1 Samuwel 29 - NABUWWA KEE MALIKWA

FILISTIIN-MARI DAWUD RUBSUUSE

¹ Filistiin-mari qaskarak elli haanam Afeek deqsita aracal gaaboysen. Israayil-mari kaadu, Yidraqel-Daqar deqsita aracal yan buyyil yinfiddigen.

² Filistiin malikwa kee ken mari bool-bool kee alfi-alfih gacca 'yeenih fooren. Dawud kee kay maraay keenik salafat Malik-Aakis lih gexen.

³ Filistiin qaskarih abbobti Dawud kee kay qaskar tuble waqdi, «Sugay, a saaku a Qibraan-mari akkel abam macaa?» iyyen. Too waqdi Aakis keenik iyyemii, «A num mataaxigaana? Aham Saawul qaskarak abbah yen Dawudu. Away yi fanah yemeeteemih waqla leh immay, aham fanah umaaneh kaat geem mayyu» iyye.

⁴ Filistiin qaskar abbobti bagcarritteh kaak inteemih, «Ama num nek raaqay inxicaay, elle suge magaala fan gaca kaak inxic. Ne'lih qeebih gexe waama. Qeebi rada waqdi qeebi wadir net aba way manaaxiga. Lih suge num kaa yakcine'gidiiy kaat wagra'gidih, ni mara qidam takkeh. Kay amoyti kaat wagraamak, kaah taysem matan» iyyen.

⁵ Qagseenih iyyeenimih, « A num, ‹Saawul mango alfi yakke mara qide'mmay Dawud mango tabanih alfih num qide› akah iyyeeh agbi gad kee rigdo akah abe Dawud kinnim hawwentaa?» kaak iyyen.

⁶ Too waqdi Aakis Dawuduh seeceeh kaak iyyeemih, «Atu aamanti le numuh yok sugteemih YALLAY waarahiyyal xiibita. Yi fanah amma 'teemiy a saaku fanah kok uble qellat mayyu. Tonna-leemik yo'lih gexxaah qeebit tangalem kok faxak en. Takkay immay yo'lih tan malikwa woo tiya yok moggolinna.

⁷ Tonna-leemik ahaysa uduuraay muquk gexaay; oson niqboonumuk tu maabin» kaak iyye.

⁸ Dawud too waqdi iyyemii, «Yi amoytaw, qellatah maca baahe? Atu akah inta innah, ku taamat gacca exceemiiy akke hebeltô qellat yot gee waytek wadir, kooy yi amoytah yanihiyya lih gexxa exceh ku naqboytiitit qeebi abe akah wayya haa macaay?» iyye.

⁹ Aakis kaal gacsemii, «Anu tohut haam mayyu. Yallih malaykattih innah koo able ikkal. Takkay immay Filistiin qaskar abbobti, ‹Usuk carbi booxa ne'lih gexe waama› yok iyyeeniih,

¹⁰ tonna'mmay taway, koo kee ku maray ko'lih yemeetek inkih abtaanam, beera dibroh ugutta 'xicay ayro liliq inta waqdi gexa» keenik iyye.

¹¹ Dawud kee kay mara nammeyhaytoh ayro dibrot ugutta 'yeenih Filistiin baaxo madaarah gexen. Filistiin-mari Yidraqel fan gexe.