VaHebuli 7 - ULufingwi uLupwa

Uvhupuuti uvhwa Melikizeedeki

¹ UMelikizeedeki uyo áamile wu mwene uwa mu nkaaya yimo ye vhahatinji iSaleemu. Havhili áamile mupuuti uwa Mulungu uMupiti uwa ku Mwanya. UMelikizeedeki áhomiine nu Aabulahamu, lwe uAabulahamu akuvhwela kufuma ku vhulugu kwe ávhapoosite avhamwene vhane. Pe uMelikizeedeki ahamuloota uAabulahamu.

² Woope uAabulahamu ahanyatula ishigavho shooka pa vigavho 10 mu vintu vwe ávigomile ku vhulugu nu kuumupa uMelikizeedeki. Izina ilya Melikizeedeki kwe kuuti umwene uwa vhugolosu, havhili kuuti umwene uwa Saleemu kwe kuuti umwene uwa vhutehamu.

³ Yikulolesya kuuti uyise nu nyina uwa Melikizeedeki vhatakumanyiha, poosye uluho lwakwe lutakumanyiha. Havhili kupaapwa nu kufwa kwakwe kutakumanyiha. Uweene ali inza uMwana wa Mulungu, mwe pe mupuuti uwa shiima.

⁴ Ishi yeenyi uMelikizeedeki vwe áamile uvhupiti! Ilyo lye lyápeleeye uAabulahamu utaata wiitu, kuuti aamupe ishigavho shooka pa vigavho 10 mu vintu vwe ávigomile ku vhulugu.

⁵ Kulandatana ni ndajizyo izya Moose, avhantu vhonti kufuma mu luho ulwa Laawi vhe vháamile vhe vhapuuti, vhahanzilwaga kuposheela ishigavho shooka pa vigavho 10 mu vintu ivwa Vhaisilayeeli avhamwavho. Vhahanzilwaga kuvhomba vhwevhulo, pooka nu kuuti vhonti vháfumile kwa taata waavho wooka uAabulahamu.

⁶ Pooka nu kuuti uMelikizeedeki atáfumile mu luho ulwa Laawi, uweene áposheleeye ishigavho shooka pa vigavho 10 kufuma kwa Aabulahamu. Havhili ámuloosite uAabulahamu, umuntu we uMulungu áfinzile kumuloota.

⁷ Niiswe nalyoli tumanyile kuuti umuntu we ali na maha aga kuloota, mupiti kuluusya we akulootwa.

⁸ Avhapuuti ivho kufuma mu luho ulwa Laawi vhe vhakuposheela ishigavho shooka pa vigavho 10, vhantu vhe vhakufwa. Ileelo uMelikizeedeki we áposheleeye ishigavho shooka pa vigavho 10 kufuma kwa Aabulahamu, akuyangwa kuuti mulanzi kufishila ileelo.

⁹ Havhili tungayanga tungati poosye uLaawi we avhantu avha mu luho lwakwe vhakuposheela ishigavho shooka pa vigavho 10, woope áfumwizye ishigavho shooka pa vigavho 10 kwa Melikizeedeki, kutuushila kwa taata waakwe uAabulahamu.

¹⁰ Nkuyanga vhwevhulo, mwe pe lwe uMelikizeedeki akuhomaana nu Aabulahamu, uLaawi ápezile ali mu lutungu ulwa taata waakwe uAabulahamu, áshiili kupaapwa.

Uvhupuuti uvhwa Yeesu nu vhwa Vhalaawi

¹¹ Indajizyo izya Moose zyínzile ku Vhaisilayeeli kutuushila ku vhapuuti vhe vhantu vha mu luho ulwa Laawi. Ileelo poosye vhwevhulo, uvhupuuti uvhwo vhutáali vhulunjisu. Kuli izyo, vhuhanzilwaga uvhupuuti uvhunji vhwe vhuli inza uvhwa Melikizeedeki vhwe vhutali inza uvhwa Aaloni.

¹² Havhili inga uvhupuuti vhwanduha, indajizyo zyope zikwanzilwa kwanduha.

¹³ Umupuuti uyo we akuyangwa wu Mwene wiitu uYeesu, uweene áamile wa mu nkolo iyinji, atáamile Mulaawi. Atáliipo umuntu naawumo uwa mu nkolo yaakwe we ámuvhombeeye uMulungu imbombo iya vhupuuti.

¹⁴ Yeenya, tumanyile kuuti uMwene wiitu áfumile mu nkolo iya Yuuda, havhili lwe uMoose akuyanga izya vhapuuti, atáyanzile naashimo izya nkolo iyo.

¹⁵ Izyo zye nkuyanga ishi zili apazelu nkaani, mwe pe umupuuti uwunji we ali inza uMelikizeedeki afumiiye.

¹⁶ Uweene atávhisiilwe kuvha mupuuti kufuma mu nkolo iya Laawi inza vwe indajizyo izya Moose zihayangaga, ileelo ávhisiilwe kuvha mupuuti ku maha aga vhulanzi vhwakwe vhwe vhutali nu vhusililishilo.

¹⁷ Yeenya, uVhusimbe uVhufinjile vhukuhomeshezya vhukuti, “Iwe we mupuuti shiima, inza vwe uMelikizeedeki áamile.”

¹⁸ UMulungu álwefwizye ululajizyo ulutanzi, mwe pe lutáamile na maha, havhili lutáamile ni mbombo naayimo.

¹⁹ Mwe pe ululajizyo ulwo lutáshivhiisile ishintu naashimo kuvha shilunjisu, tupeliilwe ulusuuvhilo ulwamwavho lwe lwinza nkaani, lwe lukutuvhiiha kuvha papiipi nu Mulungu.

²⁰ Lwe uMulungu akuvhavhiiha aVhalaawi kuvha vhapuuti, atálafile naashimo ku zyavho. Ileelo lwe akumuvhiiha uYeesu kuvha mupuuti, álafile,

²¹ inza vwe yisimviilwe mu Vhusimbe uVhufinjile kuuti, “UMWENE uMulungu alafile, havhili te ahandule insiivho zyakwe naalumo. ‘Iwe we mupuuti shiima.’”

²² Kulandatana ni shilapo isho, uYeesu we wu hapinjiha uwa lufingwi ulupwa, lwe lwinza nkaani kuluusya ulwa hali.

²³ Kusugaana ukwamwavho kwe kuno: Hali avhapuuti vháali vhinji, mwe pe vhahafwanga. Kufwa kuhavhadindilaga kujendeelela ni mbombo yaavho.

²⁴ Ileelo uYeesu mupuuti uwa shiima, mwe pe uweene mulanzi shiima.

²⁵ Kuli izyo, uweene ali na maha aga kuvhapoha nziila vhaala vhe vhakusogola kwa Mulungu kutuushila ku kwakwe. Havhili, mwe pe uweene mulanzi shiima, akuvhalaavhila ahavhaliilizyo honti.

²⁶ Umupuuti umupiti inza uyo we akwanzilwa kuli iswe, mwe pe uweene mufinjile, havhili atali nu vhunanzi, poosye uvhuhandamanu. UMulungu ámulehiinye na vhatalamalandu, ahamuzuvwa ku mwanya.

²⁷ Avhapuuti avhapiti vhahanzilwaga kufumwa impuutile izya vhutalamalandu vhwavho. Lwe vhavhomba vhwevhulo, pe vhahafumwaga impuutile izyamwavho ku vhutalamalandu uvhwa vhantu avhanji. Havhili vhahavhombaga vhwevhulo ulwinji. Ileelo uYeesu atávhomvile inza avhapuuti avhapiti ivho. Uweene áyifumwizye pa shihovhenkanyo lwoka vhweleele ku vhutalamalandu uvhwa vhantu vhonti.

²⁸ Kulandatana ni ndajizyo izya Moose avhantu vhahasavhulwaga kuvha vhapuuti avhapiti pooka nu kuuti vháali vhayeyevhazu. Ileelo lwe ahavhaliilizyo ahatali hatuuha, uMulungu kwi idala ilya kulapa ámusavhuuye uMwana waakwe kuvha mupuuti umupiti we mulunjisu shiima.