VaLoma 2 - ULufingwi uLupwa

UMulungu alivhalonga avhantu vhonti ku vhugolosu

¹ Pe ishi, iwe wamwitu, we ukuvhalonga avhantu avhanji, utali ni lya kuyiyanjila pilongolela ilya Mulungu poosye uvhe we naanu. Yeenya, lwe ukumulonga uwamwinyu, ukupela ukuyilonga weneewe, mwe pe uvhutalamalandu vhwe uweene akuvhuvhomba vhwe niiwe ukuvhuvhomba.

² Iswe swenti tumanyile kuuti uvhulonzi uvhwa Mulungu vhugolosu ku vhantu vhe vhakuvhomba imbiivhi inza izyo.

³ Ileelo iwe wamwitu, we ukumulonga uwamwinyu she niiwe ukuvhomba imbiivhi izyo, utahasiivhe kuuti uMulungu alikuleha ishisita kukulonga.

⁴ UMulungu mwinza, mwe pe akukufwila uvhwila nkaani, atakupiiye isunde inga lwoka, ileelo akukujimbiilila, inga utonte uvhutalamalandu vhwaho. Ishi shooni she ukumusuufwa?

⁵ Ishi, mwe pe we mugomu, havhili utakwanza kutonta uvhutalamalandu vhwaho, ukulivhiiha isunde lyaho kuvha lipiti nkaani pi isiku ilya vhuhalazu uvhwa Mulungu, uweene alivhalonga avhantu ku vhugolosu.

⁶ Isiku ilyo uMulungu alivhalipa avhantu vhonti kulandatana ni mbombo zyavho.

⁷ Kuli ivho vhe ku mute vhakuvhomba inyinza, mwe pe vhakulondola uvhushindamu nu mushinzi nu vhulanzi vhwe vhutakunanjiha kufuma kwa Mulungu, aliivhapa uvhulanzi uvhwa shiima.

⁸ Ileelo vhe vhakupapamila na vhe vhakuhaana uvhwanalyoli, nkandi vhakwitiha kuvhomba imbiivhi, uMulungu alivhaviitilwa nu kuuvhapa isunde.

⁹ Avhantu vhonti vhe vhakuvhomba imbiivhi, vhaliivha na mayimba ni ntamwo, kwandila ku Vhayuuda kufishila ku vhantu vhe te Vhayuuda.

¹⁰ Ileelo vhonti vhe vhakuvhomba inyinza, uMulungu aliivhapa uvhushindamu nu mushinzi nu vhutehamu, kwandila ku Vhayuuda kufishila ku vhantu vhe te Vhayuuda.

¹¹ Yeenya, uMulungu atakusavhulanya.

¹² Avhantu vhe te Vhayuuda vhe vhakuvhomba uvhutalamalandu vhaliilovha ishisita kulongwa ni ndajizyo izya Moose. Vhoope aVhayuuda vhe vhazimanyile indajizyo izyo, inga vhakuvhomba uvhutalamalandu, vhalilongwa kulandatana ni ndajizyo izyo.

¹³ Vhalilongwa, mwe pe uMulungu atakumuvhaazya umuntu kuuti mugolosu kufumiilana nu kwivwa indajizyo izya Moose vhweleele, akumuvhaazya umuntu kuuti mugolosu, mwe pe akuvhomba zye indajizyo zikuyanga.

¹⁴ Avhantu vhe te Vhayuuda inga vhakuvhomba zye vhakusiivha, zye zili inza indajizyo izya Moose vwe zikuyanga, poosye inga indajizyo zye uMoose ápeliilwe vhatazimanyile, yililolesya kuuti mu mooyo gaavho vhamanyile ingolosu.

¹⁵ Avhantu ivho vwe vhali, yikulolesya kuuti zye zikuyangwa mu ndajizyo zisimviilwe mu mooyo gaavho. Yikulolesya vhwevhulo, mwe pe amooyo gaavho ni nsiivho zyavho lumo zikuvhahomeshezya kuuti vhakuvhomba imbiivhi, havhili lumo zikuvhahomeshezya kuuti vhakuvhomba zye zikwanzilwa.

¹⁶ Vwe ziliivha isiku ilya vhulonzi, lye uMulungu alivhalonga avhantu kwi idala ilya Chilisiti uYeesu, poosye ni nsiivho izya vhuzigizigi. Izwi iLyinza lye nkukumusya vwe likuyanga.

AVhayuuda ni ndajizyo izya Moose

¹⁷ Ishi, iwe ukuyiita kuuti we Muyuuda uwa nalyoli, ukusuuvhila kuvha we mugolosu kwi idala ilya kulandata indajizyo, havhili ukuyitumvwa kuuti we muntu wa Mulungu.

¹⁸ Havhili ukuti uzimanyile zyonti zye uTaata akasiime nu kumanya kusaavhula zye nyinza, mwe pe usambiliiye mu ndajizyo zyakwe.

¹⁹ Kulandatana niizyo, iwe ukuyilola kuuti we mulongozi uwa vhantu vhe te Vhayuuda, inza umuntu we akuvhalongozya avhantonko, poosye inza inyaale vwe yikuvhahozezya avhantu mu shiisi.

²⁰ Havhili, ukuyilola kuuti we musambiilizi uwa vhaana na vhantu avhapukupuuku, mwe pe indajizyo zyaho zikukuvhuuzya inongwa izya vhushindamu uvhwa njeele vhwonti nu vhumanyinsanyi uvhwa nalyoli.

²¹ Iwe ukuvhasambiilizya avhanji, ileelo iwe weneewe utakuvhomba zye ukuvhasambiilizya! Iwe ukuvhakumusizya avhanji kuuti vhatiivhaje, ileelo iwe weneewe ukwivha!

²² Iwe ukuvhavhuuzya avhantu kuuti, vhatavhembuhaje, ileelo shooni she iwe weneewe ukuvhembuha? Havhili, ungavhaviitilwa inza vhuli vhe vhakupuuta iviholanyo ivwa vhalungu, she iwe weneewe ukupumula ivintu kufuma mu nyumba izya kupuutila iviholanyo?

²³ Iwe we ukuyitumvwa kuuti uzimanyile indajizyo izya Moose, ukumupezya insoni uMulungu lwe ukushilanya indajizyo zyakwe.

²⁴ Izi zikuvhalilana nu Vhusimbe uVhufinjile vhwe vhukuti, “Ku mbiivhi zyinyu zye mukuvhomba, izina ilya Mulungu likusaamulwa na vhantu vhe te Vhaisilayeeli.”

²⁵ Ishi izya kutahiililwa, kutahiililwa kuli ni ilonka kuli iwe inga ukulandata vwe indajizyo zikuyanga. Inga washilanya indajizyo, kutahiililwa kwaho kutakuvha ni ilonka naalimo, havhili ukuvha inza umuntu we atatahiliilwe.

²⁶ Pe ishi, umuntu we atatahiliilwe inga akulandata vwe indajizyo zikuyanga, uMulungu akumwitiha inza umuntu we atahiliilwe.

²⁷ Havhili umuntu we atatahiliilwe, inga akulandata vwe indajizyo zikuyanga, imbombo zyakwe inyinza zililolesya kuuti iwe we Muyuuda we mutalamalandu. Yiliivha isho, mwe pe iwe we Muyuuda utahiliilwe, havhili uli ni ndajizyo zye zisimviilwe, ileelo ukuzishilanya.

²⁸ Yeenya, te kuuti umuntu wonti we akulandata amaata aga Vhayuuda, akuvha Muyuuda wa nalyoli, havhili umuntu atakuvha muntu wa Mulungu kufumiilana nu kutahiililwa mu muvhili.

²⁹ Ndaali, uMuyuuda uwa nalyoli we wula we mu mwoyo waakwe akumushindiha uMulungu. Kwope kutahiililwa ukwa nalyoli kwe kuvhulingaanya umwoyo kwe kukuvhombwa nu Mupepo uMufinjile, te kwi idala ilya kulandata indajizyo. Umushinzi uwa muntu inza uyo wutakufuma ku vhantu ndaali, wukufuma kwa Mulungu.