1 Aydaad 17 - NABUWWA KEE MALIKWA

YALLI DAWUD LIH HEE QAHDI

¹ Tohuk wadir Malik Dawud buxah isi qaril yen. Ayrok teena nabi Naatanak iyyemii, «Anu akkel akah table'nnah, innih, sariidâ-cooxuk bicsen qarih addal ani'mmay, YALLIH Qahdih-Sandug uxih siraq addat yanik. Ahak maca abam tayse?» kaak iyye.

² Too waqdi Naatan kaal gacsemii, «Yalli lih yanim kook, kot ceelinnaanim ab» kaak iyye.

³ Takkay immay too bar Yalli Naatan lih yaabeeh iyyeemih,

⁴ «Gexay, yi naqasu Dawuduk intaamah, ‹YALLI anu addat akak gacu waa qari yoh xissu waytam koo hinna, kok iyyah yan› kaak inxic.

⁵ Israayil mara Masrik eyyeqqa heemiiy a saaku fanah Qibaadâ-Qarit magaciyyo. Kulli way siraq addat sugeeh, aracaak arac too siraq addat gexak suge.

⁶ Israayil mara lih mango safar abe immay, ahaydumah Israayil abbobtiy innih reedisehiyyak, ‹Qibaadâ-Qariy sariidâ-cooxuk bicseenihiyya macah yoh bicise waytan?› akak exce abba mayyu.

⁷ «Tonna'mmay taway yi naqasu Dawuduk intaamah, ‹YALLAY Nabaamak Nabahiyya kok iyyaamah, Edde sugte illi duwak kalla koo heeh, Israayil ummatay yi marah tanihiyyah abba koo abe.

⁸ Atu gexinnaan ikke ko'lih gexak suge. Atu fooca fanah akah gutuqta'nnah, naqboytiitik qeebil koo aysiisuk suge. Uxih a addunyah bagul kaxxa migaq-gexxo le marak kaxxih, kaxxa migaq kot heeyyo.

^9-10 Israayil ummattay inni mara abehiyya sinam keenit xukkute'kal, elle gacoonu waan aracal ken nookiseh an. A baaxo culeenim kee akke fan umeynit qeebi keenit abak sugte'mmay, ahak wadir woh gaba kalele. Koo kaadu naqboytiitik iysissa koo heeh, buxa innih koh xiseyyooh, ramad kok aymaggeyyo.

¹¹ Atu rabtaah isi kaxxa abbobti lih tamoogoqu wayta saaku, ku xaylok numuk teena malik abeyyooh, kay reeda qande bahsiiseyyo.

¹² Qibaadâ-Qari yoh xissu waytam, ku xaylok too numu. Kay reeda baxak baxal akah raqta'nnah abeyyo.

¹³ Anu innih abba kaah akkeyyooh; usuk kaadu baxi gideh yok gacele. Saawuluy atu arac akak raaqissehiyyak akah abe'nnah, abak suge cato kaak margiqa.

¹⁴ Inni mara kee inni dardaarinnak abbah kaa heeyyo; kay dardaarinni baxak baxal raaqele; kay doolat kulli way waarele› kaak inxic» iyye.

¹⁵ Sarrak Naatan amma 'yeh Dawuduh YALLI ta wacyil kaak iyyem warse.

¹⁶ Tohuk lakal Malik Dawud siraq adday YALLA-elle-yaqbudeenihiyya culla 'yeeh, tokkel daffa 'yeh fayla kee dooqa abe. Iyyeemih, «YALLAW, yi Dageltaw, anu a axxul le maqaaney yoh abtehiyya geyam caddik le num hinniyo. Yoo kee yi buxah marak atu neh abteh tan maqaane, ni caddik fulta maqaane.

¹⁷ Yallaw, a saaku inkinnah duma neh abteh sugte maqaanek giffa 'ta maqaane neh abte. Yi ramadah kaadu sarrî-dabaanal abtu waytaamat yabteh. YALLAW, yi Dageltaw, kaxxa numuh yoo tablem asmiteh an.

¹⁸ Yooy ku naqasuh yanihiyya isih taaxigeeh, kinniyo num yok tasmiteh immay, YALLAW, toh aaxagih kaxxa num yoo abte. Anu ahak maca axco!

¹⁹ Aham, atu xagnisseeh isih yoh faxxeemiy yoh abtu waytaama. Sarrah yan dabaanal yok radu waa mara kaxxa mara abettom isi fayxiik yoh warisseh.

²⁰ YALLAW, ku bis lem matan. Yalli dibuk koo kinnim dumaak aaxaguk sugne; kok sah Yalli mayana.

²¹ Israayil ummattay isi mara abta'gidih naqoosinnak teyyeeqehiyyah bis le doolat addunyâ-bagul matan. Atu keenih abte kaxxa taama ku migaq addunyâ-bagul fayya hayte. Ku maray duma Masril edde suge naqoosinnak teyyeeqehiyya qeebil bisoh gutuqak elle yamaateenimil, ken taagah kalih mara baaxok teyyeeqe.

²² YALLAW, Israayil mara isi maray way ayxeere waytahiyya abte; isih Dagelta keenih tekke.

²³ «YALLAW, yoo kee yi marah culte xagana xagur. Abeyyo intem neh ab.

²⁴ Tonnal ku migaq antaabbeleeh, sahda inkih, ‹YALLAY Nabaamak Nabaah, Israayil ummatak amol yanihiyya, Israayil doore Dagelta kinni› 'yaanam axcelon. Yi dardaarinna kaadu baxak baxal ku foocal raaqa dardaarinnay baye waahiyya abetto.

²⁵ Yi Dageltaw, yoh abtu waytam yoh warisseeh, yi durruyyat dardorti abtu waytam yoh warisse. Tonna-leemiik a dooqa edde aba niya yot gacte.

²⁶ YALLAW, atu Yalla kinnitooh; yooy ku naqasu kinnihiyyah muxxo le xagana culte.

²⁷ Yok radda inteemih reeda baxak baxal akah raqta innah, isi barkat keenit hay. YALLAW, tah kaadu atu isih xagana akah culteemi. Tonna-leemik, atu elle inte innal, yooy ku naqasuh yanik radda 'ya marat barkat kulli way heettom aaxigeh» 'yaanam iyye.