1 Aydaad 25 - NABUWWA KEE MALIKWA

SAARE ABAK YEN MARA

¹ Malik Dawud kee kedoh abbobti, Yallih qibaada elle aban ikkel, woo qibaadak foocat gacca 'yeh absiisu waa maray Leewih yoobokehiyya dooren. Asaf kee Heeman kee Yedutun deqsita sidooca gulub akah dooreenim, *kiraraay *begena kee giyaagib aagaruk, Yalli iyyem sinaamah warsaanamih qaadak ten. Toh abu waa mari ah kaana.

² Naharak dooreenim, Asaf xaylok lab-xayloh fereeyi. Too mari migaaqah Dakkur kee Yuusuf kee Natanya kee Asareela deqsitak yenen. Ta mara amrissaah elle aban inna ken taybulleem, Asafak ten. Asaf Yalli iyyem saarê-gurral warsa'gidih, doorime numuk ten. Asaf amrissam, malikik ten.

³ Ta marak kalah kaadu tahah doorintem, Yedutun deqsita numih lab-xayloh laceeyik ten. Migaaqah Gedalya kee Xeri kee Yasaqya kee Simqi kee Casabya kee Mattitya deqsitak yenen. Foocat keenik gacca 'teh ken absiisak tenem, ken abbak ten. Oson Yalli iyyem saarê-gurral ummat aysixxiguk yenen. Toh yaysixxigen waqdi begena aagaruk Yalla faylisak candu kaah gacisak yenen.

⁴ Tonnah kaadu too saaku doorintem, Heeman deqsita numih lab-xaylok taban kee fereeyik ten. Migaaqah Bukkiyaahu kee Mattanya kee Quddiyeel kee Sabuuwel kee Yerimot kee Cananya kee Canaani kee Eliyaata kee Giddalti kee Romamti-Qeder kee Yosbakaasa kee Mallooti kee Cootir kee Macdiyot deqsitak yenen.

⁵ Heeman deqsita nabiy Yallih farmo Dawuduh baahak yenehiyyat Yalli hee barkatah xaylok tama gide luk yen. Say-xaylok kaadu sidoc luk yen. Yalli Heemanak rade marah qande aceeleemih xagana kaah culeh yeneeh; too xaganah xaylok tama gide kaah yeceeh yen.

⁶ Kaak lab-xaylo inkih giyaagib kee kirar kee begena digirak teneeh; usuk isih foocat keenik gacca 'yeh, Qibaadâ-Qaril YALLA yaqbuden waqdi, ken absiisak yen. Asaf kee Yedutun kee Heeman ta taamay keenil yeceenihiyya amrissam malikik ten.

⁷ Ta mara kee wohuk kalah yen maray keenih ramad lehiyya tittat mangah namma bool kee bacra-taban kee bacra num akkuk yenen. Oson inkih tahimih abittol nagay tan ixxiga luk yeneeniih; Yallih saare aban waqdi yaaguren duyye nagay barteenih yenen.

⁸ Ta taamah abittoh yamaaten waqdi, qunxa furraynu yakkay, idaltu yakkay, hinnay kaadu, a taamah abitto dumaak aaxaguk suge num takkay, woo way qusbih barta num takkay, taama abaanamak naharal saami caxxa elle qidda haanah saami elle awqinnaan mari abak yen.

^9-31 Ta namma bool kee bacra-taban kee bacra num gulub-gulubuh labaatanna kee affara exxah heenih yenen. Kulli exxa taban kee namma num keenik akkuk teneeh, kulli exxaay isi abba keenik luk ten. Ken migooqaay saami caxxi elle qiden inni, ah kaa. 1. Yuusufuy Asaf buxah marak rade 2. Gedalya 3. Dakkur 4. Xeri 5. Natanya 6. Bukkiyaahu 7. Asareela 8. Yasaqya 9. Mattanya 10. Simqi 11. Qadarel 12. Casabya 13. Sabuuwel 14. Mattitya 15. Yerimot 16. Cananya 17. Yosbakaasa 18. Canaani 19. Mallooti 20. Eliyaata 21. Cootir 22. Giddalti 23. Macdiyot 24. Romamti-Qeder.