Yohani 13 - ULufingwi uLupwa

UYeesu akuvhoozya ivinama avhasundikwa vhaakwe

¹ Lwe isiku ilya shikulukuulu isha Pasaaka lishiili kufiha, uYeesu ahamanya kuuti ahavhaliilizyo haakwe haafiha aha kwepa mu nsi umu, nu kusogola kwa Taata. Ahavhaliilizyo honti lwe ali mu nsi umu, ávhakunzite avhantu vhaakwe vhe vhámwitisile mu nsi, havhili ájendeleeye kuvhakunda kufishila kumpeleela.

² UYeesu na vhasundikwa vhaakwe vhahatendama kulya ishaakulya isha hamazuuvha. Ahavhaliilizyo iho uMukwalanzi ápezile ayinjila mu mwoyo uwa Yuuda umwana wa Siimoni uwa ku Kaalyoti, inga amwaniile uYeesu.

³ UYeesu ámanyile kuuti uTaata ámupiiye amaha aga kuvikonzya ivintu vwonti, havhili ámanyile kuuti áfumile kwa Mulungu, nu kuuti aligaluha kwa Mulungu.

⁴ Pe uYeesu aheepa pe ahalyanga, ahazuula inkanzu yaakwe, ahanyatula umwenda nu kuyipinya mu musana.

⁵ Ahavhiiha aminzi mwi ibeeseni, ahanda kuvhoozya ivinama avhasundikwa vhaakwe nu kuvhapuupula nu mwenda we áyipinyile mu musana.

⁶ Lwe uYeesu aafiha pe uSiimoni uPeeteli ali, uPeeteli ahamuvhuziilizya ahati, “We Mwene, vhuli, ukwanza unoozye ivinama vwane?”

⁷ UYeesu ahamwamula ahati, “Iwe utalimanyile lye nkulivhomba ishi, ileelo kwe ulimanye pilongolela.”

⁸ UPeeteli ahamuvhuuzya ahati, “Iwe utanganoozya ivinama vwane inga hansi.” UYeesu ahamwamula ahati, “Inga ntangakwozya iwe, utangavha pooka niine havhili.”

⁹ Pe uPeeteli ahamwamula ahati, “We Mwene, inga vwe zili, utahanoozye vwe vinama vweka, unoozye ni nyoovhe pooka ni itwe vhweleele.”

¹⁰ UYeesu ahamwamula ahati, “Umuntu we ageezile umuvhili wonti, atakwanzilwa kugeeza havhili, akugeeza mwe mu vinama, mwe pe umuvhili waakwe wonti muzelu. Imwe mwe vhazelu, ileelo wooka pahati yiinyu te muzelu.”

¹¹ UYeesu ápezile amumanyile we kuuti amwaniile, ye nongwa áyanzile átili, “Wooka pahati yiinyu te muzelu.”

¹² Lwe uYeesu aamala kuvhoozya ivinama avhasundikwa vhaakwe, ahazwala inkanzu yaakwe, ahagaluha havhili pe átendiime lwe vhaakulya ishaakulya, ahavhavhuziilizya ahati, “Vhuli, mwamanyinsanya izyo zye navhavhombela imwe?

¹³ Imwe mukuniita mukuti, ‘Musambiilizi,’ havhili mukuti, ‘Mwene,’ mukuyanga zya nalyoli, mwe pe ne Musambiilizi wiinyu, havhili ne Mwene wiinyu.

¹⁴ Ishi ine, ne ne Musambiilizi wiinyu havhili ne Mwene wiinyu navhoozya imwe ivinama vwinyu. Yikwanzilwa niimwe vhweleele mwozyanyaaje ivinama vwinyu.

¹⁵ Navhalolesya ishiholanyo, inga niimwe muvhombelanaje inza vwe ine navhavhombela.

¹⁶ Nalyoli nkuvhavhuuzya kuuti, umuzya te mupiti kuluusya umwene waakwe, havhili we akutumwa te mupiti kuluusya we akumutuma.

¹⁷ Inga mwazimanya izyo, pe uMulungu alivhaloota inga mukulandata ishiholanyo isho.”

¹⁸ Pe uYeesu ahajendeelela kuvhavhuuzya avhasundikwa vhaakwe ahati, “Ntakuyanga zyonti izyo kuli imwe mwenti, mwe pe mbamanyile kufuma ku vhwandilo avhantu vhe mbasavhuuye kuvha vhasundikwa vhaane. Ileelo nkuyanga izyo, inga zilunjishe zye zisimviilwe mu Vhusimbe uVhufinjile kuuti, ‘Umumanyani waane we alyanga ishaakulya pooka niine, agalunkana kuvha mulugu waane.’

¹⁹ Nkuvhavhuuzya zyonti izi ahavhaliilizyo iha lwe zishiili kufumila, kuuti inga lwe zyafumila, pe mwitishe kuuti nalyoli ine ne neene.

²⁰ Nalyoli nkuvhavhuuzya kuuti, umuntu wonti we akumuposheela we imutumiliziizye, akumposheela neene, woope we akumposheela ine, akumuposheela we antumiliziizye.”

UYeesu akukuvhwa izya kumwaniila

²¹ Lwe uYeesu ayanga izyo, ahaswimiililwa nkaani mu mwoyo waakwe, ahayanga apazelu ahati, “Nalyoli nkuvhavhuuzya kuuti, wumo muli imwe kwe ananiile.”

²² Pe avhasundikwa vhaakwe vhahanda kwenyanya vhuuvho vheeka, mwe pe vhatámanyile kuuti akumuyanga wu naanu.

²³ Páamile umusundikwa wumo mu vhasundikwa vhaakwe we uYeesu ámukunzite nkaani. Uweene átendiime papiipi nu Yeesu, lwe ali kulya.

²⁴ Pe uSiimoni uPeeteli ahamupalizya umusundikwa uyo, ahamuvhuuzya ahati, “Muvhuziilizye uYeesu, kuuti, akumuyanga wu naanu?”

²⁵ Pe umusundikwa uyo ahapalamizya itwe lyakwe papiipi nu Yeesu, ahamuvhuziilizya ahati, “We Mwene, wu naanu we kuuti akwaniile?”

²⁶ UYeesu ahamwamula ahati, “We wula we naakuumupa ikaati lye nasanzizya mu musunyi.” Pe uYeesu ahanyatula ikaati, ahasanzizya mu musunyi, ahaamupa uYuuda umwana wa Siimoni uwa ku Kaalyoti.

²⁷ Lwe uYuuda aposheela ikaati, naluvhiilo uSeetano ahamwinjila. Pe uYeesu ahamuvhuuzya uYuuda ahati, “Zye ukwanza kuvhomba zivhombe naluvhiilo!”

²⁸ Ileelo avhantu vhonti vhe vháliipo paala kulya ishaakulya, vhatámanyile shooni she uYeesu ayanga inza vhwevhulo.

²⁹ Mwe pe uYuuda we ahasengulaga imfuuku iya mpiiya, vhamo vhahasiivhaga kuuti uYeesu amuvhuuzya uYuuda kuuti asogole akale vwe vikwanzilwa pa shikulukuulu, poosye kuuti aavhape impiiya zimo avhapiina.

³⁰ Lwe uYuuda aposheela ikaati ilyo, naluvhiilo ahafuma panzi. Ahavhaliilizyo iho vhwáli vhusiku.

Indajizyo impwa

³¹ Lwe uYuuda aafuma panzi, uYeesu ahavhavhuuzya avhasundikwa vhaakwe ahati, “Ishi uvhushindamu vhwane ne Mwana wa Aadamu vhwapalamila kuloleha apazelu. Havhili uvhushindamu uvhwa Mulungu kwe vhuloleshe apazelu kutuushila mu mbombo zyane.

³² Inga uvhushindamu vhwakwe vhukuloleha kutuushila mu mbombo zyane, woope uMulungu akuvhalolesya avhantu uvhushindamu vhwane ne Mwana wa Aadamu, havhili akuvhomba inza vhwevhulo ahavhaliilizyo iha.

³³ Mwe vhaana vhaane, kwe mbe niimwe ahavhaliilizyo hansi vhweleele. Inza vwe naavhavhuziizye avhalongozi avha Vhayuuda, niishi vhweleele nkuvhavhuuzya niimwe kuuti kwe mundondole, ileelo imwe mutanginza kwe nkusogola.

³⁴ Ileelo ishi nkuuvhapa indajizyo impwa, nkuvhalajizya kuuti, ‘Mukundanaje. Inza vwe ine mbakunzite imwe, niimwe mukundanaje inza vhwevhulo.’

³⁵ Inga mukukundana, pe avhantu vhonti kwe vhamanye kuuti mwe vhasundikwa vhaane.”

UYeesu akuyanga kuuti uPeeteli kwe amuhaane

³⁶ Pe uSiimoni uPeeteli ahamuvhuziilizya uYeesu ahati, “We Mwene, ukusogola kwoshi?” UYeesu ahamwamula ahati, “Nkusogola kwe iwe ahavhaliilizyo iha utangandandata, ileelo kwe undandate pisinda.”

³⁷ UPeeteli ahamuvhuziilizya ahati, “We Mwene, ku nongwa vhuli ntangakulandata ahavhaliilizyo iha? Ine kwe njifumwe kufwa ku zyaho!”

³⁸ UYeesu ahamwamula ahati, “We Peeteli, vhuli, nalyoli kwe uyifumwe kufwa ku zyane? Nalyoli nkukuvhuuzya kuuti, lwe inkanda yishiili kuvhilishila, kuuti uvhe wankaana lutatu, kuuti utamanyile.”