saaku neh waris, yoo kee yi qaskarih agantah siinik maraqnak.

⁴ Takkay immay wohuk naharal YALLAL fayu essernam nel tan» kaak iyye.

⁵ Sarrakaa, Acab affara bool takke nabuwwah seeco abeeh; too nabuwwa temeete waqdi ken essereh, iyyeemih, «Raamot magaala nabbixe'gidih gaadu'nna, raaqooh?» iyye. Oson too waqdi, «Gexay gaad, Yalli nasri koh aceelek» kaak iyyen.

⁶ Yacoosafat iyyeemih, «Ahak kalah YALLIH nabiy YALLI aba iyyam neh warisa mayanaa?» iyye.

⁷ Acab iyyeemih, «Inki numuy Yimlá-Miikayhu deqsitahiyya yani'mmay, usuk kulli way umam akke waytek meqem yoh mayablaay; tonna-leemiik kaat mayyu» iyye. Yacoosafat, «Wonnah maxcin, iyyaanam hinnak» kaak iyye.

⁸ Too waqdi Malik Acab malik buxat taamitak yen qaskariitah secca 'yeh, «Gexay Miikayhu sissikuk ni fanah bah» kaak iyye.

⁹ A namma malikii, Samaariyah-magaalah-gasok-afal, darok caffa elle baxsan aracalaa, malik edde gaca sartanay ibak xibqi gufahiyya yeneeh, malik elle daffeya namma korsil elle daffeyan ikkel, a nabuwwa foocal keenik gacca 'teh, takku waytaamat ken lih yaabak sugen.

¹⁰ Too nabuwwak numuk teeni Kanaqná-Xidkiya deqsita nabik ten. Too nabi, birtak bicse gaysoosi luk yen. Iyyeemihii, «YALLI, ‹A gaysoosit Suuriyah marat qeebi abettooh inkitanuuk ken baysetto› kok iyya» kaak iyye.

¹¹ Raqqa 'te nabuwway wokkel sugga 'tehiyya usuk iyyem inteeh, «Gexay Raamot magaalat qeebi ab, aysettok. YALLI nasri koh aceele» iyyen.

¹² Oson tohut yanin waqdi, Miikayhu baaha'gidih gexe qaskar-abbah-yen-num kaa geeh kaak iyyeemih, «Nabuwwa inkih malikih meqem tubleh tani'mmayii, atu kaadu oson yubleenim tableemi» kaak iyye.

¹³ Miikayhu kaal gacsemii, «YALLAY waarahiyyah migaaqal xiibitah ani'mmay, Yalli yok inxica iyyeemiik kalihim kaak maxca» iyye.

¹⁴ Sarra Malik-Acab fan yemeete waqdi, Malik-Acab kaak iyyemii, «Miikayhuw, yoo kee Malik-Yacoosafat Raamot-magaala qeebi abna'gidih gaadnu innaa, magaadnuuh?» kaak iyye. Miikayhu iyyeemih, «Gexay ken gaada. Keenik aysettoonuuh nasri geetton» kaak iyye.

¹⁵ Acab essero kaat qagseeh, «YALLI iyyeemit yo'lih yabta waqdi, ‹Nummat yo'lih yab› kok exceh mananniyoo? Nummat macah yo'lih yaabe wayta?» kaak iyye.

¹⁶ Miikayhu too waqdi kaak iyyeemih, «Israayil qaskaray loyna sinni illi innah fixixih tanihiyya ableh an» iyye. Qagissa heeh, «YALLI, ‹A mari is miraacisa abba leh mayanak, isinni buxaaxih gexxaasitoonay inxic» 'yaanam axcuk oobbe» iyye.

¹⁷ Too waqdi Malik-Acab Yacoosafatak iyyeemih, « ‹A nabi yoh umaamak sah meqem mayabla› 'yaanam kok maxacciyoo?» kaak iyye.

¹⁸ Miikayhu qagseh iyyeemih, «Taway YALLI iyyem siinih warisu waa. Anu YALLA qaraanal isi amoytiinih korsih bagul daffeyah uble. Kay malaykoota inkih migdaa kee gurak kaa maraasiyot kaa abbaxih ubleh eneeh;

¹⁹ too waqdi isi malaykootak, ‹Acab Raamot magaala gexxa 'yeh wokke akah raba innah kaa ayrissu duddam iyyaay?› iyye. Too waqdi malaykootak mariiy tu iyye.

²⁰ Sarrak roocaaniyya fanaak amma 'teh YALLAL xayyowteeh, ‹Anu kaa ayriseyyo› 'yaanam inte. YALLI, ‹Mannal abettooh?› iyye waqdi,

²¹ ‹Gexxa exceh Acab-nabuwwa diraabat yaabiseyyo› 'yaanam inte. YALLI too waqdi, ‹Gexay, kaa ayris, ku gabal bicelek› 'yaanam axcih uble» keenik iyye.

²² Miikayhu ellecabol yaabak af edde cabeemii, «Taway tekkem tamaha. Ku nabuwwa diraabat yaabiseh; koh tu gactek, YALLI kol oobisu waa bala kol yuckumeh» kaak iyye.

²³ Tah yoobbe waqdi Xidkiya deqsita nabi garih kaak amma 'yeh xaban kaak yootokeeh, «YALLIH *Roocaaniyya yoo cabteeh kot gactem maa saaku?» kaak iyye.

²⁴ Miikayhu kaal gacseemih, «Qarik darrê golit sasoh cultu wayta saaku, wohim aaxigetto» kaak iyye.

²⁵ Tohuk lakal Malik Acab isi qaskarih abbak iyyemii, «Miikayhu uxuyay magaalâ-xintoh abbah-yan-Amon kee malik-baxa-Yooqas fan kaa bey.

²⁶ Keenik intaamah, ‹Malikii, «Anu amaanah uduurra axcem fanah tama num casbit sugusaay, dago maaqo kee leek biso kaah maacina» siinik iyye› keenik inxic» kaak iyye.

²⁷ Miikayhu iyyeemihii, «Atu amaanah uduurra 'tek, YALLI yo'lih yaabe kaa hinna» iyye. Qagseh kaadu iyyemii, «Ummatey, anu axcem oobbeyay yok raaqa» iyye.

ACAB RABA

²⁸ Tohuk lakal Malik-Acabay Israayil malikih yenehiyya kee Malik-Yacoosafatay Yuudâ malikih yenehiyya Gilqad rasul ten Raamot-magaalah gaaduh gexen.

²⁹ Acab, Yacoosafatak iyyemii, «Carbi booxa fan genxa waqdi, anu a sarak katta exceh aki sarat gacca exceh aki num ceeleyyo'mmay, atu malik sartanak makatinay edde idiy» kaak iyye. Tonnal Israayil-malik kaa elle aaxige waan sartanat gacca 'yeh qeebit cule.

³⁰ Qeebi rade waqdi Suuriyah malik, faras-gaarih-abbobtih amri yeceeh iyyemii, «Gexay dibuk Israayil malik ibbixaay, kaak kalih marat qeebi maabina» iyye.

³¹ Oson Malik-Yacoosafat yublen waqdi, yakkeenimiik inkih Israayil malik kaa yekkeleeniih; too waqdi kaa yabbaxoonuh kaa fan yenkeleeleben. Takkay immay usuk xongolo abe waqdi YALLAK cato geeh, Yalli aki kabul ken yuyfukune.

³² Faras-gaarit qeebi abta qaskarak abbah yen mari Israayil-malik hinnam kaak yubleeniih; too waqdi kaa makataatinnoonuuy yanay kaa iyyen.

³³ Sarrak, garciik Suuriyah-qaskariiti ruubeh yan gaysê-baxi Acab, fillat-xagar-dacayrih-leh-yan-birtak addak kaa mude. Too waqdi Acab faras-gaari beyak suge numuk, «Mudduumeh! Gaari eykeleelebay nee gacis» iyye.

³⁴ Carbi laqak laqeeh; takkay immay Acab kay gaarih addal rekuh kaa heenih, Suuriyah qaskar fan afkanuk raaqe. Ayro korte waqdi, rooci kaak yewqe.