VaHebuli 6 - ULufingwi uLupwa

¹ Pe ishi, tutahajendeelele kusyala ni nsambiilizyo izya ku vhwandilo izya Chilisiti vhweleele, nkandi tukanyilaje kusambiilila izyamwavho, inga tuvhe twe vhalandati twe tugomile mu lwitiho. Nalyoli tutakwanzilwa havhili kusambiilizya insambiilizyo izya kutonta imbiivhi zye zikupelela uvhufwe, ni zya kumwitiha uMulungu.

² Havhili tutavhuyiilaje kusambiilizya insambiilizyo izya kwozelwa, ni zya kuvhavhiishila avhantu inyoovhe kuvhatemwa pa mbombo, ni zya kuzyuha, ni zya vhulonzi uvhwa shiima.

³ Inga uMulungu akwitiha, kwe tujendeelele kugoma mu lwitiho.

⁴ Ishi avhantu vhe vhalesile kumwitiha uMulungu, tungavhagalusya inza vhuli? Avhantu ivho ku vhwandilo vhásambiliiye uvhwanalyoli uvhwa Mulungu, nu kupeelwa ivipeelwa kufuma ku mwanya, nu kuposheela uMupepo uMufinjile.

⁵ Havhili vhálinzile uvhwinza uvhwa izwi ilya Mulungu, na maha aga vhulongozi vhwe vhukwinza uvhwa Mulungu ahavhaliilizyo he alikonzyaga insi impwa.

⁶ Ileelo vhalulesile ulwitiho lwavho! Litaliipo idala lyonti ilya kuvhagalusya, inga vhatonte havhili, mwe pe vhakumuhomeela pa shihovhenkanyo ulwa vhuvhili uMwana wa Mulungu nu kumusuupizya apazelu.

⁷ Insi ye yikuposheela imvula ulwinji nu kwezya iviyavho vwe vikumuleetela ilonka umulimi, insi iyo yikuposheela uvhuloote kufuma kwa Mulungu.

⁸ Ileelo insi ye yikwezya amimvwa ni ndezye, yitakuvha ni ilonka naalimo, yikuvha papiipi nu kutipwa nu Mulungu, havhili uvhusililishilo vhwakwe kwe kupembwa mu mwoto.

⁹ Vhankundwa, pooka nu kuuti tukuvhasimbila ku mazwi amahali, nalyoli tumanyile kuuti mukuvhomba inyinza zye zikusuuvhilwa ku vhe vhapokwilwe.

¹⁰ Mwe pe uMulungu mugolosu, atangaziluvwa imbombo inyinza zye mukuzivhomba. Havhili atangashiluvwa ishikunzi she mwáshilolesiizye ku kwakwe kuvhaavwa avhafinjile avhamwinyu kufuma ku vhwandilo kufishila ishi.

¹¹ Tukwanza nkaani kuuti mwenti mujendeelele kuvha nu mute kufishila kumpeleela, inga muposheele zyonti zye mukuzisuuvhila.

¹² Mutavhanje mwe vhahata, nkandi muvhalandataje vhaala vhe kwi idala ilya kwitiha nu kujimbiilila, vhaposheleeye ziila zye uMulungu áfinzile kuuvhapa.

Zye uMulungu afinzile zya nalyoli

¹³ Yeenya, hali lwe uMulungu akufinga kwa Aabulahamu, álafile kwi izina lyakwe wuuyo, mwe pe atáliipo naawumo we áamile mupiti kumuluusya uweene we angaalapa ku kwakwe.

¹⁴ UMulungu álafile átili, “Nalyoli kwe nkuloote, nu kuvhavhiiha avha mu luho lwaho kuvha vhinji.”

¹⁵ Pe uAabulahamu ahaguliilila nu kujimbiilila kufishila pe aposheela viila vwonti vwe uMulungu áfinzile.

¹⁶ Lwe avhantu vhakulapa, vhakulapa kwi izina ilya ula we mupiti kuluusya avheene, havhili kulapa ukwo kukuhomeshezya kuuti ziila zyonti zye vhakuziyanga zya nalyoli. Kuvhomba vhwevhulo, kukumala amadali.

¹⁷ Woope uMulungu ahanzaga kulolesya apazelu ku vhantu vhe vhaliposheela ziila zye áfinzile kuuti te ahazyandule. Ili lye lyápeleeye kuuti ahomeshezye ulufingwi lwakwe kwi idala ilya kulapa.

¹⁸ Inga uMulungu afinga nu kulapa, atakwandula naalumo, mwe pe uweene atakuluma ilenga. Uweene ávhomvile ivintu ivi vivhili, kufinga nu kulapa, inga aatupe umwoyo iswe twe tushimbiliiye kuzilema nkaani ziila zye tukuzisuuvhila.

¹⁹ Ulusuuvhilo ulwo lwe tuli nalwo mu mooyo giitu, lukutwavwa kusimpa ahinza inza vwe ishijela ishimwamu shikuyaavwa imeeli, inga inkungu yitahayibunshile. Ulusuuvhilo ulwo wu Yeesu we áyinjiiye aPafinjile pa Pafinjile, kutuushila pa mwenda we wudinzite penepo.

²⁰ UYeesu atulongoleeye kwinjila penepo ku zyitu. Uweene avha mupuuti umupiti shiima, inza vwe uMelikizeedeki áamile.