1 Samuwel 31 - NABUWWA KEE MALIKWA

SAAWUL KEE KAY XAYLOH RABA

^1-2 Filistiin mari Gilbowaq deqsitta qalel Israayil marat qeebi aben. Too qeebit Israayil marak mangom rabteeh wohuk raqtem toowweh. Yoowwe marat Saawul deqsita Israayil malik kee kay xaylo edde ten. Takkay immay lakak ken ayradduk exbeebexxa ken heenih, Saawul lab xaylok Yonaatan kee Abinadab kee Malkisuwaq deqsitta labha qiden.

³ Woo saakih qeebi Saawul akak yan kabul kaxxam qilsuk yen. Tonna leemik Filistiin qaskar rubteh tan gaysê-baxat Saawul uma'nnah mudduumeeh madaluh raaqe.

⁴ Too waqdi silac kaah akkuquk suge furraynuh yan numuk, «A diini-maleelah tan Filistiin ummatta yoo qiddeh yol tirtirissaamak, ama tikyat lito seefit yoo qid» kaak iyye. Takkay immay woo furrayni seefit kaa qidu meysih yeffereh. Toh yuble waqdi Saawul isi seef siibba heeh is edde qide.

⁵ Taaxige furrayni Saawul rabem yuble waqdi, usuk kaadu isi seef siibeh isit heeh edde rabe.

⁶ Saawul kee furraynu tonnal rabteeh, kay xayloh sidoc kaadu too ayrot rabe. Saawul mari titta lih too ayrot rabe.

⁷ Israayil maray Yidraqel-Daqarak woo qaxa raqta baaxo kee, Ordon weeqaytuk ayrô-mawqa le kabut raqta baaxol yeneenihiyya, qaskar kuddeh Saawul kee xaylo kaadu qideenih, 'yaanam yoobben. Too waqdi isinni magaalooli cabba heenih kuden. Sarrak Filistiin-mari yemeeteh woo magaalooli keenik yibbixen.

⁸ Qeebi gaba kalek lakal, ciggilta ayro, Filistiin mari qeebit rabe marak duyye seelebaana'gidih yemeeten waqdi, Saawul kee kay xayloh sidocuy Gilbowaq-qaleh amol qangalaalot tanihiyya keenih sugte.

⁹ Too waqdi Saawuluk moyya yirgiqeeniih, seef kee birtak bicsen duyyey xagarat mudum waasoh haanahiyya kaak seelebeenih. Yalla 'yeenih yaqbuden duyyeeyay sahda gabak bicissehiyya elle yaqbuden qaril yan mara kee, isinni ummatah a xaagu warisu waa mara ruuben. Too mari ta xaagu beya'gidih gexeeh, a xaagu ummatat qiden.

¹⁰ Sarrak Saawul silac Qastarot deqsittaamay Yallih aftok yaqbudeenihiyyah qibaada elle abaana'gidih xisen qarik addal heen. Raysa kaak Beet-San deqsitta magaalat maroh tan gasok bagut xakbisen.

¹¹ Gilqad rasuk Yaabes magaalal yan mari, Filistiin-mari Saawuluk abem yoobbe waqdi,

¹² keenik addak agiirah yan mari inkih yan bar Beet-San gufaana'gidih gexak xiinen. Wokke gufen waqdi, Saawul kee Saawul xayloh raysa gidaar baguk oobiseenih, Yaabes-magaala fan beeniih, tokkel carrisen.

¹³ Sarrak woo carrisen raysak raqte lafoofi gaabossa heeniih, woo magaalah addal ten saagantô gubal yoogoqen. Tohuk gaba kalla heen waqdi, kay rabih rookah malcina ayro soomuh asen.