1 Aydaad 10 - NABUWWA KEE MALIKWA

MALIK SAAWUL AKAH RABE'NNA

¹ Filistiin mari, Israayil marat Gilbowaq-Qale deqsitta qaleh amol qeebi aben. Too qeebit Israayil marak mangom rabteeh wohuk raqtem toowweh.

² Takkay immay lakak ken ayradduk eybeebexxa heenih Saawul-lab-xaylok Yonaatan kee Abinadab kee Malkisuwaq deqsitta labha qiden.

³ Qeebi rade waqdi Saawul elle suge kabul kaxxam qilsuk yeneeh; tonna-leemik Filistiin qaskar rubteh tan gaysê-baxat kaxxam mudduumeeh madaluh raaqe.

⁴ Too waqdi silac kaah akkuquk suge furraynuh yan numuk iyyeemih, «A diini-maleelah tan Filistiin ummatta yoo qiddeh yol tirtirissaamak, ama tikyal lito seefit yoo qid» kaak iyye. Takkay immay woo furrayni seefit kaa qidu meysih yeffereh. Toh yuble waqdi Saawul isi seef siibba heeh is edde qide.

⁵ Taaxige furrayni Saawul rabem yuble waqdi, isi seef siibeh isit heeh edde rabe.

⁶ Tonnal Saawul kee Saawul lab-xayloh sidoc inkih rabteeh; kay dardaarinni tokkel gaba kale.

⁷ Israayil maray Yidraqel-Daqar deqsita daqaral dabaaqah sugehiyya Israayil-qaskar kuddeeh, Saawul kee kay xaylo rabteh 'yaanam yoobben waqdi, dabaaqah elle sugen magaalooli cabba heenih kudeenih. Sarrak Filistiin-mari yemeeteh woo magaalooli keenik yibbixe.

⁸ Qeebi gaba kalek lakal ciggilta ayro Filistiin mari qeebit rabe marak duyye seelebaana'gidih yemeeten waqdi, Saawul kee kay xayloh sidocuy Gilbowaq-qaleh amol qangalaylut tanihiyya keenih sugte.

⁹ Too waqdi moyya kaak kallaay xaqul kaak suge silac seelabba heenih gexen. Yalla 'yeenih yaqbuden duyyeeyay sahda gabak bicissehiyya elle yaqbuden qaril yan mara kee, isinni ummatah a xaagu warisu waa mara ruuben. Too mari ta xaagu beya'gidih gexeeh, a xaagu ummatat qiden.

¹⁰ Sarrak kay silac, oson xeet kee cooxuk bicsen duyyeh qibaada elle aban qarwak tiyak teenal heeniih, kay moyya Dagon akak iyyaanamay yallah loonuhiyya elle yaqbuden qarit takaren.

¹¹ Yaabes deqsitta magaalay Gilqad rasih addal geytintahiyyal yan mari, Filistiin mari Saawul lafak abeenim yoobben waqdi,

¹² agiirah keenik yan mari doorimma 'yeeh Saawul kee kay xayloh lafa elle tani ikke gexeenih, Yaabes-magaala fanah baahen. Too marih lafa, too magaalal ten kaxxa caxah gubal yoogoqen. Sarrak ken rabih rookah malcina ayro soomuh sugen.

¹³ Saawul wonnah yan raba akah rabem, YALLAL faxxiimak yen imaan agaagul kaak yekkeemih rabe. YALLIH amri cineeh, YALLAL imaan haam hinna'mmay, rabe marih roocaaniyyal fayu esseraanam taamah haysite.

¹⁴ YALLAL fayu messerinna. Tonna leemiik YALLI uma rabah kaa qiddaay kay dardaarinna Yiisâ-baxa Dawud gabal hayya hee.