1 Aydaad 24 - NABUWWA KEE MALIKWA

SEEKA TAAMA ELLE ABEN INNA

¹ Haaruun kee Haaruunuk rade marih nasab elle yan inni, ah kaana. Naharak Haaruun lab xaylok ferey luk yen. Too ferey, Nadab kee Abiihu kee Alqedar kee Itaamar deqsitak yenen.

² Nadab kee Abiihu, abba keenik addunyal yan saaku rabeeniih; xaylo macabinnon. Ken toobokoh nammay, Yalli elle iyye'nnal, seeka yekken.

³ Dawud, Haaruunuk radde seeka butta-buttah hayya heeh aboonu waan taama keenih warse. Ta marah aboonu waan taama yaaxigeenim kee, woo taama ken gabal haanamih tiyal, Haaruunuk baxah yen Alqedarak rade Saaduk deqsita sek kee, Haaruunuk baxah yen Itaamarak rade Acimalek deqsita sek kaa elle cate.

⁴ Sek-Alqedar-duruyyat taban kee laca gexoh kuren. Itaamar-duruyyat kaadu bacra gexoh kuren. Alqedar-duruyyat taban kee laca gexoh akah kureenim, kaak rade gulub Itaamarak rade gulubuk manguk yen.

⁵ A namma marih addat inkihii, Qibaadâ-Qarih abbobti kee, awliyah yan mari yeneeh; tohuk gexxaamah ken gabal taama haanamak naharal aboonu waan taamah saami caxxa qiden.

⁶ Saami caxxa, marahaay, waqdi keenih qiden. Tohuk lakal Netanél-Samaqya deqsita numuy Leewih yoobokehiyya ken yiysibixen taama migooqa keenik yuktube. Malik Dawud kee kay gubal ten doolat abbobti kee, sek Saaduk kee Abiyatáar-Acimalek kee seekâ-kedoh-abbobti kee, Leewih yooboke maray wokkel suggu 'yehiyya inkih, tohumul sumaaqah raaqen.

^7-18 Saami caxxi elle yewqe marih migooqa ah teeti. Naharsi num migaaqah Yehoyaarib deqsitak yen. Nammeyhaytô-num migaaqah Yadaqya deqsitak yen. Sidochaytô-num migaaqah Caarim deqsitak yen. Fereyhaytô-num migaaqah Seqoorim deqsitak yen. Konoyhaytô-num migaaqah Malkiya deqsitak yen. Leceyhaytô-num migaaqah Miyyamin deqsitak yen. Malcinhaytô-num migaaqah Hakkox deqsitak yen. Bacarhaytô-num migaaqah Abiyya deqsitak yen. Sagalhaytô-num migaaqah Yaasuwa deqsitak yen. Tabanhaytô-num migaaqah Sekaniya deqsitak yen. Taban kee inikhaytô num migaaqah Elyaasib deqsitak yen. Taban kee nammeyhaytô num migaaqah Yaakim deqsitak yen. Taban kee sidochaytô num migaaqah Cuffa deqsitak yen. Taban kee fereyhaytô num migaaqah Yesebqab deqsitak yen. Taban kee konoyhaytô num migaaqah Bilga deqsitak yen. Taban kee leceyhaytô num migaaqah Immar deqsitak yen. Taban kee malcinhaytô num migaaqah Ceedir deqsitak yen. Taban kee bacarhaytô num migaaqah Haffixxex deqsitak yen. Taban kee sagalhaytô num migaaqah Fatacya deqsitak yen. Labaatanhaytô-num migaaqah Yacedkel deqsitak yen. Labaatanna kee inikhaytô num migaaqah Yaakin deqsitak yen. Labaatanna kee nammeyhaytô num migaaqah Gamul deqsitak yen. Labaatanna kee sidochaytô num migaaqah Dalaaya deqsitak yen. Labaatanna kee fereyhaytô num migaaqah Maqadya deqsitak yen.

¹⁹ Akak raden Haaruun keenih yeyyeeqe madqa elle inta'nnal, ta mari midu-miduh YALLIH Qibaadah-Qarih addal faxximta taama abeeh; YALLAY Israayil doore Dagelta kinnihiyya isih, Haaruun ta taama elle aban inna amriseh suge.

²⁰ Raaqe maray Leewih yoobokehiyyak migooqa, ah teeti. Qamram xaylok Sabuuwel deqsita numu; Sabuuwel xaylok Yecdayaahu deqsita numu.

²¹ Recabyak rade marak saqalay foocat yanih tenem Yissiya deqsita numuk ten.

²² Yixharak rade marak Seloomot deqsita numu; Seloomot rade marak Yacat deqsita numu.

²³ Cebron xale xaylok Yeriyaahu barah inkih afat keenik yeneeh; kay lakal Amarya ciggiilak yen. Amarya lakal Yacadiyel anuk yeneeh, Yacadiyel lakal kaadu Yekamqam yen.

²⁴ Quddiyeel xaylok, Miika deqsita numu; Miikâ-xaylok Saamir deqsita numu.

²⁵ Miika toobokoytah yen Yissiya; usuk xale xaylok Zakariyya deqsita numu.

²⁶ Maraari lab-xaylooy Macli kee Muusi kee Yaqdiyaahu deqsitak yenen.

²⁷ Maraari rade Yaqdiyaahu-xaylok Sooham kee Dakkur kee Qibri deqsitta labha.

²⁸ Macli xale xaylok Alqedar deqsita numuuy, lab-xaylo luk mananna.

²⁹ Keesik rade marak Yeracmaqil deqsita numu.

³⁰ Maraari xaylok nammayhaytô-baxay migaaqah Muusi deqsitak yenehiyya Macli kee Qeeder kee Yerimot xale. Ta mari inkih Leewi deqsitta kedoh abbobtih yen.

³¹ Keenih ramad le maray Haarunuk radehiyya elle aben innal, saami caxxa keenih qiden. Saqalah yen numuk rade mara takkuu, qunxa toobokoytah yen numuk rade mara takkuu, taama abaanamak naharal saami caxxa elle qidda haanah saami elle awqinnaan mari abak yen. Malik Dawud kee Saaduk kee Acimalek kee, seekah abbobti kee Leewî-kedoh-abbobtiy wokkel sugga 'tehiyya inkih, tohumul sumaaqah raaqen.