1 Malikwa 5 - NABUWWA KEE MALIKWA

SULEEMAN QIBAADÂ-QARI AKAK XISAN DUYYE KOBXISE.

¹ Suur deqsitta baaxoh malik, Curam deqsitak yen. Usuk dumaak Malik Dawud kataysak ten. Curam, Suleeman isi-abbah aracal gacem yoobbe waqdi, farmô-mara kaa fan ruube.

² Farmo kaa gufte waqdi, Suleeman woo-farmol farmo kaah ruube. Farmol kaak iyyeemih,

³ «Atu akah taaxige innah, yi abba Dawud, YALLAY kay Dagelta kinnihiyyah Qibaadâ-Qari xiseh masuginna. Toh akah tekkem, cuggaaneh tan baaxooxah mari aggiriqe sinni qeebih kaa'lih sugeeh; ken lih abak yen qeebik gexxaamah gaba geyak masuginna. Usuk YALLI woo naqboytiitik iysiissa kaa haam fan qambaalak suge.

⁴ Awayah tu gactek, YALLAY yi Dagelta kinni deraafil yan mara lih amaanah yoo xiinisa. Naqboytit mayyuuy, akak gadaamitam kaadu mayyu.

⁵ Duma YALLI yi abbah qahdi culeh sugeeh; kaak iyyemii, ‹Ku baxa malik abeyyooh; yoo elle yaqbudoonu waan qari usuk xisele› kaak iyyeh yen. Tonna leemiik taway anu too Qibaadah-Qari inni Dageltah xisam niyat liyo.

⁶ Ku mari Lubnaan baaxok sariidâ-coox yoh yargiqeeni'gidih, garbo fan ken rubtam kok faxa. Yi marak kaadu tu takkem ken lih taamitta'gid ruubeyyo. Atu akah taaxige'nnah, caxâ-garuq ku mari gersi marak inkih yayse. Cawalah, atu ucuya axcinnaanih gide keenih aceeyyo» kaak iyye.

⁷ Curam, Suleeman kaah ruube farmo yoobbe waqdi, kaxxam ruffa 'yeh, iyyeemih, «YALLAH fayla taafay. Macaay inteenik, Dawuduh a xaqan le kasloytah yan baxa, kay lakal Israayil baaxoy nabna lehiyyal malikih hee» 'yaanam iyye.

⁸ Tohuk lakal Suleeman kaah ruube farmol gacsah iyyemii, «Atu yoh rubte farmo yoo maaddeeh; atu faxxa haytem abuh bical koh an. Sariida kee gersi coox koh ruubeyyo.

⁹ Yi mari yirgiqen coox bad fan baahelon. Tokkel tittat tuuy rikel axaw axawah hayya heenih, baddi-amol, atu yoh ruuba axcinnaan ikke fan, koh akah gufinnaan innah, abelon. Tokkel ifdigga heenih sin maral aceelon. Ahimih gidiyih yoo kee yi marah maaqo aceetto» iyye.

¹⁰ Tonnal Curam, sariida kee gersi cooxuk faxak suge gideh Suleemanah ruube.

¹¹ Ahih gidyatah, Suleeman, Curamah kulli sanatal morootom alfih kiis kamadik yeceeh, caxâ xaylok bicsen *zeytiy (saliidiy) agle sinnihiyyak kaadu affara boolih alfih litri yecee. Toh isi mara edde yaskame'gidih, kaah yecee.

¹² Curam kee Suleeman fanat wagri yeneh, nammayak isinni fanal bica haysiten. YALLI Suleemanah kas yeceeh; kaah cule xagana kaah duuduse.

¹³ Malik Suleeman inkih yan Israayil rasuk soddom alfih numuy baaxoh taamitaanam dirkik elle tenehiyyak migaq yuktubeh warkatal hee.

¹⁴ Too soddom alfih num, wadir tabna-tabna alfih hayya heeh, sidiica gexoh ken kure. Abbah keenik Adoniiram deqsita num hee. A sidiica gexoh heen tabna-tabna alfi yakke marak midu-miduh alsi gide Lubnaan rasul suggu 'yeenik lakal, namma alsa kaadu isinni buxal sugak yenen.

¹⁵ Suleeman wohuk kalah kaadu, qaleela mango rasul bacra-tabanih alfih numuy xeet baaxok tayyaaqeh massossahiyya kee, malcina-tabanih alfih numuy woo xeet yakkuqehiyya luk yen.

¹⁶ Ken tamsiisaah ken taamak amo wagita marak sidiica alfi kee sidiica boolih num amol keenik hee.

¹⁷ Suleeman ken elle amrise innal, baaxok xeet yayyaaqe mari, Yallih Qibaadah-Qarih rakiiboh hoonu waan meqe xeetiy nabahiyya yeyyeeqen.

¹⁸ Suleeman maraa kee Curam maray gabâ-naggaarinna luk yenehiyya kee, Biblos-magaalah mari, Qibaadâ-Qari edde xisoonu waan cooxih missoysiyyá kee xeetih-oriyyih bicsat gacen.