1 Aydaad 19 - NABUWWA KEE MALIKWA

DAWUD, QAMMON KEE SUURIYAH MARAK YEYSEH

¹ Waqla suggu 'yeenik lakal, Qammon rasih malikih yen Nacas rabeeh; kay baxay migaaqah Cannun akak iyyaanahiyya kay aracal malik yekke.

² Dawud too malikih raba yoobbe waqdi, «Usuk meqem yoh abeemih; anu away kaadu kay baxah amqeyyo» iyye. Sarrak kaah le bagi maqaane kaah warisu waa mara Nacas baxah farmo ruube. Farmoh ruube mari kay baxay malik yekkehiyyal gexen.

³ Too mari Qammon-baaxo gufe waqdi, Qammon marih abbobti malikik inteemih, «Amoytaw, away Dawud a mara akah ruubem nummah ku abbah assakaxxiyyah kot celtaa? Ku abbah taqdiyyah ken maruubinnay; sarrak qeebil nek akah yayse'nnah, ni baaxo elle tani'nna gibittaay cubbussa heenih gexaana'gidi» kaak iyyen.

⁴ Cannun too yab yoobbe waqdi, Malik Dawud ruube marak deben mollaay sartanay edde sugeenihiyya xiiqarel keenik qanxissa heeh ken xiiriye.

⁵ Too marat toh tekke waqdi, isinni baaxol woo ceelot yaduureenim kaxxa wacarriy keenil tekke. Dawud a xaagu yoobbe waqdi, «Annah, buxa fanah maaduurinay, deben siinih ubukka 'yam fanah Yerikô-magaalal suga» 'yaanam keenih ruube.

⁶ Sarrak Cannun kee kay mari, Dawud naqabu xaamiteenim isinnik yeexegen. Tohuk gexxaamah, Daga raqta Mesbotaamiyah rasu kee, tonnah kaadu, Suuriyah mari elle suge Maqka kee Xooba deqsita namma rasuk faras-gaari kee woo gaarih amok qeebi abta labha bahsiisen. Too mara lakqot xaameeniih, soddom kee affara alfih kiilo lakqok akah yeceen.

⁷ Soddom kee namma alfih faras-gaariy kirah baaheeni kee, Maqka deqsita rasih malik kee kay qaskar temeeteeh, Medaba deqsitta magaalah xaqul yiffidigen. Qammon mari kaadu, elle enna 'ya ikkek, qeebih yewqeeh bical gace.

⁸ Dawud a mari aba bica kee tikki 'taamih xaagu gee waqdi, Yowab kee qaskar inkih qeebih ruube.

⁹ Qammon mari qeebih daqaarimeeh, Rabba deqsitta magaalay inaytâ-magaalah luk yeneenihiyyah culmal qeebi akak aboonu waan aracal gacen. Ken catoh temeete malikwah tu gactek, qeebih barrih tan baaxoy qeebi akak aboonu waanahiyya yibbixen.

¹⁰ Tohuk lakal Yowab, naqboytit-qaskar fooca kee salafak gacca 'teh qeebi keenit abtu waytam yuble waqdi, Israayil qaskarak inkih tayse qaskar doorru heeh, Suuriyah qaskarat fooca kee foocah eyseddi hee.

¹¹ Raqqa 'te qaskarak Abiisay deqsita kay toobokoyta abbah akak hayya heeh, Qammon-qaskarat foocah raaqa arac ken yibbixsiise.

¹² Too waqdi Yowab toobokoytak iyyemii, «Suuriyah mari qeebil yok yaysem tublek, catoh yoh amaatetto. Qammon mari kok yaysem ublek, catoh anu koh amaateyyo» iyye.

¹³ Kaadu qagseh kaak iyyeemih, «Agiru tikay digga xic. Ninni mara kee ni Dageltih magaaloolih nagay yan qeebi abnaama. Ellecabol YALLI isih loowem akkele» iyye.

¹⁴ Yowab kee kay mara qeebih dadahte waqdi, Suuriyah mari kudeh.

¹⁵ Suuriyah mara kudah yublen waqdi, Qammon mari kaadu Abiisayak yoowweeh, magaalah adda culen. Tohuk wadir Yowab Yarusalaam magaala fan yuduure.

¹⁶ Suuriyah mari qeebil gacem isik yuble waqdi, Suuriyah maray Furaatak woo kabul sugehiyyah farmo ruubeenih, qaskar baaheeniih; too qaskarak abbah Soobak deqsita numuy Malik Hadad-Qeder qaskarak abbah yanihiyya heen. Hadad Qeder akak yemeetem, Xooba deqsita aracak ten.

¹⁷ Malik Dawud ta xaagu elle gee'kkel, Israayil qaskar gaabossa heeh, Ordon weeqaytuk woo qaxa raqta exxal, Suuriyah qaskarat fooca kee foocah gacca 'yeenih, qeebi elle aban arac ken yibbixsiise. Tohuk lakal qeebi radeeh;

¹⁸ sarra, Suuriyah qaskar wadir-wadirih toowwe. Too qeebil Dawud kee kay qaskar, faaris-gaariirat qeebi aba marak malcina alfih qaskariita qideeniih, ibi qaskarak kaadu, morootom alfih qaskariita keenik qiden. Suuriyah qaskarak abbah suge Soobak kaadu edde qiden.

¹⁹ Malik Hadad-Qeder gubat sugte malikwa Israayil mari carbil keenik yeysem yoobben waqdi, Dawud lih bica haysiteeniih, kay gabah gacen. Tohuk wadir Suuriyah-mari Qammon-mara carbil cataanamak raaqen.