1 Aydaad 18 - NABUWWA KEE MALIKWA

DAWUD DARIIFAL YAN MARAK QEEBIT YEYSE

¹ Waqla suggu 'yeenik lakal, Malik Dawud Filistiin marat qeebi abeeh too qeebil keenik yeyse. Filistiin mari elle suge Gat magaala kee tet dariifal tan mandarwa keenik raaqiseeh isi gabat hee.

² Too marak kalah Mooyab marat qeebi abeeh, isi gubat ken hee. Tohuk wadir too mari gabbara kaah acayuk yenen.

³ Suuriyah malikiy migaaqah Hadad-Qeder deqsitak yenehiyya Furaat weeqaytuk daga raqta exxat raqta baaxo isi gubat gacsa'gidih gexak suge waqdi, Dawud qeebi kaat abe. Hadad-Qeder, Xooba deqsita rakaakayak abbah yen. A rakaakay elle geytimam Cammat deqsita rakaakayih xaquk ten.

⁴ Dawud qeebi edde aban gaariirak alfiiy, tonnah kaadu, malcina boolih qaskaritay faras amok qeebi abahiyya kee, ibi qaskarak malcina alfih num kaak yibbixe. Woo faarisik bool takkem gaari edde beya'gidih raaqiseeh, raqqa 'te faariisa xukcuunul yiggileeh iba waysiise.

⁵ Dabaaqah Damaskol yen Suuriyah mari, Malik Hadad-Qeder catoh qaskar ruubeeniih; Dawud qeebil labaatanna kee namma alfi takke qaskar keenik qide.

⁶ Sarrak Damaskoh-rasih addal isi qaskar hee. Tohuk wadir too mari kay gubat gaceeh gabbara kaah acayuk raaqe. Dawud qeebi elle abinnaan ikkel, YALLI nasri kaah yecee.

⁷ Dahabak bicsen mango goobway Hadad-Qederit dacayrih ten qaskar luk sugtehiyya Yarusalaam magaala fan dannabah keenik bee.

⁸ Tohuk kalah kaadu, nacaasak bicsen duyyek mangom raaqise. Too duyye akak beem, Tibhat kee Kun deqsitta namma magaalay Hadad-Qeder malikih elle sugehiyyak ten. Suleeman, Yallih Qibaadah-Qarih addal ten qamidwa kee kaxxa tanak kee, tonnah kaadu, nacaasak bicissa heen duyyeeyay Qibaadâ-Qarih-taama edde abak sugeenihiyya woo nacaasak bicsiise.

⁹ Sarrak Hamat-rasul yen malikiy Tooqi deqsitahiyya, Dawud, Hadad-Qeder qaskarak inkih yeyseh 'yaanam yoobbe waqdi,

¹⁰ isi baxay migaaqah Yooram deqsitahiyya kaal ruube. Too baxak iyyeemih, «Naharak, ‹Salaamata kok iyye› kaak inxicaay, sarrak ‹Unkaq kok iyyeh, Hadad-Qederik qeebil teyseemi kok iyye› kaak inxic. A duyyey dahab kee lakqo kee nacaasak bicseenihiyya gabat kaah beyaay, ‹Mattacoh koh ruube› kaak inxic» iyye. Hadad-Qeder mango waqdi Tooqi deqsita malikit qeebi abak suge.

¹¹ Malik Dawud too duyyey too malik kaah ruubehiyya YALLIH qibaadah tuxxiiqit elle assa'nnah abe. Tohuk kalah Edom kee Mooyab kee Qammon kee Filistiin kee Qamaalek deqsita maray qeebil akak yeysehiyyak dannabah orbise dahab kee lakqo, ta duyye lih hayya heeh, YALLIH qibaadah tuxxiiqit elle assa innah abe.

¹² Xaruya deqsitta barrah baxay migaaqah Abiisay deqsitak yenehiyya, ‹Qasbô-Golo› deqsita aracal Edom marat qeebi abeeh, too qeebil taban kee bacra alfih num keenik sele.

¹³ Sarrak inkih yan Edom rasul qaskar heeh, tohuk wadir tokkel suggu 'ye mara Dawud gubat hee. Dawud elle gexinnaan ikkel abinnaan qeebil YALLI nasri kaah acayuk yen.

¹⁴ Tonnal Dawud inkih yan Israayil rasuk amoyta yekkeeh; abbah akak yan mara inkih cakki kee qadaalatat xiinisak suge.

¹⁵ Yowabay Xaruya deqsitta barrah baxah yenehiyya qaskarak inkih abbah yen. Aciilúd-Yacoosafat deqsita num tikka intem yaktube numuk ten.

¹⁶ Aciitúb-Saaduk kee Abiyatáar-Acimalek diini abbobtih ten. Sawsa deqsita num kaadu malikik kutbe-abeenah yen.

¹⁷ Yoyadáq-Banaaya kaadu Dawud dacayrih tan qaskar abbah yen. Woo qaskar marin marak ten. Tohuk kalah kaadu, Dawuduk lab-xaylo kay gubal kaxxa abbootan luk ten.