Yohani 18 - ULufingwi uLupwa

Avhalongozi avha Vhayuuda vhakumulema uYeesu

¹ Lwe uYeesu aamala kulaavha, aheepa na vhasundikwa vhaakwe nu kulamba ishihoto isha Kidilooni pe páali ishilimbika isha mazayituuni. Vhahinjila umwo.

² UYuuda we ámwaniliiye uYeesu, ápamanyile ipo, mwe pe ulwinji ahahomaanaga na vhasundikwa vhaakwe penepo.

³ Pe ahayiposheela impuga iya vhasikaali na vhavhomvi vhamo kufuma ku vhapiti avha vhapuuti na Vhafalisaayi, ahasogola navho pa shilimbika isho. Lwe vhakusogola, vhányatuuye inyaale na mazondolo ni vilwilo.

⁴ UYeesu ápezile amanyile zyonti zye kwe zimwaje. Pe aheepa pa vhasundikwa vhaakwe, ahasogola pa mpuga iyo, ahavhuziilizya ahati, “Vhuli, mukumulondola unaanu?”

⁵ Vhahamwamula vhahati, “Tukumulondola uYeesu uMunaazaleeti.” Pe uweene ahavhaamula ahati, “Neene ne mukundondola.” Ahavhaliilizyo iho, uYuuda we ámwaniliiye uYeesu, áyimiliiye pooka navho.

⁶ Lwe uYeesu avhavhuuzya kuuti, “Neene ne mukundondola,” avhasikaali ivho vhahagaluha mwisinda nu kugwa pansi.

⁷ UYeesu ahavhavhuziilizya havhili ahati, “Vhuli, mukumulondola unaanu?” Vhahamwamula vhahati, “Tukumulondola uYeesu uMunaazaleeti.”

⁸ UYeesu ahavhavhuuzya ahati, “Navhavhuuzya kuuti, neene ne mukundondola. Inga mukundondola neene, ishi muvhaleshe avhasundikwa vhaane ivha vhasogolaje.”

⁹ UYeesu áyanzile vhwevhulo, inga zilunjishe zye áyanzile kuuti, “We Taata, navhagulilaga ahinza, ataliipo we ateezile mu vhaala vhe umpiiye.”

¹⁰ USiimoni uPeeteli áali ni ipanga. Pe ahalikuula, ahamudiba nu kumudumula ikutwi ilya kundiilo umuvhomvi uwa mupuuti umupiti. Umuvhomvi uyo izina lyakwe vhahatinji uMaaliko.

¹¹ UYeesu ahamuvhuuzya uPeeteli ahati, “We Peeteli, galusya ipanga mu shipata shaakwe. Vhuli, utamanyile kuuti nkwanzilwa kuyimba inza vwe uTaata akasiime kuuti njimvilwe?”

UYeesu pilongolela ilya mupuuti umupiti

¹² Pe umupiti uwa vhasikaali, pooka ni mpuga yaakwe na vhavhomvi avha vhalongozi avha Vhayuuda vhahamulema uYeesu, vhahamukunga.

¹³ Pe vhahamutwala suuti kwa Aanasi, we áali wu yisevwala uwa Kayaafa. UKayaafa we áali mupuuti umupiti umwaha uwo.

¹⁴ UKayaafa we insiku izya mwisinda ávhapanziizye avhalongozi avha Vhayuuda kuuti, “Hinza kuuti umuntu wooka afwe kuzya vhantu vhonti.”

UPeeteli akumuhaana uYeesu

¹⁵ USiimoni uPeeteli nu musundikwa uwamwavho wumo, vhahamulandataga uYeesu mwisinda lwe vhakumutwala kwa Aanasi. Umusundikwa uyo, umupuuti umupiti ámumanyile, ye nongwa ahinjila pooka nu Yeesu pa lupitu ulwa nyumba iya mupuuti umupiti.

¹⁶ Ileelo uPeeteli ahimiilila panzi pa mulyango, pe umusundikwa uwamwavho uyo, we ámanyisile nu mupuuti umupiti, ahafuma panzi. Ahayanga nu mulindu we áali muguulizi wa pa mulyango, pe ahamwitishila uPeeteli kwinjila muhati.

¹⁷ Pe umulindu umuguulizi uyo ahamuvhuziilizya uPeeteli ahati, “Vhuli, niiwe te we wooka mu vhasundikwa avha muntu uyo?” UPeeteli ahamwamula ahati, “Ndaali, te neene.”

¹⁸ Ahavhaliilizyo iho, avhazya na vhavhomvi vhaala vhímiliiye pe vhápemvile umwoto uwa mazimwa, mwe pe kwáli impepo. Woope uPeeteli áyimiliiye pooka navho, ahootaga umwoto.

Umupuuti umupiti akumuvhuziilizya uYeesu

¹⁹ Pe umupuuti umupiti uyo uAanasi, ahamuvhuziilizya uYeesu izya vhasundikwa ni zya nsambiilizyo zyakwe.

²⁰ UYeesu ahamwamula ahati, “Ahavhaliilizyo honti nayangaga na vhantu vhonti apazelu, navhasambilizyaga avhantu mu masinagoogi na pa Nyumba iMfinjile pe aVhayuuda avhinji vhakuvhungaanaga pooka. Ntaayanzile izwi naalimo kukwilu.

²¹ Ishi shooni she ukumbuziilizya ine? Shooni she utakuvhavhuziilizya avhantu vhe vhatejelezyaga lwe nkusambiilizya? Avheene vhamanyile zye nayangaga.”

²² Lwe uYeesu ayanga izyo, umuguulizi wumo we áyimiliiye papiipi nawo, ahamukanza ni ikoofi, ahamuvhuziilizya ahati, “Shooni she ukumwamula umupuuti umupiti vhwevhulo?”

²³ UYeesu ahamwamula ahati, “Inga nayanga havhiivhi, twivwe yanga uvhuvhiivhi vhwane. Ileelo inga nayanga zya nalyoli, pe shooni she ukunkoma?”

²⁴ Pe uYeesu she akunziilwe, uAanasi ahalajizya avhasikaali kuuti, vhamunyatule nu kumutwala kwa mupuuti umupiti, uKayaafa.

UPeeteli akumuhaana uYeesu havhili

²⁵ Yeenya, lwe uPeeteli ali kwota umwoto, avhantu vhamo vhahamuvhuziilizya vhahati, “Vhuli, niiwe te we wooka mu vhasundikwa avha muntu uyo?” UPeeteli ahahaana ahati, “Ndaali, te neene haa.”

²⁶ Ileelo wooka mu vhazya avha mupuuti umupiti, we áali mujenzi uwa muntu ula we uPeeteli ámudivile ikutwi, ahamuvhuziilizya ahati, “Vhuli, te weewe we naakuvhwenyi uli pooka nu Yeesu mu shilimbika?”

²⁷ UPeeteli ahahaana havhili ahati, “Te neene.” Ahavhaliilizyo hanaaho inkanda yihavhilishila.

Vhakumutwala uYeesu kwa Pilaato

²⁸ Inzanshi lwe kwasha, avhalongozi avha Vhayuuda vhahamunyatula uYeesu kufuma kwa Kayaafa, nu kumutwala ku nyumba iya kukonzezya iya mulongozi uwa Vhaluumi. Ileelo avheene vhatínjiiye mu nyumba umwo, inga vhatahayihandamanie, vhapootwe kulya ishaakulya isha shikulukuulu isha Pasaaka.

²⁹ Pe umulongozi uwa Vhaluumi uyo uwa shigavho isha nsi isha Yudeeya, we izina lyakwe vhahatinji uPilaato ahafuma panzi, nu kusogola kwe vháali, ahavhavhuziilizya ahati, “Vhuli, umuntu uno ananzile ishooni she mukumulonjeelela?”

³⁰ Avheene vhahamwamula vhahati, “Inga umuntu uno atananzile naashimo, nkandi tutinzile nawo kuli iwe.”

³¹ UPilaato ahavhavhuuzya ahati, “Ishi imwe munyatuli, musogole mumulonje kulandatana ni ndajizyo zyinyu.” Ileelo avheene vhahamwamula vhahati, “Iswe tutakwitishilwa kumulonga umuntu kuuti afwe.”

³² Izyo zyávhombesile vhwevhulo, inga zilunjishe zye uYeesu áyanzile, kulolesya vwe kuuti afwe.

UPilaato akumuvhuziilizya uYeesu

³³ Lwe uPilaato ayiivwa izyo, ahinjila havhili mu nyumba iya kukonzezya, ahavhalajizya kuuti vhamutwale uYeesu ku kwakwe. Lwe vhamutwala, ahamuvhuziilizya uYeesu ahati, “Vhuli, iwe we Mwene uwa Vhayuuda?”

³⁴ Ileelo uYeesu ahamwamula ahati, “Vhuli, izyo zye ukumbuziilizya, zikufuma mu nsiivho zyaho, pamo avhantu avhanji vhe vhakuvhuziizye inongwa zyane?”

³⁵ UPilaato ahamwamula ahati, “Vhuli, ine ne Muyuuda? Avhantu avha mu nsi yaaho pooka na vhapiti avha vhapuuti vhe vhakuleesite iwe kuli ine. Vhuli, uvhomvile ishooni?”

³⁶ UYeesu ahamwamula ahati, “Uvhumwene vhwane te vhwa mu nsi umu. Inga vhuvhanje vhwa mu nsi umu, avhavhomvi vhaane, nkandi vhandwiliiye, inga ntahaalemwe na Vhayuuda. Ileelo uvhumwene vhwane te vhwa mu nsi umu.”

³⁷ Pe uPilaato ahamuvhuziilizya ahati, “Vhuli, ishi zya nalyoli kuuti iwe we mwene?” UYeesu ahamwamula ahati, “Iwe we wayanga kuuti ine ne mwene. Ine nápafwilwe mu nsi umu, havhili nínzile, inga mbasambiilizye avhantu uvhwanalyoli. Umuntu wonti we akuvhulandata uvhwanalyoli, akugatejeelezya amazwi gaane.”

³⁸ UPilaato ahamuvhuziilizya ahati, “Uvhwanalyoli she shintu vhuli?” Lwe uPilaato ayanga izyo, ahafuma havhili panzi, ahavhavhuuzya avhalongozi avha Vhayuuda ahati, “Ine ntavhulola uvhunanzi naavhumo kufuma kwa muntu uno.

³⁹ Ileelo muli na maata aga kundaavha kuuti mbasatulile umukungwa wumo ahavhaliilizyo aha shikulukuulu isha Pasaaka. Vhuli, mukwanza kuuti mbasatulile uMwene uwa Vhayuuda uno?”

⁴⁰ Ileelo avhantu vhonti vhahazuma ahalanga kwi izwi ipiti vhahati, “Ndaali! Utahatusatulile umuntu uyo, utusatulile uBalaaba.” UBalaaba ákunziilwe kuzya kuyisambuha isilikaali iya Shiluumi.