VaHebuli 4 - ULufingwi uLupwa

Ulutuuzyo ulwa vhantu vha Mulungu

¹ Pe ishi, mwe pe ulufingwi ulwa Mulungu ulwa vhantu kwinjila pa lutuuzyo lwakwe luli she luliipo, pe twogopaje, inga atahinze avhe umuntu inga wooka muli imwe uwa kupootwa kwinjila penepo.

² Yeenya, niiswe tulumbiliilwe izwi ilyinza ilya pa lutuuzyo inza vwe avhataata vhiitu vhálumbiliilwe. Ileelo avheene lwe vhiivwa, Izwi ilyo litávhavwizye naashimo, mwe pe vhatályitisile.

³ Ileelo iswe twe tumwitisile uMulungu tuliyinjila pa lutuuzyo lwe áfinzile. Ileelo kuli ivho vhe vhatámwitisile, uMulungu áyanzile átili, “Návisiitwe nu kulapa, náyanzile nátili, ‘Nalyoli avhantu ivha te vhahinjile pa lutuuzyo lwe mbasenganiziinye.’” UMulungu áyanzile isho, pooka nu kuuti ápezile azimazile imbombo zyakwe zyonti kufuma ahavhaliilizyo he áyipezile insi.

⁴ Yeenya, uVhusimbe uVhufinjile pamo vhukuyanga vhukuti, “Isiku ilya 7 uMulungu átuziizye kuvhomba imbombo zyakwe zyonti.”

⁵ Havhili izya kutuuzya izi zisimviilwe apamwavho mu Vhusimbe uVhufinjile kuuti, “Nalyoli avhantu ivha te vhahinjile pa lutuuzyo lwe mbasenganiziinye.”

⁶ Pooka nu kuuti avhataata vhiitu vhálongoleeye kulumbiililwa Izwi iLyinza ilya pa lutuuzyo, ileelo vháposiitwe kwinjila penepo, mwe pe vhatámushindisile uMulungu. Ileelo avhantu avhanji vhaliyinjila pa lutuuzyo ipo.

⁷ Kuli izyo, uMulungu álivhatisile isiku ilyamwavho, ahalyita ahati, “Ileelo.” Tumanyile isho, mwe pe lwe insiku inyinji zyatuuha kufuma pe vhaala vháposiitwe kwinjila, uMulungu áyanzile havhili izya pa lutuuzyo kutuushila kwa mwene uDaavhudi, inza vwe yisimviilwe mu Vhusimbe uVhufinjile kuuti, “Ileelo inga mwivwa izwi ilya Mulungu, mutahagavhiishe amooyo giinyu kuvha magomu.”

⁸ Yeenya, inga uYooshuwa ápezile avhinjiziizye avhantu pa lutuuzyo, uMulungu nkandi atáyanzile pisinda havhili izya isiku ilyamwavho ilya kutuuzya.

⁹ Kuli izyo, ulutuuzyo luli she luliipo lwe uMulungu avhasenganiziinye avhantu vhaakwe.

¹⁰ Umuntu wonti we akwinjila pa lutuuzyo lwakwe, akutuuzya kuvhomba imbombo zyakwe zyonti, inza vwe uMulungu átuziizye kuvhomba imbombo zyakwe izya vhupezi.

¹¹ Pe ishi, tuvhe nu mute kwinjila pa lutuuzyo ulwo, inga atahaavhe umuntu wonti uwa kupootwa kwinjila, mwe pe atakumushindiha uMulungu inza avhataata vhiitu vwe vhávhomvile.

¹² Yeenya, izwi ilya Mulungu lilanzi havhili lili na maha. Havhili likuliluusya ipanga lye lili nu vhuhozu imbazu zyonti zivhili. Likulasa nu kwinjila muhati nkaani, nu kulehaanya umwoyo nu mupepo na pe ivipelwa ivwa muvhili visopenkiine na mafuta ge gali muumwo nu kumanya zye avhantu vhakusiivha nu kwanza.

¹³ Shitaliipo ishipelwa she shizyihiime pilongolela ilya Mulungu. Ivintu vwonti vili apazelu pilongolela lyakwe, uweene we niiswe tulilondovhola imbombo zyitu zyonti zye tukuzivhomba.

UYeesu mupuuti umupiti

¹⁴ Ishi, mwe pe tuli nu mupuuti umupiti nkaani we ásogooye nu kwinjila ku mwanya, uYeesu uMwana wa Mulungu, tuzileme nkaani ziila zye tukuzyitiha.

¹⁵ Umupuuti umupiti uyo we tuli nawo, avhumanyile uvhuyeyevhazu vhwitu, mwe pe woope álinziilwe nu Seetano ku madala gonti inza iswe vwe tukulingwa. Ileelo uweene atávhomvile uvhutalamalandu.

¹⁶ Kuli izyo, tupalamile ku vhudandamazu pilongolela ilya Mulungu we ali nu vhwila, inga atuswile nu kutufwila uvhwila ahavhaliilizyo he tuli mu ntamwo.