2 Aydaad 12 - NABUWWA KEE MALIKWA

MASRI MARI YUUDÂ-BAAXOT ABE WARARA

¹ Racabqam malik tikka 'yeh abbootan maqar bahha kaak hee saakuuk xabba haanam, kaa kee usuk amol akak reede mari YALLIH xinto cinaanam baahen.

^2-3 Malikih koona sanat suggu 'yek sarra, kaa kee kay mara YALLAL aamine weenimih sabbatah, YALLI ken digaaleh. Sisak deqsita numuy Masrik malikih yenehiyya alfi kee namma boolih faras-gaariy carbi edde abaanahiyya kee, lactam alfih qaskariitay faras amook qeebi abahiyya kee, Liibiya kee Sukutti kee Kuus rasuk baahe qaskaray loowo sinnihiyya luk amma 'yeh Yarusalaam magaalat qeebi abe.

⁴ Naharak gasoosa maroh edde ten Yuudah magaalooli yibbixeeh, sarrak bisoh gutuqak Yarusalaam magaala fan yemeete.

⁵ Ayrok teena Samaqya deqsita nabi, Racabqam kee Yuudâ makaabonuy Masri malikih meysik gexxaamah Yarusalaam magaalal gaaboweh sugehiyya fanah yemeete. Too nabi keenik iyyeemih, «YALLAK temeete farmo siinih abbixeeh; YALLI, ‹Isin yoo cinteeniih, anu kaadu sin cineh an. Tonna-leemiik Sisak deqsita malikih gabat sin digaaleyyo› siinik iyye» 'yaanam keenik iyye.

⁶ Malik kee malik lih sugte makaabon abak sugte dambit too waqdi isik raddeeh; too waqdi YALLAH rammiteeniih, «YALLI nel baaham faxam, ni umaaneh net takkeemi» iyyen.

⁷ YALLI woh keenik yuble waqdi, nabi lih qagseh yaabeeh, «Away yoh rammiteenimih sabbatah, ken mabaysa. Sisak Yarusalaamat qeebih abeleeh; takkay immay ken kee Yarusalaam magaala bayi mahaay ken baatik innih cateyyo. Yi naqbi elle yani'nnaak keenil mooba'mmay,

⁸ Sisak-gabat gacelon. Too waqdi yoh taamitaanam kee baaxoh abbobtih taamitaanamak taysem isinnih ablelon» 'yaanam farmoh kaal keenih ruube.

⁹ Sarrak Sisak Yarusalaam yibbixeeh, YALLIH Qibaadah-Qarih addal sugte duyye kee malik buxal sugte duyye buubeh bee. Malik Suleeman yen saaku bicseh cabeh suge goobway dahabak bicseenihiyyah agantah beeh.

¹⁰ Racabqam woo goobwah aftok nacaasak bicsen goobwa bicissa heeh; sarrak malik qarih afal dacayrih yan maral amaanatah yecee.

¹¹ Malik YALLIH Qibaadah-Qari fan gexa waqdi, quukah tokke fan baahak yeneeniih; usuk wokkek yaduure waqdi, daanah elle yabbixen malik-qari fan gacisak yenen.

¹² Malik Racabqam YALLAH rammiteeh; tohuk gexxaamah YALLIH bagcarra kaal xabbacowteh; ummat kaxxa baatik cattinteh. Tonnah kaadu Yuudâ-baaxol caalat muquk yen.

MALIK RACABQAM ABEEMI

¹³ Racabqam Yarusalaamal malikih elle raaqeeh, qandeh lafitak lafte. Naharak malik yekke saaku qumrik morootom kee inki sanatat yeneeh, taban kee malcina sanat Yarusalaam magaalal malikih suge. Yarusalaam magaala, YALLI inkih yan Israayil rasuk kay qibaada elle abaana'gidih doore magaalak ten. Racabqam ina migaaqah Naqma deqsitak teneeh; Qammon deqsita marah aabakuk ten.

¹⁴ Racabqam uma taamat akah sugeemik sabab, baguuk YALLIH gital masuginnaay, umaane akah abak yenem, tohuk ten.

¹⁵ Racabqam qimbooy ellecabo fanah abba heem kee kay buxah marak nasab elle geytintam, Nabi-Samaqya-Aydaada kee Nabi-Qiddoh-Aydaada deqsitta namma kitaaba. Racabqam kee Yarobqam addunyal yenen saaku, kulli way carbi tittat abak sugen.

¹⁶ Racabqam rabeeh; Dawud-Magaala deqsita caafatal malikwâ-buxah mara edde yoogoqen kabrit kaa yoogoqen. Kay lakal kay baxi malik yekke. Migaaqah Abiyya kaak axcuk yenen.