Yohani 2 - ULufingwi uLupwa

Umulyo uwa winga mu Kaana

¹ Lwe ayanga izyo, isiku ilya vhutatu, kwáli umulyo uwa winga we wávhombesile mu nkaaya iya Kaana, mu shigavho isha nsi isha Galilaaya. Ku mulyo uwo unyina uwa Yeesu woope áliipo.

² UYeesu na vhasundikwa vhaakwe vhoope vhálanjiliilwe, vháliipo pa winga uwo.

³ Lwe ahavhaliilizyo hatuuha, idivaayi yihasila, pe unyina uwa Yeesu ahamuvhuuzya umuvuli waakwe ahati, “We mwana waane, idivaayi yaasila.”

⁴ UYeesu ahamwamula ahati, “We maayi, shooni she ukumbuuzya izyo? Ahavhaliilizyo haane hashiili kufiha.”

⁵ Pe unyina ahavhavhuuzya avhavhomvi vhe vhahavhavhombelaga avhajeni pa mulyo ahati, “Zyonti zye uYeesu avhavhuuzya, muhavhombaje.”

⁶ Ipo páamile insonta 6 zye zyágomviilwe na mavhwe. Insonta izyo aVhayuuda vhahavhishilaga aminzi aga kuyizelufwa, kulandatana na maata gaavho. Insonta yooka yihizulaga amadebe gasaano poosye 6 ishi aga minzi.

⁷ Pe uYeesu ahavhavhuuzya avhavhomvi vhaala ahati, “Yiizuzyi aminzi mu nsonta izi.” Pe vhahatapa aminzi nu kwizuzya mu nsonta izyo kufishila pe pamwanya.

⁸ Pe uYeesu ahavhavhuuzya ahati, “Tapi aminzi gamo musogole muumupe umupiti uwa mulyo uwa winga.” Vhoope vhahatapa aminzi nu kusogola kuumupa umupiti uyo.

⁹ Umupiti uwa winga ahamwela aminzi gaala ge uYeesu ápezile agagaluliinye kuvha divaayi. Uweene atámanyile kwe gafumile, ileelo avhavhomvi vhe vhátafile aminzi vhámanyile kwe gáfumile. Pe ahamwita we akwimala.

¹⁰ Lwe ayinza, umupiti uyo ahamuvhuuzya ahati, “Umuntu wonti ku vhwandilo akusengaanya idivaayi inyinza, ileelo lwe avhantu vhamwela vhiikuta, kumpeleela akwinza ni divaayi ye te nyinza. Ileelo iwe waleeta idivaayi inyinza poosye na kumpeleela vhweleele!”

¹¹ UYeesu ávhomvile ishilolesyo ishi mu nkaaya iya Kaana, mu shigavho isha nsi isha Galilaaya. Ishilolesyo isho she sháamile sha kwanda kuvhomba, kulolesya uvhushindamu vhwakwe ku vhantu. Kufumiilana niilyo, avhasundikwa vhaakwe vhahamwitiha.

¹² Lwe umulyo uwa winga waasila, uYeesu ahasogola mu nkaaya iya Kapelanawuumu pooka nu nyina, na vhanine vhaakwe avha shanaavuli na vhasundikwa vhaakwe. Vhahatendama ukwo insiku nyinsi.

UYeesu akuyizelufwa iNyumba iMfinjile

¹³ Lwe ahavhaliilizyo aha shikulukuulu isha Vhayuuda isha Pasaaka hapalamila, uYeesu ahazuvha ku Yelusaleemu.

¹⁴ Lwe aafiha ukwo, ahinjila pa Nyumba iMfinjile. Umwo ahavhaaga vhe vhahakazyaga ingʼombe ni ngʼonzi ni nkunda na vhe vhahatananiaga impiiya, vhatendiime pa meeza zyavho.

¹⁵ Lwe uYeesu azilola izyo, ahagomba umuchaapu uwa nkusa, ahavhashimbizya vhonti vhe vhahakazyaga pa Nyumba iMfinjile, pooka ni ngʼombe ni ngʼonzi. Ahazibenula imeeza izya vhantu vhe vhahatananiaga impiiya, nu kuzisasaanya impiiya zyavho.

¹⁶ Pe uYeesu ahavhavhuuzya vhe vhahakazyaga inkunda ahati, “Zyefwi inkunda izi ipa. Mutahayivhiishe iNyumba iya Taata waane kuvha nsokooni.”

¹⁷ Lwe avhasundikwa vhaakwe vhiivwa izyo, vhahakumbuha amazwi ge gásimviilwe mu Vhusimbe uVhufinjile kuuti, “Ishikunzi shaane ku Nyumba yaaho, shilindovwa.”

¹⁸ Pe avhalongozi avha Vhayuuda lwe vhaalola zye uYeesu avhomba, vhahamuvhuziilizya vhahati, “Kwe uvhombe shilolesyo vhuli isha kulolesya kuuti iwe uli na maha aga kuvhomba izi?”

¹⁹ UYeesu ahavhaamula ahati, “Mongooli iNyumba iMfinjile ino, ine kwe njizenje ku nsiku zitatu.”

²⁰ Pe avheene vhahamwamula vhahati, “INyumba ino yázengwilwe ku maaha 46, pe iwe ungazenga vhuli ku nsiku zitatu?”

²¹ Ileelo uYeesu atahayangaga izya Nyumba iMfinjile, ahayangaga izya muvhili waakwe we vhápalamiiye kuwulovwa.

²² Pe lwe uYeesu azyuha, avhasundikwa vhaakwe vhahakumbuha amazwi ge áyanzile. Kwi idala ilyo, vhahalyitiha izwi lye lyásimviilwe mu Vhusimbe uVhufinjile na mazwi ge uYeesu áyanzile.

UYeesu amanyile zye zili mu mooyo aga vhantu vhonti

²³ Lwe uYeesu ali pa shikulukuulu isha Pasaaka ku Yelusaleemu, avhantu avhinji vhahanda kumwitiha, mwe pe vhávhwenyi ivilolesyo vwe ahavhombaga.

²⁴ Ileelo uYeesu atahavhiitiha, mwe pe ázimanyile zye zili mu mooyo aga vhantu vhonti.

²⁵ Havhili atahanzaga umuntu wonti uwa kumuvhuuzya zye avhantu vhakusiivha, mwe pe uweene ázimanyile zyonti zye zyámile mu mooyo aga vhantu.