1 Samuwel 13 - NABUWWA KEE MALIKWA

FILISTIIN MARAT QEEBI ABEN

¹ Saawul malik yekke saaku, barak soddom karmat yeneeh, Israayil ummattak morootom kee namma liggida malikih suge.

² Saawul Israayilik sidiica alfih num dooreeh; woo sidiica alfik namma alfih num Beetal deqsitta baaxoy mango qaleela lek Mikmas deqsita aracal is lih raaqise. Alfi num kaadu Benyam rasul ten Gibqa deqsitta magaala fan isi baxay migaaqah Yonaatan deqsitahiyya lih ruube. Raqqa 'ye mara buxah ruube.

³ Yonaatan Gabaq deqsitta magaalal yan Filistiin qaskarak dago marat qeebi abeh keenik yeyse. Filistiin mari toh yoobbeh. Tohuk lakal Saawul iyyeemih, «Inkih tan Qibraan ummattah *baanta uguraay tekkem keenih warisa» axcuk, farmoytitte ruube.

⁴ Tonnal, Saawul Filistiin-marak dago qandet qeebi abeh keenik yeyseeh; tohuk gexxaamah woo mari ken niqbam, Israayil-mari yoobbeh. Tonna-leemik Gilgal deqsita aracal Saawulut yengelen.

⁵ Filistiin mari Israayil marat qeebi aba'gidih gaaboowe. Qeebi edde aban gaariirak soddom alfi takkem luk yenen. Laca alfi takke labhay faaris amok qeebi abta luk yenen. Kalah ten qaskar keenik mangah qadad luk manannaay mangah qiddeyti axxul luk yenen. Too macaxi Mikmas deqsita aracay Beet-Awen deqsitta'kkek ayrô-mawqa le kabut raqtal yinfiddigen.

⁶ Israayil mari isinni adda yuble waqdi, taysem kinnim waagiseenih; keenik garab gabla kee garbo elle tani'kkeh addat yombooqoren. Raaqe garab kaadu xaluuqâ fanat culeeh, dagen arooca kee qelwah addat yombooqoren.

⁷ Aki mari keenik kaadu Ordon weeqaytuk gacca 'yeenih Gaad kee Gilqad deqsita arac fan gexen. Saawul toh tekke waqdi Gilgalal yeneeh, kaa'lih yen mari meysih axaxitak yen.

⁸ Saawul, Samuwel kaak akah iyye innah malcina ayro kaa qambaalak suge. Takkay immay Samuwel woo malcina ayrot mamatto. Kaa'lih sugte ummatta tiya tiyal kaa cabteh gexxe.

⁹ Too waqdi Saawul iyyeemih, «Yallah carrisan sadgat kee, amaanah xiinaanamih astah aban sadgatah qida'gidih saq yol baaha» iyye. Woo cararisan sadgat abba heeh,

¹⁰ gaba kalam faxa waqdi, Samuwel yemeete. Too waqdi Saawul kaah garayeh kaa arcibiseh.

¹¹ Sarrak Samuwel, «A abtem macaa?» kaak iyye. Saawul too waqdi kaak iyyemii, «Ummatta dibuk yoo cabteh gexxeeh; atu kaadu, ‹Amaateyyo› elle inte waqla mamattinnito. Toh lih kaadu, Filistiin mari Mikmas deqsita aracal gaaboowiyyat yaniih,

¹² too mari a Gilgal deqsita aracal yoo yabbixoonu waanah yanin 'yaanam ucsube. Tonna-leemik YALLIH barkat geya'gidih tu maabinnino 'yaanam axcuk, sadgat abaamat dirkih emeete» iyye.

¹³ Samuwel kaak iyyeemih, «Away abtem duquurâ-taama way! YALLAY ku Dageltah yanihiyya kok aba iyyem maabinnito. Kay amri oggoltaamal, rabba 'tam fanah malikih sugak teneeh; ku lakal kok rade mari Israayil malikwah gacak yen.

¹⁴ Awayah tu gactek, ku abbootanni tama'kket edde yaade. Macaay intek, atu kay amri cinteh. YALLI isih faxa num geeleeh isi marih abbah isih kaa heele» iyye.

¹⁵ Tohuk lakal Samuwel Gilgal cabeh isi gexoh gexe. Raaqe mariiy Saawul isi qaskarat yangalem fan kaa katayak sugen. Gilgalak Benyam kedoh baaxol tan magaalay Gibqa deqsittahiyya fanah gexen. Saawul isi qaskar loowe waqdi, laca boolih num yekken.

¹⁶ Sarrak Saawul kee kay baxa Yonaatan kee ken mara Benyam baaxok Gabaq deqsita aracal yinfiddigen. Filistiin-mariiy elle yinfiddigem Mikmas deqsita aracak ten.

¹⁷ Filistiin-mari gaaduh sidooca exxah gacca 'yeenih yewqen. Exxak teena Suqal baaxok Qofra deqsita arac fan gexxe.

¹⁸ Aki mari Beet-Coron fan gexen. Aki exxa kaadu Xiboyim-golo kee woo bacarih tan baaxo akak yablen ikke fan gexen.

¹⁹ Israayil marih addat biriita bicsa mari mananna. Woh akah tekkem, Filistiin mari Qibraan mara seef kee macaxu abaanamak waaseenih yenen.

²⁰ Tonna-leemik Israayil mari buqre edde yabquren biriita kee, wayxiqa edde kalan biriita kee, godma kee maayta arbaqaana'gidih (samlisaana'gidih), Filistiin-mara fan gexak yenen.

²¹ Godma kee saq edde dacrisan af le birta keenih arbaqoonuh, gabah cawalah inki garsi keenik beyak yenen. Buqre edde aban biriita arbaqoonuh, namma garsi keenik beyak yenen.

²² Tohuk gexxaamah qeebi yekke ayro, Israayil-qaskarak Saawul kee kay baxa Yonaatanak kalih marak seef kee macaxu lem mananna.

²³ Filistiin-mari Mikmas deqsitta daaba qallalle ruuben.