1 Aydaad 13 - NABUWWA KEE MALIKWA

QAHDI-SANDUG YARUSALAAM BEYAANAM FAXEN

¹ Malik Dawud alfi-alfi kee bool-boolul kurrunte qaskarak abbobtih yen mara lih malloysiteeh,

² sarrak inkih tan Israayil ummatta yiysixxigeemih, «Isin oggolteeniih, YALLAY ni Dageltah yani kaadu ne'lih edde yengeleh yenek, inkih yan ayyuntay neh yaabukehiyyay aham fanah ahat ne'lih ane waa kee, seeka kee Leewih yooboke marah, ken magaalooli kee lacah meqe baaxo fanah farmo keenih rubba hayneh, ‹Akke nee fanah amaay, inki aracal gaabownay› 'yaanam keenik innay.

³ Sarrak kaadu Yallih-Qahdih-Sanduguy Saawul dardaare saaku amo akak wagte weenihiyya akke fan bahnay» 'yaanamah mala keenil baahe.

⁴ Ta mala yoobben waqdi yossokooteeniih, «Nabam meqe» 'yaanam iyyen.

⁵ Tohuk wadir Dawud Israayil ummatak, Masri cuduuduk gabbi-qaxat raaqa aracak, Camat deqsita daabay kilbat le kabut raqtahiyyah amma 'yaanam tan dabaaqah yan marak, «Gaaboowa» 'yaanamih seeco abe. Too seeco keenih akah abem, Yallih-Qahdi edde yan Sandug Kiryat-Yaqaarim magaalak Yarusalaam fan baahaana'gidik ten.

⁶ Sarrak Dawud kee too mari YALLIH-Qahdih-Sandug baahaana'gidih, duma Baqla deqsitak ten magaalay sarra Kiryat-Yaqaarim 'yaanam migaaqah akah yeyyeeqeenihiyya gexeeniih; too Sandug Yarusalaam fanah baahen. Kiryat-Yaqaarim elle tenem, Yuudâ-rasuk ten. Too sanduguy Yarusalaam fanah baaheenihiyya migaq akak lem, YALLAY dardaarinni-korsi akak galwa leemik daga le kabu raqtahiyya.

⁷ Sandug elle sugem, Abinadab deqsita numih qarik teneeh; too qarik eyyeqqa heeniih, qusba gaariy awurwa giitak beytahiyyah bagul heen. Gaarik foocat Qudda kee Acyo deqsitta namma num gacte.

⁸ Takkay immay Dawud kee raqqa 'ye mari a sandug elle beyaanamal, Yallih-massakaxxah quuruk loonumuuk argaduk yemeeten. Afak Yallih saare edde haakaay wallitakaay *begena kee kiraraay giyaagib kee karambooy *baanta aagaruk yemeeten.

⁹ Kidon deqsita num luk suge aracay darok caffa elle baxsaanahiyya gufen waqdi, Sandug edde tan gaari giitak beyak sugte awurwa tondofoofole. Too waqdi Qudda gaba akah matriseh Sandug radaamak gabah yibbixe.

¹⁰ Takkay immay a Sandug gabah xagem YALLIH bagcarra kaah xalteeh, edde rabe. Tokkel elle Yallih foocal rabe.

¹¹ Dawud, YALLI bagcarriteh Qudda digaalem yuble waqdi yinqibeh. Tohuk wadir too aracak Fares-Qudda axcuk raaqen.

¹² Tohuk wadir Dawud Yallak meysitak raaqeeh, «Ahaysa, YALLIH Qahdi adda akak yan Sandug yi magaala fan beyam matakka» iyye.

¹³ Sarrak woo Sandug Yarusalaam fanah beyaamak raaqeh; Yoobad-Edom deqsita numuy Gat magaalal yoobokehiyyah buxal cabe.

¹⁴ Too numih buxal too sandug sidooca alsa suge. YALLI Yoobad-Edom kee kay buxah maraay usuk edderra heemit barkat hee.