1 Aydaad 27 - NABUWWA KEE MALIKWA

QASKARIINO WAGITTA QAADAH TIYA

¹ Israayilih yooboke maray malikih taamitak yenehiyya yen. Osonuuy kedo kee gulub-gulubuk abbobti kee, alfi-alfi kee bool-boolul kurrunte qaskarak abbobtih yen mara kee, xintoh-abbobtih yenen. Ken taama macaay inteenik, qaskariino wagitta qaada abbootan luk yenen. Sanatal kulli alsa sissin exxay loowoh labaatanna kee affara alfih qaskariita takkehiyya taamitak ten.

^2-3 Too marak naharsi alsat heen marak abbah dooreenim, Dabdiyél-Yaasobqam deqsita numuuy; ta num Yuudah aabakuk yeneeh, Fares deqsita gulubut raaqak yen. Naharsi alsat qaskar-abbobti inkih kay gubat ten.

⁴ Nammayhaytoh alsa Dooday deqsita num doorime. Too num Acowi deqsita numih samadak ten. Miklot deqsita num kay gubal abbah heen.

^5-6 Sidochaytoh alsat sek Yoyadaq baxay Banaaya deqsitahiyya abbah heen. Too num kaadu «Yimixxige-Soddomul,» yaaxigen marak abbah yen. Kay baxay migaaqah Qammidabad deqsitak yenehiyya kay gubal abbah heen.

⁷ Fereyhaytoh alsat Qasahel abbah dooren. Qasahel, Yowab toobokoytak ten. Kay lakal kay baxay migaaqah Dabadya deqsitahiyya usuk abbah akak suge marak abba yekke.

⁸ Konoyhaytoh alsat Samhut abbah heen. Samhut, Yidrac deqsita numuk rade marak ten.

⁹ Laceyhaytoh alsat Qikkés-Qiira deqsita num abba yekke. Too num elle yoobokem, Takooqa deqsitta magaalak ten.

¹⁰ Malcinhaytoh alsat Celex deqsita num abbah heen. Too num akah aabakuk yenem, Efrayim deqsitta kedok ten. Elle yoobokem, Felon deqsitta magaalak ten.

¹¹ Bacarhaytoh alsat Sibkay deqsita num abbah heen. Too num elle yoobokem, Cuusa deqsitta magaalak ten. Akah aabakuk yenem, Yuudâ-kedooy; Dara deqsita gulubut raaqak yen.

¹² Sagalhaytoh alsat abbah dooreenim, Abiqeder deqsita numuk ten. Too num elle yoobokem, Qanatot deqsitta magaalak ten. Akah aabakuk yenem, Benyam deqsitta kedok ten.

¹³ Tabanhaytoh alsat Mahray deqsita num abbah heen. Too num elle yoobokem, Natoofa deqsitta magaalak ten. Gulubuk edde raaqak yenem, Dara deqsitta gulubuk ten.

¹⁴ Taban kee inikhaytoh alsat kaadu Banaaya deqsita num abbah heen. Too num elle yoobokem, Firqaton deqsitta magaalak ten. Akah aabakuk yenem, Efrayim deqsitta kedok ten.

¹⁵ Taban kee nammayhaytoh alsat abbah heenim, Celday deqsita numuk ten. Elle yoobokem, Natoofa deqsitta magaalak teneeh; gulubuk edde raaqak yenem, Qotniyel deqsita gulubuk ten.

ISRAAYILIK KEDOH ABBOBTI

^16-22 Israayil ummat xiinissu wayta xintoh abbobti kaadu reedisen. Ruuben deqsitta kedoh, Dikrí-Elqeeder migaq luk yen num xintoh abbah heen. Simqaan deqsitta kedoh, migaaqah Maqká-Safatya deqsitak yen num xintoh abbah heen. Leewi deqsitta kedoh Kamuwél-Casabya deqsitak yen num kee, Haaruunuk rade marah Saaduk deqsitak yen num xintoh abbobtih heen. Yuuda deqsitta kedoh, Dawud saqalah yen Eliihu deqsitak yen num xintoh abbah heen. Issakar deqsita kedoh, Mikaayíl-Qomri deqsitak yen num kee, Dablon akak iyyan kedoh, Qobadyá-Yismaqyaahu deqsitak yen num kee, tonnah kaadu, Naftaali deqsitta kedoh, Qadriyél-Yareemot deqsita num kee, Efrayim deqsitta kedoh, Qadadyaahû-Hosiqa deqsita num xintoh abbobtih heen. Ayrô-culma le kabut raqta Manasse deqsitta kedoh, Fadaayá-Ayyuqel deqsitak yen num kee ayrô-mawqa le kabut raqta Manasseh kedoh, Zakariyyá-Qiddo deqsita num kee, Benyam deqsitta kedoh, Abnér-Yaqsiyel deqsita num kee, Daan deqsitta kedoh, Yaroocám-Qadaral deqsita num xintoh abbobtih heen. Ta mari inkih Israayilik kedoh abbobtik ten.

²³ YALLI, Israayil ummat mangah qaraanal tan cutuukah gide abeyyo 'yaanam iyyeh yeneeh; tohuk gexxaamah Malik Dawud Israayil marak labaatanni sanatak addah yan qumri le marih loowok raaqeh yen.

²⁴ Yowab deqsita numuy Xaruya deqsitta barrah baxak yenehiyya, ayrok teena, Israayil ummat mangah takkeh gide yable'gidih loowo qimbise. Takkay immay amo akak tabba 'yeh duudussa mahanna. Too loowok gexxaamah, Yalli Israayil ummat digaaleh. Tohuk gexxaamah Israayil ummat mangah takkeh gide hununuh aaxaguk manannaay; tonna-leemiik ellecabo fanah, kulliimih caagid elle yaktuben kitaabal loowok yakkeenih gide tunkuttubeh mananna.

MALIK DUYYE WAGGA HAYTAAMAK ABBOOTAN LE MARA

^25-31 Tohuk kalah kaadu, malik dabaq kee duyye wagga haytaamak abbootan akah yeceen mari yen. Too marak addal kulli num isi taama keenik luk yen. Qadiyél-Qadmawet akak iyyan num malik-makdanwak inkih abbah yen. Qudiyyá-Yonaatan akak iyyan num inaytâ-magaalak afal raqta magaaloolih adda takkuu, gaandoodih adda takkuu, hinnay kaadu, megdebwah adda takku, duyye daanah elle yabbixen golittek abbah yen. Kalúb-Qedri akak iyyan num buqret taamitta 'ya marih cawal kee qasbi wagitta taamak abbah yen. Simqi deqsita numuy Raama akak iyyan magaalal yoobokehiyya, qinab xala cooxuk abbah yen. Dabdi deqsita numuy Safam deqsitta magaalal yoobokehiyya, kaadu qinab xala cooxih xaylok bicsan kamrih abbootan luk yen. Baqal-Caanan deqsita numuy Geder deqsitta magaalal yoobokehiyya, ayrô-culmat raqta mango koomaami le baaxol yan *daytuun xala coox kee *sublak abbah yen. Yooqas deqsita num caxâ xaylok bicsen *zeyti elle gaaboysan aracak abbah yen. Saaron deqsita aracal yooboke Sitray deqsita num kaadu Saaron-booxal yaloole laak inkih abbah yen. Qadláy-Saafat deqsita num kaadu daqoorul yaloole laak abbah yen. Oobil deqsita numuy Ismaaqilto deqsita marah aabakuk yenehiyya gaalak inkih abbah yen. Yecdayaahu deqsita numuy Meronot deqsitta magaalal yoobokehiyya inkih tan danoonah abbootan luk yen. Yaadid deqsita numuy Hagri-marah yoobokehiyya inkih tan illi kee wadarak abbah yen.

³² Yonaatan deqsita numuy Malik Dawud qammih yenehiyya fayu yecee kasloytah yeneeh; tonnah kaadu kaxxa baritto le numuk ten. Cakmooní-Yaciyel deqsita num malikik lab-xayloh barittoh abbootan luk yen.

³³ Acitoofal deqsita num kaadu malikih fayu yecee kasloytak ten. Qarka deqsita gulubuh yooboke Cuusay deqsita num kaadu malikik kataysay malik mala elle baahahiyyak ten.

³⁴ Acitoofal rabek wadir, Abiyataar kee Banaayá-Yoyadaq malikih fayu yecee mara yekken. Yowab malik qaskarak abbah yen.