2 Aydaad 10 - NABUWWA KEE MALIKWA

KILBAT LE KABUT RAQTA KEDO YUUDAT UGUTTE

¹ Racabqam, kilbat le kabut raaqa Israayil mari malik kaa aba'gidih elle mododeh suge Seekem deqsitta magaala fan gexe.

² Nabát-Yarobqam duma Malik-Suleeman-meysih megloh Masri fanah kudeh suge. Ta xaagu yoobbe waqdi Masrik yuduure.

³ Guubuh kilbat le kabut raqqa 'ta kedooda farmo Nabát-Yarobqam fan rubteeh; usuk tokke yemeete waqdi, Racabqam fan gexen. Kaak iyyeenimih,

⁴ «Ku abba duma kaxxa gibdaabinat nee abbaxuk sugeeh; usuk nee edde abbaxuk suge gibdaabina nel sahhilossu waytek, ku xintot xiinenno» kaak iyyen.

⁵ Racabqam keenil gacseemih, «Inkiimihiiy sidiica ayrok lakal yol uduura; tuk teena siinil gacseyyok» iyye. Too waqdi too mari gexeh.

⁶ Malik Racabqam kay abbah taamat sugte idoolay kay abba fayu elle esserak sugehiyya fan *fayu essera'gidih gexeeh, «A mari yok iyyeemik maca keenil gacsam tayseeh?» axcuk fayu keenil essere.

⁷ Too mari kaak iyyeemihii, «A marah meqem abteeh, ceela yab keenil gacisseeh ruffa ken haytek, tonnal kulli way ku taamat gaceloonuh kol mamakaanak, toh ab» kaak iyyen.

⁸ Takkay immay oson kaah yeceen fayu cabba heeh, kay fiqmay kaa'lih tembeeh fayu kaah taceehiyya fan gexeeh,

⁹ «Taway ta marak maca axcem tayse? ‹Ku abba nee edde abbaxuk suge gibdaabina nel sahhilos› 'yaanam yok iyyeenik, too tiyal maca keenil gacsoo?» keenik iyye.

^10-11 Too qunxaaneyti fayuh kaak iyyeenimih, «Yi abbah axcak yi qunxa feera nabaah; yi abba qilsa-le-quuka fillat siinik abbaxuk suge'mmay, anuy wohuuk gibdim siinil baaheyyo. Usuk qunxa keetalat sin aagaruk suge'mmay, anu faaris edde yaaguren keetalat sin aagureyyo› 'yaanam keenik inxic» kaak iyyen.

¹² Sidooca ayrok lakal, Yarobqam kee inkih tan ummatta, usuk «Yol uduura» keenik elle iyye ayrol, Malik Racabqam fan yemeeten.

^13-14 Malik idoola fayu cinna heeh, furrayna kaa fayisse ceele waa uma yaabat ummatta lih yaabeh, iyyeemih «Yi abba qilsa-le-quuka fillat siinik abbaxuk suge'mmay, anuuy wohuuk gibdim siinil baaheyyo. Usuk qunxa-keetalat sin aagaruk suge'mmay, anu faaris edde yaaguren keetalat sin aagureyyo» 'yaanam keenik iyye.

¹⁵ Aham duma akkelem YALLI, nabi-Aciiyah-afat Yarobqamah warseh sugeeh; tohuk gexxaamah Racobqam ummatta faxxam abam cineh. Siilol yoobokeh yen Aciiya deqsita nabi iyyem nummak maacisse.

¹⁶ Yemeete mari, malik yab keenik aabbe cinem yublen waqdi, «Ah maca neh xiqee, Dawud kee Dawuduk rade mara? Nee kee keenik maca tangalee? Kata labhay, nee beya! Racabqam ahaysa isih faxem abbaasitay» iyyen. Tohuk wadir Israayil mari woo xintol saduh gacen.

¹⁷ Tohih sabbatah Racabqam dibuk Yuudâ-rasul dabaaqah suge marih abbootan luk raaqe.

¹⁸ Toh yuble waqdi Racabqam, farmoh Adoniiram deqsita numuy dirkisak tamsiisan marih abbah yenehiyya Israayil mara fan farmoh ruube. Too mari too numut xeet heeh edde kaa qiden. Racabqam toh yoobbe waqdi, sissikuk faras-gaarit koreeh Yarusalaam fan kude.

¹⁹ Too ayrok wadir, Israayil rasuk kilbat le qaxat raqta ummatta inkih Dawud durruyyatih dardaarinnal saduh gacen.