2 Aydaad 17 - NABUWWA KEE MALIKWA

YACOOSAFAT MALIK YEKKE

¹ Yacoosafat isi abbah Aasa lakal malik yekkeeh, Israayil marak saduh amot gace.

² Isi qaskar Yuudâ-magaalooliy gaso maroh edde sugga 'tehiyya kee Yuudâ-rasuk barrih tan baaxol bicat hee. Tonnah kaadu, kay abba Aasa Efrayim rasuk qeebit yibbixeh suge magaaloolil kaadu qeebi abtu wayta qaskar bicat hee.

³ Yacoosafat isi abba qimbol kataatak suge Yallih gita kataata num yekkeeh, Baqal migaq leemiy sahda aqbuduk sugehiyya maqbudinna. Tohuk gexxaamah YALLI barkat kaat hee.

⁴ Kay abba aqbuduk suge Dageltah qibaada abeeh, Yallih amri iyyam abak yen. Israayil malikwa Yallih gitak tewqeh sugte'mmay, usuk ken innah mawqinna.

⁵ Yacoosafatah YALLI Yuudâ-rasul-milkiino yeceeh; tonna-leemiik Yuudâ rasi kay milkih yen. Yuudah-ummat inkih mattaco kaah bahteeh; tohuk gexxaamah gaddaliy ummat tassakaxxehiyya yekke.

⁶ YALLAT abah yan qibaada kibaalah luk yeneeh, Yalla-maleela elle aqbuduk sugte aroocay fayyat raqtahiyya bayseh. Diini-maleela Aseera deqsittaamay yaqbudeenihiyyah astah sooliseenih sugen gurumuuda Yuudâ-rasuk bayseh.

⁷ Isih reedda 'yeemih sidooca sanat guffu hee saaku, Yuudal tan magaaloolil, Yalli Muusal ruube xinto barissa abbobti ruube. Too saaku ruubem, Bencayil kee Qobadya kee Zakariyya kee Netanel kee Miikayhu deqsita marak ten.

⁸ Ta mara lih wakalih ruubemii, Leewih yooboke marih sagaal kee seekâ-nammayak ten. Leewih yooboke marak ruubemii, Samaqya kee Netanya kee Dabadya kee Qasahel kee Samiraamot kee Yahonaatan kee Qadoona kee Tobyaahu kee Toobadoniyya deqsita marak ten. Seekâ-nammayak gexxem, Alisamaq kee Yahooram deqsita namma seekik ten.

⁹ YALLIH xinto elle tan kitab gabat hayya heenih, inkih tan Yuudah magaalooli fanah gexak, ummat barsen.

¹⁰ Yacoosafat dariifal enna 'ta rasuk cuggaaneh enna 'ta malikwa carbi kaat abtaamak, YALLI kay cunxo keenit ruube.

¹¹ *Filistiin marak tu takkem mattacoh lakqo kee kalah tan duyyeeya kaah bahte. Qarab marak baali tonnah, mattacoh illik malciina alfi kee malcina boolih maruw kee, wadarak kaadu malciina alfi kee malcina boolih dabeela takkem baahen.

^12-13 Tohuk gexxaamah maqarah aysuk yeyse. Inkih yan Yuudah rasul megdebitte kee duyye daanah elle hayu waa magaalooli xise. Tonnah kaadu, leek maaqo akak inxicca 'yaanamak kaxxam mangom Yuudâ-magaaloolil daanah abbaxuk yen. Yarusalaam magaalal gulub-gulubul kurra heeh, kas kee bagi cubbi leh yan mara qaskar-abbobtih hee.

¹⁴ Too marakaa, Qadna akak iyyan numuy kedok Yuudah taabuke qaskarak abbah hee. Too numuu, sidiica boolih alfi takke qaskarak abbah yen.

¹⁵ Kay lakal saqalah heem, Yahoocanan deqsita numuk ten. Ta num kaadu namma bool kee bacra-tabanih alfih qaskariitak abbah yen.

¹⁶ Sidochaak abbah tenem, Dikrí-Qamasya deqsita numuk ten. Namma boolih alfih qaskariitak abbah yen. Qamasya isi fayxik YALLAH too taama abam faxa numuk ten.

¹⁷ Benyam kedoh tooboke qaskarak abbah tenem, Elyadaq deqsita qaskariitay kas kee bagi cubbi luk yenehiyyak ten. Too numuu, namma boolih alfih qaskariitay gob kee gaysê-baxa silaacah lehiyyak abbah yen.

¹⁸ Kay gubal kaadu qaskar abbah tenemii, Yahodbad deqsita numuk ten. Ta num kaadu bool kee bacra-tabanih alfi takke qaskaray qeebih tikiyal tanihiyyak abbah yen.

¹⁹ Ta mari inkihii, Yarusalaam magaalal malik taamat yenen. Tahak kalah, Yuudâ-rasul ten magaalooliy gaso maroh edde enna 'tahiyyal qaskar abbaxuk yen.