1 Samuwel 27 - NABUWWA KEE MALIKWA

DAWUD FILISTIIN RASUL GACE

¹ Dawud isi bagul, «Ta xayyu kinni ayro maaxiga'mmay, Saawul ayrok teena yoo qide'kal maraaqa. Hay tohuk maca abam meqe? Filistiin rasu fan gexaama. Tokke gexem yoobbek, Israayil baaxol yoo gorrisaamak raaqele. Tohuk wadir yoo elle qida'nna mageya» 'yaanam isi bagul yucsube.

² Tohuk wadir Dawud kee kaa'lih yen maray laca boolih num yekkehiyya Maqók-Aakis deqsita malikiy Gat-rasul malikih yanihiyya fan gexen.

³ Dawud kee kay mara tokkel Malik-Aakis luk, Gat magaalal dabaaqah gacen. Kulli num buxâ-mara gabat luk yeneeh, Dawud namma barra kaa'lih ten. Too agbi, Acinooqamay Yidraqel magaalal tooboke kee Nabalak raqte Abiigalay Karmelil tooboke.

⁴ Saawul, Dawud Gat fan gexem yoobbe waqdi, kay goranak raaqeh.

⁵ Dawud Aakisik iyyeemih, «Nummah yi kataysa tekkek, ku maganak dabaaqah mandarak tiyak teenal elle gaca arac yoh ucuy. Anu ko'lih inaytâ-magaalal gacam yok mafaxxintak» iyye.

⁶ Aakis too saaku Xiklag deqsitta magaala kaah yecee. Woo magaala woo ayrok wadir Yuudâ-malikwah im tekke.

⁷ Dawud Filistiin rasul taban kee lica alsa suge.

⁸ Too dabaanal Dawud kee kay mara Gasur kee Gixxa kee Qamaalek maray dumaak woo baaxol elle sugehiyya buubak sugen. Ta mari Sur deqsita rasuk xabba haanamaay Masrih amma 'yaanam tan baaxol, dumî dabaanal guubuh elle sugen.

⁹ Dawud ta baaxot qeebi aba'gidih amaatinnaan saaku, agabu kee labha inkih keenik qidakaay, laay illiiy gaala kee danoona dannabah keenik orbisak suge. Xagar sarih agantah keenik beyak suge. Sarrak Aakis fanah amaatinnaan waqdi,

¹⁰ Aakis, «A saaku gaaduh gexxem ankeey?» kaak iyya waqdi, Dawud, «Yuudâ rasuk gabbi-qaxat raqta baaxol suge» axce kee, «Yeracmaqil kedok gabbi-qaxat raqta baaxol suge» axciiy, hinnay kaadu, «Keena kedok gabbi-qaxat raqta baaxo gexeh suge» axce akkuk yen.

¹¹ Kaa kee kay mari qeebi aba'gidih elle gexen baaxok, sinam Gat fan gexxa 'teh keenit tekkem warsaanamak, agabu kee labha keenik qidak yenen. Dawud Filistiin-rasul suggu 'yem fanah toh abak suge.

¹² Takkay immay Aakis kaa yeemeneeh isi bagul, «Kay mari kaa niqbah yanik, addunyal yanim fan inni taamat kaa hayu waa» iyye.