VaLoma 1 - ULufingwi uLupwa

Umulaamu

¹ Ukalaata uno nsimvile neene ne Paavhuli, ne muvhomvi uwa Chilisiti uYeesu. Ániisite kuuti mbe ne mutumwa, nu kunsaavhula kuuti nkumusyaje Izwi iLyinza ilya Mulungu.

² Izwi ilyo, lye uMulungu áfinzile kufuma hali kwi idala ilya vhakuvhwi vhaakwe mu Vhusimbe uVhufinjile.

³ Izwi ilyo lye likumuhomeshezya uMwana waakwe we ápafwilwe inza umuntu mu luho ulwa mwene uDaavhudi.

⁴ Uyo we uMulungu ámuzyusiizye ku maha aga Mupepo uMufinjile. Kwi idala ilyo, áhomesheziizye kuuti Mwana wa Mulungu uwa Maha Gonti. Uyo we wu Mwene wiitu uYeesu Chilisiti.

⁵ Kutuushila ku kwakwe, uMulungu ámfwiliiye uvhwila nu kumbiiha kuvha ne mutumwa. Ávhomvile vhwevhulo, inga mbiitaje avhantu vhonti vhe te Vhayuuda, kuuti vhamwitihaje uMwene uYeesu nu kulandata zye uweene akwanza.

⁶ Niimwe vhweleele muli mu mpuga iya vhantu ivho vhe uYeesu Chilisiti avhiisite kuuti vhavhe vhantu vhaakwe.

⁷ Kuli izyo, nkuvhasimbila imwe mwe muli ku Luumi, mwe uMulungu avhakunzite nkaani nu kuvhiita kuvha mwe vhafinjile. UTaata wiitu uMulungu nu Mwene uYeesu Chilisiti vhavhafwilaje uvhwila nu kuuvhapa uvhutehamu.

UPaavhuli akumusalifwa uMulungu

⁸ Isuuti, nkumusalifwa uMulungu kutuushila kwa Yeesu Chilisiti ku zyinyu mwenti, mwe pe ulwitiho lwinyu lukumusile mu nsi zyonti.

⁹ UMulungu we nkumuvhombela ku mwoyo waane wonti, lwe nkuvhalumbiilila avhantu avhanji Izwi iLyinza ilya Mwana waakwe, wu hoome waane. Amanyile vwe nkuvhalaavhila imwe ahavhaliilizyo honti ishisita kulita.

¹⁰ Insiku zyonti, nkumulaavha uMulungu kuuti, ku lukasamo lwakwe, ampe ahavhaliilizyo aha kwinza kuvhavuula imwe.

¹¹ Nyonyiilwe nkaani kuvhavuula, inga ninze indilizanye ishikunjilwa isha mwa Mupepo uMufinjile isha kuvhagomwa amooyo giinyu,

¹² kwe kuuti ulwitiho lwinyu lungomwe ine, lwope ulwane luvhagomwe imwe.

¹³ Mwe vhamwitu, nkwanza mumanye kuuti, ulwinji nkwanza kwinza kuli imwe, ileelo shimo shikundindila poosye ahavhaliilizyo iha. Nkwanza ininze ukwo kwope, imbalumbiilile avhantu vhamwitishe uMwene uYeesu, inza vwe mbomvile apanji.

¹⁴ Yeenya, nkwanzilwa kulumbiilila Izwi iLyinza ku vhantu vhonti, ku Vhayunaani na ku vhe te Vhayunaani, ku vhasambiilile na vhe te vhasambiilile.

¹⁵ Ishi she shikumbiiha ine kuuti inyonywe nkaani kwinza kuvhalumbiilila Izwi ilyo, imwe mwe vhantu avha ku Luumi.

Amaha aga Izwi iLyinza

¹⁶ Ntakulola insoni kulumbiilila Izwi iLyinza ilyo, mwe pe ilyenelyo maha ga Mulungu aga kuvhapoha avhantu vhonti vhe vhakumwitiha uYeesu, kwandila ku Vhayuuda kufishila ku vhantu vhe te Vhayuuda.

¹⁷ Izwi ilyo likulolesya apazelu vwe uMulungu akuvhavhaazya avhantu kuuti vhagolosu. Avhantu vhakuvhaazilwa kuuti vhagolosu kwi idala ilya kwitiha vhweleele, inza uVhusimbe uVhufinjile vwe vhukuyanga vhukuti, “Umuntu we akuvha nu vhulanzi, we wula we akuvhaazilwa kuuti mugolosu kwi idala ilya kumwitiha uMulungu.”

UMulungu akuuvhapa avhantu isunde kuzya vhutalamalandu vhwavho

¹⁸ UMulungu akulolesya uvhuhalazu apazelu kufuma ku mwanya kwi idala ilya kuuvhapa isunde avhantu vhonti vhe vhakumuhaana, na vhaala vhe kwi idala ilya vhuvhiivhi vhwavho, vhakuvhuhaana uvhwanalyoli vhwakwe.

¹⁹ Te kuuti vhatamanyile naashimo kuzya Mulungu, ndaali. Yeenya, zyonti zye zimanyisile zili apazelu ku kwavho, mwe pe uMulungu wuuyo azivhiisile kuuti zimanyishe ku vhantu.

²⁰ Kufuma ku vhwandilo uvhwa nsi, uMulungu ápezile ivintu vwonti kwi idala lye pooka nu kuuti vhatakumulola, vhangamumanya vwe ali. Ivintu vwe ápezile vikulolesya kuuti uMulungu ali na maha aga shiima, havhili uweene wu Mulungu wuuyo weeka, ataliipo uwunji. Kuli izyo, avhantu vhatangayanga kuuti vhatamumanyile.

²¹ Yeenya, pooka nu kuuti vhamumanyile uMulungu vwe ali, vhatámushindisile, poosye kumusalifwa inza vwe yikwanzilwa, nkandi vháamile ni nsiivho imbiivhi, pe injeele zyavho zihapootwa kumanyinsanya ziila zye ahanzaga vhazimanye.

²² Avheene vhahayitumvwaga kuuti vhali nu vhushindamu uvhwa njeele, fwandi vhapukupuuku.

²³ Vhahaleha kumupuuta uMulungu uwa shiima, vhahavha vhakuvipuuta iviholanyo vwe viholiine na vhantu ni nyunyi ni nkanu na vwe vikukwesuha pansi, ivwo vwonti vwe vikufwa.

²⁴ ZKuli izyo, uMulungu ahavhaleha vhayihandamaniaje nu vhuvhembu kwi idala ilya mavhili gaavho, lwe vhakulandata impapilo zyavho imbiivhi izya mu mooyo gaavho.

²⁵ Vhálesile kwitiha uvhwanalyoli uvhwa Mulungu, vhahiitiha insambiilizyo izya ilenga. Vhahavha vhakuvivhombela ivipelwa nu kuvipuuta, vhahaleha kuvhomba izyo kwa Mupezi we akwanzilwa kutiimwa shiima! Amina.

²⁶ Kuli izyo, uMulungu ahavhaleha vhavhombaje izyavho izya nsoni inza vwe vhakwanza. Avhantanda vhahaleha kujenda na vhanaavuli, vhahanda kujenda vhuuvho vheeka.

²⁷ Vhwevhulo, vhoope avhanaavuli vhahaleha kujenda na vhantanda, vhahanda kwanzana vhuuvho vheeka. Vhahavhombelanaga izya nsoni izyo. Kuli izyo, vhahavha vhayisavhulila vhuuvho isunde lye likuvhalilana ni mbombo zyavho imbiivhi.

²⁸ Mwe pe avhantu ivho vháhaanile uvhumanyi uvhwa nalyoli uvhwa nongwa izya Mulungu, woope uMulungu ahavhaleha vhazilandataje insiivho zyavho imbiivhi. Pe vhahavha vhakuvhomba inongwa zye zitakwanzilwa kuvhombwa.

²⁹ Vhahavha nu vhuvhiivhi uvhwa mavhiila mu mavhiila, vhahavha nu lupapilo nu mulaha. Havhili vhahiizula umwone nu vhugozi ni ivho. Vhahavha vhantu vhe vhakuhopenkanya. Vhali nu vhulumaluma ni isuufwo ni iyevho

³⁰ ni ndigo. Vhakumuviisya uMulungu, vhatakuvhasaajila avhamwavho, havhili vhantu vhe vhakuyitumvwa nu kuyitiima. Ahavhaliilizyo honti vhakulondola idala ipwa ilya kuvhomba imbiivhi. Vhatakuvhashindiha avhapaafi vhaavho,

³¹ havhili vhantu avhapukupuuku, vhatakulunjisya zye vhafinzile, vhatali ni shikunzi, poosye uvhwila.

³² Avhantu ivho vhamanyile ahinza kuuti, inga umuntu avhomba imbombo imbiivhi inza izyo, zilimuleetela uvhufwe uvhwa shiima. Ileelo poosye vhwevhulo, vhatakusaajila izyo! Vhakujendeelela kuvhomba imbiivhi ishisita kwogopa ishintu shonti, havhili vhakwitinkana na vhantu vhe vhakuvhomba imbiivhi izyo.